1-SONLI MAKTABGA AQShNING OʻZBEKISTONDAGI ELChIXONASI XODIMI TAShRIF BUYuRDI

Bugungi kunda ilm-fan yutuqlaridan xabardor boʻlish, turli sohalarda qoʻllanilayotgan zamonaviy texnika va uskunalarni oʻzlashtirish, chet ellik mutaxassislarning boy tajribasidan foydalana olish uchun chet tillarni bilish juda muhim. Keyingi yillarda mamlakatimiz taʼlim muassasalarida yoshlarga xorijiy tillarni oʻrgatish masalasiga juddiy eʼtibor qaratilmoqda. Ayniqsa dunyodagi yetakchi til hisoblanmish ingliz tilini oʻqitish, oʻquvchi yoshlarning ushbu tilda bemalol muloqot qila olishlariga erishish maqsadida koʻpgina chora-tadbirlar amalga oshirilayotir. Buningdek saʼy-harakatlar samarasida umumiy oʻrta taʼlim maktablarini tugatayotgan yoshlarning xorijiy oliygohlarga oʻqishga kirayotganlari safi tobora ortmoqda.

14-aprel kuni Amudaryo tumanidagi 1-sonli umumiy oʻrta taʼlim maktabiga oʻquvchilarning ingliz tilini oʻrganish darajasi bilan tanishish, shuningdek, oʻzining ingliz tilini yanada oson va tez oʻrgatish loyihasi bilan tanishtirish maqsadida Amerika Qoʻshma shtatlarining Oʻzbekistondagi elchixonasi xodimi Maurin Runney tashrif buyurdi.

Janob Runney maktabda oʻzining ingliz tilini oson va chuqur oʻrgatish loyihasi afzalliklari haqida maʼruza qildi. Loyiha maqsadi maktab oʻquvchilarining, barcha aholining ingliz tilini chuqur oʻrganib, mazkur tilda bemalol muloqot qila olish, oʻzlarining fikrlarini erkin bayon qila olish koʻnikmasiga ega boʻlishlariga yordam berishdir.

Tadbirda maktabning ingliz tili fani oʻqituvchilari Muhabbat Xudoyberganova, Zivar Otajonova, Qadamboy Allaberganov, Fariza Rajabova, Irodaxon Safarboyeva, Barno Yeshimbetova, Mavluda Usmonovalar professor Maurin Runney janoblari bilan ingliz tilini oʻqitishning istiqbolli metodlari haqida, tilni oʻrganishning ahamiyati va bugungi kunda dunyoning barcha davlatlarida uni oʻrgatishga eʼtibor oshayotgani haqida qizgʻin suhbatlashdilar. Mehmon oʻzining ingliz tilini oʻqitish loyihasidagi oʻziga xosliklar, metodlar haqida batafsil tushuncha berdi va bundan maktab xorijiy til oʻqituvchilari ulkan taassurotlar oldilar.

Tadbirda Fariza Rajabova maktabning 7-B sinfida “Dunyoning diqqatga sazovor joylari” mavzusida namunaviy dars oʻtdi va bu jarayonni diqqat bilan kuzatgan mehmon oʻqituvchi mahoratiga yuqori baho berdi. Dars jarayonida oʻquvchilarning ustozi bilan bemalol ingliz tilida muloqot qilib, oʻz fikrlarini mustaqil bildira olishi mehmonda zoʻr taassurotlar qoldirdi. U oʻqituvchilarning, oʻquvchilarning bergan savollariga batafsil javoblar berdi.

Til bilgan – el biladi, deydi xalqimiz. Mamlakatimizda yoshlarini el biladigan ilmli, iqtidorli, maʼnaviyatli, dunyo yoshlari bilan bemalol bellasha oladigan, salohiyati yuksak qilib voyaga yetkazish, shu qatorda xorijiy tillarni puxta oʻzlashtirishlariga erishish borasida olib borilayotgan izchil harakatlar oʻz samarasini bermoqda. Buni maktablar partalarida oʻtirib, xorijiy tillarda burro-burro soʻzlayotgan oʻquvchilar misolida ham yaqqol koʻrishimiz mumkin.

Oygul RAJABOVA.