JOʻQORGʻI KENGESDAGI OʻZBEKISTON XDP FRAKTsIYaSI RAHBARI XALILLA YeShIMBETOV AMUDARYo TUMANIGA TAShRIF BUYuRDI

Hozirgi kunda mamlakat hududida boquvchisini yoʻqotgan oilalar, nogironligi boʻlgan shaxslar, pensionerlar va ijtimoiy himoyaga muhtoj fuqarolarga davlatimiz tomonidan sharoit va qulayliklar yaratilmoqda. Ayniqsa, ayollar va yoshlarni qoʻllab-quvvatlash ularning bandligini taʼminlash, kasbga oʻqitish, tadbirkorlikka oʻrgatish hamda ularga subsidiya va imtiyozli kreditlar davlatimiz tomonidan ajratilmoqda. Oʻzbekiston Xalq demokratik partiyasi ham ushbu toifadagi fuqarolarning manfaatlarini himoya qilib kelmoqda.

22-aprel kuni Oʻzbekiston Xalq demokratik partiyasi Qoraqalpogʻiston Respublikasi Kengashi raisi, Qoraqalpogʻiston Respublikasi Joʻqorgʻi Kengesidagi Oʻzbekiston Xalq demokratik partiyasi fraktsiyasi rahbari Xalilla Yeshimbetov Amudaryo tumaniga tashrif buyurib, tuman partiya Kengashi hamda Xalq deputatlari tuman Kengashidagi deputatlik guruhi faoliyati bilan tanishdi.

Tuman hokimligida shu maqsadda oʻtkazilgan yigʻilishda partiya masʼullari va faollari, deputatlar ishtirok etdilar. Yigʻilish davomida oʻtgan davr mobaynida partiya tuman Kengashi hamda deputatlar guruhi tomonidan amalga oshirilgan tegishli chora-tadbirlar, amaliy ishlar xususida soʻz yuritildi. Shundan soʻng, Joʻqorgʻi Kengesdagi partiya fraktsiyasi rahbari Xalilla Yeshimbetov bu borada fikr-mulohazalarini maʼlum qilib, oʻz takliflarini kiritdi.

Shuningdek, Oʻzbekiston Xalq demokratik partiyasi tuman Kengashi raisi lavozimiga tayinlangan Eshmanov Mahmud Egamberganovichni tabrikladi. Undan tashqari, partiya dasturiy maqsad va vazifalarini aholi orasida keng targʻib qilish, amalga oshirish borasidagi muhim vazifalar xususida keng toʻxtalib oʻtdi.

Yigʻilishdan soʻng Qoraqalpogʻiston Respublikasi Joʻqorgʻi Kengesi tashabbusi bilan eʼlon qilingan deputatlarning oʻz saylovchilari bilan ishlashning dolzarb oʻn kunligi doirasida partiya fraktsiyasi rahbari Xalilla Yeshimbetov Xalq deputatlari tuman Kengashi deputati, deputatlar guruhi rahbari Maqsud Saʼdullayev bilan birgalikda Boʻston mahalla fuqarolar yigʻinida istiqomat qiluvchi saylovchilar bilan uchrashdi.

Uchrashuvda Yangi Oʻzbekiston taraqqiyot strategiyasi va uni Inson qadrini ulugʻlash va faol mahalla yilida amalga oshirish boʻyicha qabul qilingan Davlat Dasturi, Qoraqalpogʻiston Respublikasi Joʻqorgʻi Kengesi sessiyalarida qabul qilingan Qonunlar hamda qarorlarning mazmun-mohiyati xususida tushunchalar berildi. Shu bilan birga hududdagi aholi muammolari oʻrganilib, tegishli takliflar ishlab chiqildi.

Shundan soʻng, partiya masʼullari Boʻston mahalla fuqarolar yigʻinida yashovchi fuqaro  Hamida Otajonovaning uyida tashkil qilingan tikuvchilik tsexiga tashrif buyurdi. Hamida Otajonova 32 mln 800 ming soʻm miqdorida kredit olib, oʻzi bilan yana mahalladagi 4 nafar ishsiz xotin-qizlarning bandligini taʼminlagan. Masʼullar tsexdagi ayollar faoliyati bilan tanishib, kelgusidagi rejalarini muxokama qilishdi hamda ishlarini yanada kengaytirishni tavsiya qilishdi.

Tadbir soʻngida yurtimiz boʻylab oʻtkazilayotgan “Yashil makon” loyihasi doirasida koʻchat ekish ishlari tashkil etildi. Partiya masʼullari Boʻston mahallasi hududiga mevali va manzarali daraxtlar koʻchatlarini oʻtqazib, yashil hududlar kengayishiga oʻz hissalarini qoʻshishdi.

M.Saʼdullayev, Xalq deputatlari tuman Kengashi deputati.