YaNGI OʻQUV MARKAZI ISh BOShLADI

Mamlakatimizda keyingi yillarda taʼlim tizimiga eʼtibor tobora kuchaytirilmoqda. Maʼnan yetuk, ilgʻor davlatlar vakillari bilan bemalol raqobatlasha oladigan yoshlarni kamolga yetkazishga gʻamxoʻrliklar kuchaytirilmoqda. Davlat taʼlim muassasalari qatori bu ulugʻvor vazifalar ijrosiga yoʻnaltirilgan nodavlat taʼlim tashkilotlari soni ham kun sayin koʻpayib bormoqda.

“Nodavlat taʼlim tashkilotlarini davlat tomonidan qoʻllab-quvvatlash va taʼlim jarayonida yoshlar uchun qoʻshimcha shart-sharoitlar yaratish chora-tadbirlari toʻgʻrisida”gi Prezident Qaroriga koʻra nodavlat taʼlim muassasalari davlat tomonidan qoʻllab-quvvatlanayotgani, ular uchun zarur shart-sharoitlar yaratishga eʼtibor berilayotgani oʻzining ijobiy samaralarini berayotir. Natijada chet tillarni, boshqada fanlarni chuqur oʻrgatishga, abituriyentlarni oliy taʼlim muassasalariga oʻqishga kirishlari uchun tayyorlaydigan nodavlat taʼlim tashkilotlari kun sayin koʻpaymoqda.

Yaqinda Amudaryo tumanining Mangʻit shahri Boyovul mahallasida yana bir ana shunday nodavlat taʼlim tashkiloti oʻz faoliyatini boshladi. Yuqori darajadagi oʻquv standartlariga moʻljallangan oʻquv markazi tadbirkor Hushnuddin Fayzullayev tomonidan tashkil etildi.

Markazning ingliz tilidan maksimal tayyorgarlik kurslarida har bir guruh sigʻimi 5 nafardan 10 nafargacha qilib belgilangan boʻlib, har bir oʻquvchiga ikki nafardan oʻqituvchi taʼlim beradi. Bitta dars davomiyligi 2 soatni tashkil qiladi va oʻquvchilarning ingliz tilida yozish, oʻqiy olish, gapirish va eshitish koʻnikmalari shakllantiriladi.

Oʻquv markazida zamonaviy darsliklar, elektron doska mavjud. Oʻquv markazida ingliz tilini oʻrganish istagidagi har bir oʻquvchiga uchtadan shu maqsadga qaratilgan kitob bepul taqdim etiladi va oʻquv mashgʻulotlaridan keyin hamda yakshanba kunlari oʻquvchilar bilan suhbatlar oʻtkazish, inglizcha filmlar namoyish qilish, har xil koʻngilochar baxs-munozarali tadbirlar oʻtkazish ham rejalashtirilgan.

Oʻquv markaziga ingliz tilini mukammal oʻrganish istagida tashrif buyuruvchilardan malakali oʻqituvchilar tomonidan ingliz tilini bilish darajasini aniqlash maqsadida test olinadi. Darsning birinchi kuni albatta, bepul.

Shunisi eʼtiborliki, ingliz tilini bilish yoshlar uchungina emas, barcha aholi uchun ham juda muhim. Shu boisdan ham farzandini ingliz tilini chuqur oʻrgatadigan oʻquv markazlariga olib boruvchi ota-onalar soni kundan kunga koʻpaymoqda. Boisi ingliz tili – xalqaro til ekanligi, ingliz tilini bilgan kishi dunyoning barcha hududlarida yashovchi fuqarolar bilan ozmi-koʻpmi muloqotga kirisha oladi. Davlatlar oʻrtasida xalqaro aloqalarning kengayishi, oʻzaro hamkorlikda ilmiy texnik kashfiyotlarning amalga oshirilishi ingliz tilini yurtdoshlarimiz uchun ham doimiy ehtiyojga aylantirmoqda.

Mangʻit shahrida yangidan tashkil etilgan “ICEBERG” oʻquv markazi ingliz tilini oʻqitishga ixtisoslashgan oʻquv markazi ham yoshlarga ushbu tilni oʻrganishga chorlaydi.

O.RAJABOVA.