Beshtom mahalla fuqarolar yigʻinida “Hokim va yoshlar uchrashuvi” boʻlib oʻtdi

Yoshlar muammolarini tinglash, ularning taklif va tashabbuslarini qoʻllab-quvvatlash maqsadida bugungi kunda yurtimizda keng koʻlamli amaliy ishlar olib borilmoqda.

Shu jumladan, barcha darajadagi rahbarlar yoshlar sohasini oʻz kun tartibidagi bosh vazifa sifatida belgilagan holda, mamlakatimizning barcha hududlarida, mahalla va qishloqlarda yoshlar bilan sayyor qabul va uchrashuvlar tashkil etishib, ularning oʻz maqsad va intilishlari yoʻlidagi toʻsiqlarni bartaraf etishga koʻmaklashmoqdalar.

9-iyun kuni Amudaryo tumanining Beshtom mahalla fuqarolar yigʻinida “Hokim va yoshlar uchrashuvi” boʻlib oʻtdi. Unda tuman hokimi Sultonboy Yoʻldashev, tegishli tashkilot masʼullari hamda mahallaning 30 dan ortiq faol yoshlari ishtirok etishdi.

Uchrashuvda tuman hokimi Sultonboy Yoʻldashev tarixan qisqa davrda Oʻzbekiston yoshlari erishgan muvaffaqiyat va yutuqlar zamirida davlatimiz tomonidan koʻrsatilayotgan katta gʻamxoʻrlik va yuksak eʼtibor mujassam ekanligini taʼkidladi.

Qayd etilganidek, bugun mamlakatimizda yoshlarni har jihatdan barkamol qilib tarbiyalash, ularning salomatligini mustahkamlash, qobiliyatlarini roʻyobga chiqarish va bandligini taʼminlashga koʻmaklashish, boʻsh vaqtini mazmunli oʻtkazish, barcha sohalarda olib borilayotgan islohotlar jarayonidagi ishtirokini kengaytirish masalasiga davlat siyosati darajasida eʼtibor qaratilmoqda.

Ayniqsa, yuksak maʼnaviyatli, mustaqil fikrlovchi, qatʼiy pozitsiyasi, keng dunyoqarash va chuqur bilimlarga ega boʻlgan Vatanparvar yoshlarni tarbiyalash, ularda turli mafkuraviy tahdidlarga qarshi immunitetni shakllantirish, sportga jalb qilish orqali ular orasida sogʻlom turmush tarzini targʻib qilish borasida hayotga tatbiq etilayotgan islohotlar oʻz samarasini bermoqda.

Yigʻilish davomida yoshlar oʻz hayotida uchrayotgan muammolar, hamda tashabbuslari bilan tuman hokimiga murojaat qilishdi.

Jumladan, Beshtom maxalla fuqarolar yigʻinida yashovchi Maftuna Yoʻldasheva cubsidiya asosida tikuv mashinasi olib berilishida, Ozoda Qurbonbayeva boʻsh turgan binodan ijara asosida foydalanishda, Hayrullo Baxtiyorov gʻalladan boʻshagan yer maydonlarida qaytadan ekinlar ekish uchun yer ajratilishida amaliy yordam soʻrab murojaat qildilar. Murojaatlar tegishliligi boʻyicha masʼullarga yuklatilib, tez kunda hal etilishiga kelishib olindi.

Bugun yoshlar yaratilayotgan har bir imkoniyatdan unumli foydalanishga intilmoqda. Uchrashuv davomida berilgan savollar va bildirilan murojaatlardan ham bilsa boʻladiki, bugun har bir oʻgʻil-qizning oʻz rejalari va maqsadlari bor.

Chunki, davlatimiz tomonidan olib borilayotgan yoshlar siyosati ularni yanada ilhomlantirmoqda.

Tuman hokimligining Axborot xizmati.