40-sonli maktabda professor-oʻqituvchilar ochiq darslar oʻtdi

Maʼlumki, Oʻzbekiston Respublikasi Prezidenti Shavkat Mirziyoyev rahbarligida 2022-yil 5-aprel kuni kengaytirilgan tarzda videoselektor yigʻilishi oʻtkazilib, unda Xalq taʼlimi tizimida amalga oshirilayotgan islohotlar natijadorligi tahlil qilingan va kelgusidagi muhim vazifalar belgilab olingan edi.

Ana shu ustuvor yoʻnalishlarini amalda bajarish maqsadida Qoraqalpogʻiston Respublikasidagi maktablarga ham taʼlim-tarbiya sifatini yaxshilash boʻyicha oliy taʼlim muassasasalari jamoasi masʼul qilib biriktirilgan. Oʻzbekiston Respublikasi Prezidenti maslahatchisi tarafidan tasdiqlangan jadval asosida maktablarga biriktirilgan oliy oʻquv yurtlari professor-oʻqituvchilari aprel-may oylari davomida tegishli maktablarda boʻlib, keng turda targʻibot-tashviqot ishlarini olib bormoqdalar.

Amudaryo tumanidagi 40-sonli maktabda taʼlim-tarbiya sifatini yanada yaxshilashga Qoraqalpogʻiston Qishloq xoʻjaligi va agrotexnologiyalar instituti masʼul qilib biriktirilgan edi. 29-aprel kuni institutning bir guruh professor-oʻqituvchilari maktabning tabiiy fanlar oʻqituvchilari uchun “Taʼlim sifatini oshirishda oʻqituvchining kasb mahorati” mavzusida amaliy seminar trening oʻtkazishdi.

Seminar trening davomida maktabning 9-“B” sinf oʻquvchilariga kimyo fanidan “Matematika, fizika, kimyo va informatika texnologiyalari” kafedrasi dotsenti “Kimyoviy reaktsiya tezligi va kimyoviy muvozanat” mavzusida ochiq dars oʻtdi.

9-“A” sinfda esa fizika fanidan mazkur kafedraning assistent-oʻqituvchisi “Molekulyar-kinetik nazariya asoslari hamda termadinamika qonunlari” mavzusida dars oʻtib, mavzu boʻyicha batafsil tushuntirishlar berdi. 9-“B” sinf oʻquvchilari professor-oʻqituvchilarning informatika fanidan oʻtgan darsida “Informatika va axborot texnologiyalari haqida umumiy maʼlumot” mavzusida batafsil maʼlumotlar oldi.

Institutning “Matematika, fizika, kimyo va informatika texnologiyalari” kafedrasi katta oʻqituvchisi maktabning 10-“G” sinfida taʼlim olayotgan oʻquvchilarga matematika fanidan oʻtkazilgan ochiq darsda “Matematikada mantiqiy fikrlarni rivojlantirish” mavzusida keng turda tushunchalar berdi.

Institutning toʻqaychilik va dorivor oʻsimliklar kafedrasi assistenti “Hujayra haqida taʼlimot” mavzusi bilan maktabning 9-“B” sinfida taʼlim olayotgan oʻquvchilarning bilimlarini yanada mustahkamlashga hissa qoʻshdi.

Aytish kerakki, professor oʻqituvchilarning 1 soatlik ochiq darslari qiziqarli va mazmunli tarzda tashkil qilinib, oʻquvchilar bilan savol-javoblar asosida qiziqarli oʻtkazildi.

Maktabning faollar zalida institutning yoshlar masalalari va maʼnaviy-marifiy ishlar boʻyicha prorektori, shuningdek taʼlim sifatini nazorat qilish boʻlimi, gumanitar fanlar kafedrasi boshliqlari hamda oʻzbek, qoraqalpoq va rus tillari kafedrasi assistenti maktab bitiruvchilari bilan uchrashib, ularni kasbga yoʻnaltirish boʻyicha maʼruzalar qildi. 11-sinf oʻquvchilariga institutdagi yoʻnalishlar haqida va mazkur mutaxassisliklarni egallagan yoshlarning kelgusida qaysi sohalarda faoliyat yuritishlari haqida batafsil maʼlumotlar berildi.

Oʻquvchilar yigʻilish davomida oʻzlarini qiziqtirgan savollarga javoblar olishdi.

Sanobar Xoʻjamurodova,

Qoraqalpogʻiston Respublikasi Joʻqorgʻi Kengesi deputati, 40-sonli maktab direktori