1-iyun Xalqaro bolalarni himoya qilish kuniga bagʻishlab bayram tadbiri oʻtkazildi
Xalqaro bolalarni himoya qilish kuni butun dunyo bolalari uchun eng begʻubor va quvonchli bayram hisoblanadi. Albatta, bolalar bu dunyo, bu hayot mazmunining ajralmas qismidir. Bolalar oʻz tabassumlari orqali insonlar qalbida hayotga, yashashga boʻlgan qiziqishni uygʻotadilar. Koʻzlarida ezgulik va mehr qalqib turgan bolajonlar musaffo osmonda erkin parvoz etayotgan qaldirgʻochlarga oʻxshashadi.
Har yili butun dunyoda boʻlgani kabi mamlakatimizda ham 1-iyun – Xalqaro bolalarni himoya qilish kuni keng nishonlanib kelinadi. Ushbu bayramda kelajagimiz egalari uchun turli kontsertlar, koʻrgazmalar, sayillar, sport musobaqalari va turli xil tadbirlar oʻtkaziladi. Istirohat bogʻlari esa bolalarning tabassumlari bilan goʻyoki moʻʼjizalar dunyosiga aylanadi.
1-iyun kuni Amudaryo tumanining Mangʻit shahridagi madaniyat va istirohat bogʻi ham bolalar kulgusi bilan yanada nurafshon boʻldi. Istirohat bogʻida Xalqaro bolalarni himoya qilish kuniga bagʻishlab katta bayram tadbiri oʻtkazildi.
Tadbirda tuman hokimi Sultonboy Yoʻldashev, sektorlar rahbarlari, hokim oʻrinbosarlari, muassasa, korxona va tashkilotlar rahbarlari, keng jamoatchilik vakillari ishtirok etishdi.
Dastlab tuman hokimi Sultonboy Yoʻldashev tadbirga yigʻilgan barcha bolajonlarni bayram shodiyonasi bilan samimiy qutlab, ularning kelgusidagi oʻqish va ishlarida ulkan zafarlar tiladi. Shuningdek, bolalarning komil inson boʻlib voyaga yetishlari uchun mamlakatimizda yaratilgan barcha shart-sharoitlar haqida toʻxtalib oʻtdi.
Aytish kerakki, bugun yurtimizda ertangi kun egalarining barkamol avlod boʻlib voyaga yetishlari uchun barcha imkoniyatlar mavjud. Ularning bepul taʼlim olish, tibbiy xizmatdan foydalanish va boshqa huquqlari Qonun bilan kafolatlab qoʻyilgan.
Tadbir davomida turli musobaqa va bellashuvarda qatnashib, yuqori natijalarga erishgan bolajonlarning yutuqlari eʼtirof etilib, esdalik sovgʻalari bilan taqdirlandilar. Bayram sovgʻalari, shaʼniga bildirilgan iliq soʻz va tilaklar bolajonlarning dilida katta tassurot va yorqin iz qoldirdi. Bolajonlarga koʻrsatilayotgan yuksak eʼtibor va gʻamxoʻrlik ularni yanada yangi marralar va zafarlar sari undadi.
Tadbir tuman Madaniyat boʻlimi sanʼatkorlari, maktablar, maktabgacha taʼlim muassasalarining raqs dastalari ijrosida baxtli bolalik, ozod va obod Vatanimizni tarannum qiluvchi kuy-qoʻshiqlar va raqslar bilan davom etdi. Oʻz tengdoshlari tomonidan mahorat bilan ijro etilan kuy-qoʻshiqlar, raqslar va sahna koʻrinishlarini bolalar maroq bilan tomosha qilishdi.
Darhaqiqat, ota-ona uchun dunyoda bolajonlar kulgusi va shodligidan aziz neʼmat yoʻq. Tiniq nigohi va biyron tili bilan olamdagi jamiki ajoyibotlarni oʻrganishga, mushohada qilishga urinayotgan bolakayning nurli chehrasiga boqqan har qanday inson hayot tashvishlarini unutadi. Farzandining saodatli va baxtiyor damlarini koʻrib yashash har bir inson umrining asosiy mazmunidir.
Yana bir bora yurtimizdagi barcha bolajonlarni 1-iyun – Xalqaro bolalarni himoya qilish kuni bilan samimiy tabriklaymiz! Siz – Vatanimizning kelajagi, ertangi kunimiz egalarisiz. Shunday ekan, ilm-fan, kasb-hunar sirlarini puxta egallab, kelajak sari dadil qadam tashlang! Buyuk bobolarimizga munosib izdosh, el-yurtimizga kamarbasta avlod, ota-onangiz orzu qilgan farzand boʻlib voyaga yeting, aziz bolajonlar!
Tuman hokimligining axborot xizmati.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
