TUMANIMIZDA OʻZBEKISTON RESPUBLIKASI DAVLAT XAVFSIZLIK XIZMATI RAISI KUBOGI UChUN FUTBOL, MINI FUTBOL BOʻYIChA MUSOBAQALARGA START BERILDI

Sport qadimdan odamlarni birdamlikka, hamkorlikka va tinch-totuvlikka chorlovchi muhim vosita boʻlib kelgan.

Sport kishini jismonan chiniqtiribgina qolmay, maʼnaviy dunyosini boyitishga, oʻz yurti sharafini munosib himoya qilishga oʻrgatadi. Shu boisdan ham mamlakatimizda sportning ommaviyligiga erishish, aholi qatlamlari orasida turli musobaqalar oʻtkazib, iqtidorlilarni ragʻbatlantirib borishga eʼtibor kuchaymoqda.

Mamlakatimizning qishloq va mahallalarida yashovchi uyushmagan yoshlar orasida sogʻlom turmush tarzini shakllantirish, ularning oʻz qobiliyatlarini namoyish etishlariga sharoit yaratish va koʻnglida vatanparvarlik tuygʻularini yuksaltirish maqsadida Oʻzbekiston Respublikasi Davlat xavfsizlik xizmati raisi kubogi uchun sportning futbol va mini futbol turlari boʻyicha musobaqalar oʻtkazilmoqda.

Ushbu musobaqaning Amudaryo tumani saralash bosqichi boshlanishi bayram tusini oldi. Shu yilning 5-aprel kuni Mangʻit shahrining Chordara mahallasidagi sunʼiy qoplamali mini futbol maydonchasida boʻlib oʻtgan tadbirda tuman hokimi Sultonboy Yoʻldoshev, sektorlar rahbarlari, Davlat xavfsizlik xizmati tuman boʻlimi boshligʻi Sultanmurat Jolimbetov, hokim oʻrinbosari Mahmud Shermetov, turizm va sport boʻlimi boshligʻi Gʻulomjon Qurbonboyev, tuman Bolalar-oʻsmirlar sport maktabi direktori Chorsham Tajimurodov hamda yosh sportchilar qatnashdilar.

Bayramona bezatilgan sunʼiy qoplamali maydonchada saf tortgan sportning futbol, mini futbol turlari bilan shugʻullanayotgan mahallalar yoshlarini tuman hokimi Sultonboy Yoʻldoshev qizgʻin muborakbod etdi va Oʻzbekiston Respublikasi Davlat xavfsizlik xizmati raisi kubogi uchun boshlanayotgan ushbu nufuzli bellashuvda barcha jamoalarni muvaffaqiyatli ishtirok etishga va gʻolib boʻlishga chaqirdi.

Qayd etish lozimki ushbu musobaqaning ilk bosqichida tumanimizdagi 49 ta mahallalarning har biridan bittadan, jami 49 ta jamoalar ishtirok etadi.

Tadbirda ishtirok etgan Davlat xavfsizlik xizmati tuman boʻlimi boshligʻi, tuman Bolalar-oʻsmirlar sport maktabi direktori Chorsham Tojimurodovlar sport maktab hamda Davlat xavfsizlik xizmati, Yoshlar ishlari agentligi tuman boʻlimlari, tuman hokimligi Turizm va sport boʻlimi hamkorligida tashkillashtirilayotgan ushbu musobaqa 16 yoshdan 30 yoshgacha boʻlgan futbol ishqibozlari jamlangan barcha jamoalar uchun unutilmas voqea boʻlib qolishini taʼkidladilar.

Tadbirda musobaqaning ilk bosqichida qaysi jamoa kim bilan gʻoliblik uchun toʻp surishini aniqlash uchun qurʼa tashlandi. Futbol, mini futbol ishqibozlari jamoalari uch bosqichda – tuman saralash, Qoraqalpogʻiston Respublikasi va viloyatlar, Toshkent shahri boʻyicha saralash va final musobaqalarida oʻzaro kuch sinashadilar.

Soʻnggi yillarda anʼanaviy tarzda oʻtkazib kelinayotgan ushbu musobaqa minglab yoshlarni qamrab olmoqda va tobora nufuzi ortib bormoqda.

Musobaqaning avgust oyida boʻlib oʻtadigan final bosqichida Qoraqalpogʻiston Respublikasi, viloyatlar va Toshkent shahridan oʻz hududlarida gʻolib boʻlgan 14 ta jamoalar bellashadi. Gʻolib jamoaga oʻzlari istiqomat qiluvchi hududda mini futbol maydonchasi, 2-, 3-oʻrinlar egalariga esa “Workout” trenajyor maydonchalari qurib beriladi. Tumanimiz yoshlariga bellashuvlarda muvaffaqiyatlar tilab qolamiz.

O.RAJABOVA.