OLIY HARBIY BILIM YuRTLARI VA “TEMURBEKLAR MAKTABI” HARBIY-AKADEMIK LITsEYIDA OʻQIShNI XOHLOVChI YoShLAR UChUN TARGʻIBOT TADBIRLARI OʻTKAZILMOQDA

Oʻgʻil bola borki, harbiy hayotga alohida qiziqish va orzu bilan qaraydi. Harbiy libos kiyish, safda yurish qoidalarini oʻrganishga, zamonaviy harbiy texnikalar, qurol-aslahalar sirini bilishga intiladi. Voyaga yetgach esa harbiy libos kiyish, ona Vatan oldidagi farzandlik burchini bajarish maqsadida armiya safida xizmat qilishga boʻlgan intilishi yanada kuchayadi.

Umumtaʼlim maktablarida taʼlim dasturiga kiritilgan chaqiriqqa qadar boʻlgan tayyorgarlik fani oʻsmir-yoshlarning bu boradagi qiziqish va intilishlarini rivojlantirishda muhim ahamiyat kasb etadi. Mazkur fan oʻqituvchilari bilan harbiy soha xodimlarining nazariy va amaliy mashgʻulotlardan tashqari, sohaga oid yangiliklar, bilimdon va jismonan baquvvat yoshlarni Oliy harbiy bilim yurtlari, “Temurbeklar maktabi” harbiy-akademik litseyga oʻqishga kirishlari uchun targʻibot-tashviqot tadbirlarining oʻtkazilishi doimiy anʼanaga aylangan.

Ayni kunlarda Amudaryo tuman Mudofaa ishlari boʻlimi hamda boʻlimning chaqiriluvchilarni harbiy xizmatga tayyorlash boʻyicha boʻlinmasi tomonidan tumandagi umumtaʼlim maktablarining 9-11-sinflar bitiruvchilari va muddatli harbiy xizmatni oʻtab, zahiraga boʻshatilgan sobiq askarlar bilan targʻibot tadbirlari boʻlib oʻtmoqda.

Ana shunday targʻibot tadbirlaridan biri 38-sonli umumtaʼlim maktabida boʻlib oʻtdi. Tadbirda Amudaryo tuman Mudofaa ishlari boʻlimi boshligʻi, podpolkovnik Sherzod Murodov va chaqiruvchilarni harbiy xizmatga tayyorlash boʻlinmasi boshligʻi Roman Roʻzmetov, shuningdek, muddatli harbiy xizmatni oʻtab, zahiraga boʻshatilgan sobiq askarlar va umumtaʼlim maktablarining chaqiriqqa qadar tayyorgarlik fani oʻqituvchilari ishtirok etishdi.

Aynan shunday targʻibot tadbirlari Mangʻit shahridagi 40-sonli maktabda ham oʻtkazildi. Maktab direktori Sanobar Xoʻjamurodova, maktabning chaqiriqqa qadar tayyorgarlik fani oʻqituvchisi vazifasini bajaruvchi Ravshanbek Reyimov va boshqalar qatnashgan targʻibot tadbirida Amudaryo tuman Mudofaa ishlari boʻlimi boshligʻi, podpolkovnik Sherzod Murodov hamda chaqiriluvchilarni harbiy xizmatga tayyorlash boʻlimi boshligʻi Roman Roʻzmetovlar, shuningdek, muddatli harbiy xizmatni oʻtab, zahiraga boʻshatilgan sobiq askarlar, maktabning 9-11-sinf oʻquvchilari ishtirok etdilar.

Targʻibot tadbirlarida mutasaddilar yoshlarga mamlakatimizdagi Oliy harbiy bilim yurtlari va “Temurbeklar maktabi” harbiy-akademik litseyi haqida toʻliq maʼlumotlar berdilar. Shu bilan birga, mazkur bilim yurtlarining har yilgi qabul kvotalari, Nizomlari va nomzodlarni saralash tanlovi, dastlabki tanlash, harbiy kasbiy tanlov va test sinovlari, shuningdek, hujjatlarni qabul qilish muddatlari xususida batafsil tushunchalar berishdi.

Targʻibot tadbiri davomida oʻquvchi-yoshlar oʻzlarini qiziqtirgan savollar bilan murojaat qildilar. Barcha savollarga masʼullar tomonidan aniq va batafsil javoblar berildi.

Amudaryo tumani xalq taʼlimi boʻlimiga qarashli 30-sonli maktabda ham shu kabi targʻibot tadbiri oʻtkazildi. Tadbirda maktab direktori Quvvat Niyozov, maktabning chaqiriqqa qadar tayyorgarlik fani oʻqituvchisi Toshpoʻlat Qoʻchqorov, tuman Mudofaa ishlari boʻlimi boshligʻi, podpolkovnik Sherzod Murodov hamda chaqiriluvchilarni harbiy xizmatga tayyorlash boʻlimi boshligʻi Roman Roʻzmetovlar soʻzga chiqib, oliy harbiy taʼlim muassasalari haqida maʼlumotlar berdi.

Targʻibot tadbirida Amudaryo tuman Mudofaa ishlari boʻlimi boshligʻi Sherzod Murodov yoshlarga Oʻzbekiston Respublikasi Mudofaa, Ichki ishlar, Favqulodda vaziyatlar vazirliklari, Davlat xavfsizlik xizmati, Milliy gvardiyasi tarkibida oʻqish davomiyligi ikki yil boʻlgan “Temurbeklar maktabi” harbiy akademik litseylari tashkil etilib, faoliyat olib borayotgani taʼkidladi. Shuningdek, oʻquvchilarga mamlakatimizdagi Oliy harbiy bilim yurtlari xususida batafsil maʼlumot berildi. Sherzod Murodov amudaryolik yoshlarni va 9-sinf bitiruvchilarini “Temurbeklar maktabi” harbiy-akademik litseyida oʻqishga targʻib qilib, mazkur harbiy-akademik litseyga oʻqishga kiruvchilar uchun beriladigan imtiyozlar hamda nazariy va jismoniy tayyorgarlik sinovlari xususida batafsil soʻz yuritdi.

Mamlakatimizdagi Oliy harbiy bilim yurtlari va “Temurbeklar maktabi” harbiy-akademik litseyida oʻqishni xohlovchi yoshlar bilan oʻtkazilgan targʻibot tadbiri oʻquvchi-yoshlar qalbida ona Vatanga sadoqat bilan xizmat qilish va muqaddas Yurt tuprogʻini koʻz qorachigʻidan asrash tuygʻusini yanada mustahkamladi.

Robiya YOʻLDOShEVA.