76-sonli maktabda “Besh muhim tashabbus” doirasidagi tadbirlar yuqori saviyada oʻtkazilmoqda

Bugungi kunda mamlakatimiz aholisining 30 foizini 14 dan 30 yoshgacha boʻlgan yoshlar tashkil etadi. Kelajagimiz egalari har tomonlama sogʻlom, bilimli, yetuk, bir soʻz bilan aytganda, taraqqiyotimizga xizmat qiladigan avlod boʻlishi, zamonaviy bilim, kasb-hunarlarni, axborot texnologiyalarini puxta egallashi uchun zamonaviy sharoit va imkoniyatlar yaratilgan. Shu bilan birga, yoshlarning boʻsh vaqtini mazmunli oʻtkazishni tashkil etish dolzarb masala hisoblanadi.

Har bir oilada ota-onalar farzandini tarbiyalab voyaga yetkazish jarayonida badantarbiya bilan shugʻullanishga, rasm chizishga, sanʼatga oshno etishga, uy yumushlariga qoʻl solishga oʻrgatadi.

Oiladagi bu tarbiyani maktabda izchil davom ettirish bolalarning qobiliyatlarini rivojlantirish uchun Muhtaram Prezidentimiz tomonidan ilgari surilgan “Besh muhim tashabbus” doirasidagi tadbirlarni muntazam ravishda oʻtkazish talab qilinadi.

Amudaryo tumanidagi 76-sonli umumtaʼlim maktabida ham “Besh muhim tashabbus” doirasidagi tadbirlar yuqori saviyada oʻtkazilib kelinmoqda.

Birinchi tashabbus − yoshlarning musiqa, rassomlik, adabiyot, teatr va sanʼatning boshqa turlariga qiziqishlarini oshirishga, isteʼdodini yuzaga chiqarishga, farzandlarimizni sanʼatga oshno qilib, yuksak did sohibi etib tarbiyalashga xizmat qiladi. Maktab oʻquvchilari turli tanlovlarda qatnashib mazkur yoʻnalishda oʻz iqtidorlarini namoyon qilib kelmoqdalar.

Ikkinchi tashabbus − yoshlarni jismonan chiniqtirish hamda sportdagi qobiliyatlarini roʻyobga chiqarish maqsadida maktab oʻquvchilari oʻrtasida sportning turli yoʻnalishlari boʻyicha musobaqalar oʻtkazilib, sportchi yoshlar aniqlanmoqda.

 Maktab maʼmuriyati tomonidan ular munosib ravishda ragʻbatlantirilib, tuman va Respublika bosqichlariga yoʻllanmani qoʻlga kiritishmoqda.

 Uchinchi tashabbus − kompyuter texnologiyalari va internetdan samarali foydalanish yoʻnalishida “Kashfiyotchi bolalar” toʻgaragi yoʻlga qoʻyilgan boʻlib, toʻgarak samarali faoliyat olib bormoqda. Toʻgarakda oʻquvchilar oʻzlarining yaratuvchanlik qobiliyatlarini yanada rivojlantiradilar.

Yoshlar manaviyatini yuksaltirish, ular oʻrtasida kitobxonlikni keng targʻib etish boʻyicha maktab oʻquvchilari oʻrtasida “Yosh kitobxon” tanlovi ham muntazam ravishda oʻtkazilib kelinadi.

“Besh muhim tashabbus” doirasida oʻtkazilayotgan har bir tadbir yuqori saviyada tashkil etilib, oʻquvchilar maktab maʼmuriyati tomonidan munosib ragʻbatlantirilib boriladi.

Oʻquvchilar qalbida sportga, sanʼatga, til oʻrganishga va kitob oʻqishga boʻlgan qiziqishlarini uygʻotish borasida olib borilayotgan turli tadbir va bellashuvlar oʻz samarasini bermoqda.

Ijtimoiy, maʼnaviy-maʼrifiy sohalardagi ishlarni yangi tizim asosida yoʻlga qoʻyish boʻyicha ilgari surilayotgan “Besh muhim tashabbus” doirasida oʻtkazilayotgan tadbirlar negizida ham barkamol avlodni tarbiyalashdek ezgu maqsadlar mujassam.

F.Eshimbetova