37-SONLI MTTda “XAYR, BOGʻChAJON!” NOMLI TADBIRI OʻTKAZILDI

Insonning shaxs sifatida shakllanishida uning murgʻak bolalik davri muhim oʻrin tutishi haqida olimlarimiz tomonidan koʻplab psixologik tadqiqotlar olib borilgan va aynan bogʻcha yoshidagi bolalarning eslash qobiliyati, qiziqishlar maydoni hayron qolarli darajada kengligini isbotlovchi ilmiy xulosalarni berishgan. Shuning uchun ham mamlakatimizda maktabgacha taʼlim yoshidagi bolajonlarning qobiliyatlarini takomillashtirish, ularni bolalikdan oʻz orzu-intilishlari, qiziqishlariga mutanosib ravishda toʻgʻri yoʻnaltirish orqali taʼlim-tarbiya berishga alohida eʼtibor qaratilmoqda.

Amudaryo tumanining Amir Temur nomli ovuli hududidagi 37-sonli maktabgacha taʼlim tashkilotiga 2019-yildan beri Shahnoza Allamberganova rahbarlik qilib kelmoqda. Mazkur maktabgacha taʼlim tashkilotida ayni paytda asosiy guruhda 60 nafar qisqa guruhlarda 100 nafar bolajonlar tarbiyalanmoqda. Maktabgacha taʼlim tashkiloti tarbiyachi-xodimalarining 5 nafari oliy, 4 nafari esa oʻrta maxsus maʼlumotli mutaxassislardir.

Joriy yilning 10-iyun kuni mazkur muassasada yetti yoshga qadam qoʻyayotgan bolajonlarni maktab taʼlimiga kuzatishga bagʻishlangan “Xayr, bogʻchajon!” adabiy-musiqiy tadbir boʻlib oʻtdi. Sevimli bogʻcha va qadrdon tarbiyachi-bogʻcha onalari bilan xayrlashuv marosimida bolajonlarning ota-onalari, maktabgacha taʼlim tashkiloti masʼullari hamda tarbiyachi-pedagoglar ishtirok etishdi.

Tadbirni maktabgacha taʼlim tashkiloti mudirasi Shahnoza Allaberganova ochib, kichkintoylarni, avvalo, maktab yoshiga yetganlari, maktabgacha taʼlim sirlarini puxta egallab, endilikda ilmlar ummoni sari ilk qadam qoʻyayotganlari bilan tabrikladi.

Muassasada jami 28 nafar tarbiyachi-pedagoglar faoliyat olib borishadi. Shu bois, bolajonlarning maʼnan va jismonan sogʻlom boʻlib voyaga yetishlarini taʼminlash maqsadida jismoniy tarbiya yoʻriqchisi tomonidan turli qiziqarli oʻyinlar, aqlni charxlovchi mashgʻulotlar tez-tez oʻtkazilib turiladi.

Xususan, shaxmat, shashka toʻgaraklarida bolajonlar uchun eng sevimli mashgʻulotlar majmuasi yaratilgan. Ular kuch sinashadilar, bir-birlarini yutuqlari bilan samimiy va madaniyatli tarzda tabriklashni oʻrganadilar. Aynan ana shu shaxmat va shashka sporti toʻgaragi aʼzolari boʻlgan bolajonlar xotirasi kuchli, sinchkov va qatʼiyatli, oʻtkir zehnli boʻlib ulgʻayishayotganidan ularning ota-onalari ham xursand.

Musiqa toʻgaragi esa bolajonlar qalbida sanʼatga mehr uygʻotish bilan birga, oʻzlari oʻrganayotgan ashulalar orqali ular qalbida sheʼriyatga, adabiyotga ixlos va muhabbat tuygʻularini mustahkamlashi bolajonlarning xatti-harakatlarida yorqin namoyon boʻlayotgani quvonarli. Bundan tashqari, bolajonlar rus tili toʻgaragi mashgʻulotlarida juda faol.

Turli ertak qahramonlarining suratlari, oʻyinchoqlar, gullar va rango-rang sharlar bilan bezatilgan maktabgacha taʼlim tashkiloti hovlisi hamda oʻyinchoq-zali bolajonlarning quvnoq ovozlariga, quvonchlariga toʻldi.

Bolajonlar “bogʻcha opa”lari bilan birgalikda oʻzlari oʻrgangan sheʼrlar, kuy-qoʻshiqlari, raqslari bilan davraga fayz kiritdilar. Rus tilida bir-birlari bilan muloqot qilishni oʻrgangan bolajonlar erkin fikrlash qobiliyatlarini namoyon etib, ota-onalarini xursand qildilar.

Ayniqsa, shaxmat va shashka toʻgaragi aʼzolari boʻlgan bolajonlarning mantiqiy fikrlash bahslaridagi ishtiroki va oʻz fikrini aniq, loʻnda ifodalash qobiliyatlari, oʻtkir zehni, hozirjavobligi barchaga manzur boʻldi.

Biri-biridan quvnoq kuy va qoʻshiqlar, aqlni charxlovchi oʻyinlar bilan fayzli oʻtgan “Xayr bogʻchajon!” tadbiri yakunida bolajonlar oʻzlari uchun qadrdon maskan va sevimli “bogʻcha opa”lari bilan xayrlashdilar hamda maktabda yaxshi oʻqib, ilm choʻqqilarini zabt etishga vaʼda berdilar.

Robiya YOʻLDOShEVA.