69-SONLI MAKTABDA “XOTIRA – AZIZ, QADR – MUQADDAS” DEB NOMLANGAN XOTIRA KEChASI OʻTKAZILDI

Mamlakatimiz boʻylab 9-may – Xotira va qadrlash kuni munosabati bilan turli tadbirlar, uchrashuvlar va xotira kechalari tashkil etilmoqda. Bayram arafasida shu aziz Vatan ozodligi uchun jonini qurbon qilgan mardlar, jasur oʻgʻlonlar yodga olinib, ularning qahramonliklari yosh avlodga namuna qilib koʻrsatilmoqda.

7-may kuni Amudaryo tumanidagi 69-sonli maktabda Xotira va qadrlash kuniga bagʻishlab, “Xotira – aziz, qadr – muqaddas” deb nomlangan uchrashuv kechasi oʻtkazildi. Kechaga Ayoqchi mahallasida yashovchi sobiq afgʻon urushi qatnashchilari Qoʻziboy Davletov, Ozod Yesanov, Haytimbat Jumatovlar taklif etildi. Shuningdek, maktab direktorining maʼnaviy-maʼrifiy ishlar boʻyicha oʻrinbosari Joʻrabek Tajimurodov, tarix fani oʻqituvchilardan Roza Jumamurodova, Sharofat Abduraimova, Dilshod Xudanovlar, boshlangʻich taʼlim oʻqituvchisi Adiba Ahmedova, chaqiruvga qadar boshlangʻich tayyorgarlik fani rahbari Ikrom Gulimbetov, maktab ijodiy-madaniy masalalar boʻyicha targʻibotchisi Sanamjon Matyakubova, oʻqituvchilar Mahbuba Sariyeva, Xosiyat Oʻrozboyeva hamda boshqalar ishtirok etdilar.

Tadbirni maktab oʻquvchilari Siroj Yoʻldoshev hamda Aziza Ozodovalar olib borishdi. Sobiq afgʻon urushi qatnashchilari oʻquvchi-yoshlarga urush xotiralari haqida gapirib, bugungi tinch-osoyishta kunlarimiz uchun jonini fido qilgan jasur yurtdoshlarimizning muqaddas xotirasini eʼzozlash va faxriylarimizning hurmatini joyiga qoʻyish yurtimizda ezgu anʼanaga aylanganini aytib oʻtishdi. Suhbat davomida urush xotiralaridan soʻzlab berib, bugungi dorilamon kunlarni qadrlashni nasihat qildilar. Shu bilan birga yigʻilganlarga dunyo xalqlari boshiga musibat solgan mashʼum Ikkinchi jahon urushi, oʻsha ogʻir kunlarni matonat bilan yengib oʻtgan ota-bobolarimizning yengilmas irodasi, cheksiz matonati haqida gapirib oʻtdilar.

Taʼkidlanganidek, mamlakatimizda 9-may umumxalq bayrami – Xotira va qadrlash kuni sifatida keng nishonlanadi. Ikkinchi jahon urushida fashizm ustidan qozonilgan gʻalabaga munosib hissa qoʻshgan, mustaqillik yillarida xizmat burchini bajarish chogʻida halok boʻlgan harbiy xizmatchilar va huquqni muhofaza qiluvchi organlar xodimlarining xotirasini abadiylashtirish, oramizdagi barcha faxriylarga hurmat-ehtirom koʻrsatish borasida har yili muayyan ishlar amalga oshirilyapti. Umuman, Xotira va qadrlash kuni chinakam milliy – umumxalq bayramimizga aylandi.

Xotira kechasida maktab oʻqituvchilari ham Ikkinchi jahon urushida Oʻzbekistonning gʻalabaga qoʻshgan hissasi, Oʻzbekistondan frontga joʻnab ketgan oʻgʻlonlarning jasorati, yurtdoshlarimizning front ortidagi matonatli va fidokorona mehnati, Oʻzbekistonga evakuatsiya qilingan goʻdaklar, onalar, qariyalar, bemorlarga koʻrsatilgan mehr-muruvvat, saxovat, bagʻrikenglik haqida qiziqarli tarixiy hikoyalar aytib berdilar.

Tadbir davomida maktab oʻquvchilari tinchlik, Vatan haqida sheʼrlar, qoʻshiqlar, shoʻx raqslar ijro etib, yigʻilganlarga xush kayfiyat baxsh etdilar.

Ozoda Xudoyberganova.