FUQARO MUHOFAZASI KUNI MUNOSABATI BILAN MAXSUS-TAKTIK OʻQUV MAShQI OʻTKAZILDI

Amudaryo tumani hokimi – Fuqaro muhofazasi boshligʻining shu yil 31-martdagi “Amudaryo tumani hududida 1-apreldan 1-mayga qadar “Favqulodda vaziyatlarning oldini olish va fuqaro muhofazasi oyligi”ni tashkil etish va oʻtkazish toʻgʻrisida”gi 5-sonli buyrugʻi talablariga asosan amaliy maxsus-taktik oʻquv mashqi oʻtkazildi.

Qipchoq ovulidagi 11-sonli maktabda boʻlib oʻtgan oʻquv mashqida Favqulodda vaziyatlar boʻlimi xodimi, kapitan Bekzod Tajiboyev, tuman Sanitariya-epidemiologik osoyishtalik va jamoat salomatligi boʻlimi xodimi Muborak Qalandarova, maktab direktori Ulugʻbek Mamutov, chaqiriqqa qadar boshlangʻich tayyorgarlik boʻyicha rahbar Nurbek Annamuradov hamda maktab oʻquvchilari ishtirok etdilar.

Tadbirda masʼullar tomonidan dastlab oʻquv mashqini oʻtkazishdan maqsad – tabiiy va texnogen tusdagi favqulodda vaziyatlar yuzaga kelganda maktab oʻquvchilarining toʻgʻri harakat qilish koʻnikmalarini takomillashtirish, fuqaro muhofazasi boʻyicha tuzilgan guruhlarni kechiktirib boʻlmaydigan avariya va qutqaruv ishlariga tayyorgarligini kuchaytirishdan iborat ekanligi tushuntirildi. Shuningdek, favqulodda vaziyatlar yuzaga kelganda fuqaro muhofazasi guruhlari oʻz majburiyatlarini aniq va toʻgʻri bajarishni amaliyotda sinashi va oʻrganib borishi muhim ahamiyatga egaligi, tuman fuqaro muhofazasi xizmatlarining hamkorlikdagi harakatlari takomillashtirilib borilishi kerakligi aytib oʻtildi.

Oʻquv mashqining amaliy qismi ikki bosqichda oʻtkazildi. Birinchi bosqichda “Maktabda yuzaga kelishi mumkin boʻlgan favqulodda vaziyatlarda fuqaro muhofazasi guruhlari va maktab rahbariyatining harakatlari” mavzusidagi oʻquv mashqining nazariy qismida kun tartibidagi masala boʻyicha oʻquvchilarga keng tushunchalar berildi. Shundan soʻng, oʻquvchilar guruhlarga ajratib olindi.

Tadbirning ikkinchi bosqichida maktabda kutilmagan avariyalar, favqulodda holat sodir boʻlganda jabrlanganlarga Fuqaro muhofazasi guruhlari, tuman Yongʻin-qutqaruv qismlar hamda Tez tibbiy yordam tomonidan qutqarish va birinchi tibbiy yordam koʻrsatish choralari amalda bajarilib, koʻrsatib berildi.

Oʻquv mashqiga maktab rahbarlar tarkibi va fuqaro muhofazasi tuzilmasidan 26 nafar oʻquvchilar, tuman Favqulodda vaziyatlar boʻlimidan 6 nafar xodim va 1 ta maxsus texnika, Tez tibbiy yordamdan 3 nafar xodim va 1 ta maxsus texnika jalb qilindi. Shuningdek, tuman Sanitariya-epidemiologik osoyishtalik va jamoat salomatligi boʻlimidan 1 nafar xodim, oʻqituvchi va oʻquvchilaridan 72 nafari ishtirok etishdi.

Mashgʻulot yakunida 11-sonli maktabning rahbarlar tarkibi va fuqaro muhofazasi tuzilmalari guruhlari shaxsiy tarkibi favqulodda vaziyatlarda harakat qilishga tayyor emas, deb baholandi. Tadbirga tashrif buyurgan masʼullar oʻquv-mashq mashgʻulotlari davomida ishtirokchilar tomonidan yoʻl qoʻyilgan kamchiliklar koʻrsatilib berildi. Kelgusida bunday kamchiliklarga yoʻl qoʻymasliklari kerakligi, favqulodda vaziyatlarga doim tayyor turish lozimligi, aks holda kutilmagan xavfli hodisalar ogʻir oqibatlarni keltirib chiqarishi mumkinligi aytib oʻtildi.

Gʻ.Oʻralov, tuman FVB boshligʻi oʻrinbosari, podpolkovnik.