Qilichboy ovulida Vazirlar Kengashi raisining oʻrinbosari ishtirokida sayyor qabul oʻtkazildi

Mamlakatimizda inson manfaatlarini taʼminlash, turmush sifati va farovonligini oshirish uchun  avvalo, ularning dardu tashvishlari, orzu-niyatlari, hayotiy muammo va ehtiyojlarini oʻrganishga alohida eʼtibor qaratilmoqda. Shu maqsadda xalq bilan ochiq muloqotlar olib borilib, insonlar huquq hamda manfaatlarini taʼminlash orqali xalqimizning farovon, baxtli hayot kechirishi uchun munosib  sharoitlar yaratilayotir. Keyingi yillarda amalga oshirilayotgan xalq bilan ochiq muloqotlar, oʻtkazilayotgan sayyor qabullar va xalq hayotini xonadonma-xonadon yurib oʻrganishlar mamlakatimizni har tomonlama rivojlantirish yoʻlida muhim vosita boʻlmoqda.

Aholining turli qatlamlari bilan muloqot qilish, mavjud dolzarb muammolarni aniqlash, ularni bevosita joyida bartaraf etish yuzasidan tezkor va aniq choralar koʻrish maqsadida 1-aprel kuni Amudaryo tumanining Qilichboy Madaniyat markazida sayyor qabul oʻtkazildi.

Qoraqalpogʻiston Respublikasi Vazirlar Kengashining 2022-yil uchun belgilangan ish rejasiga muvofiq Vazirlar Kengashi Raisining oʻrinbosari Rustam Safarboyev boshchiligida oʻtkazilgan sayyor qabulda tuman hokimi Sultonboy Yoʻldoshev, respublika darajasidagi tashkilotlar va korxonalar vakillari, tuman Xalq qabul xonasi mudiri Erkin Rajabov, sektorlar rahbarlari, tumanda faoliyat koʻrsatayotgan banklar filiallari, korxona-tashkilotlarning masʼul xodimlari ishtirok etdilar.

Sayyor qabulda dastlab Qoraqalpogʻiston Respublikasi Vazirlar Kengashi raisi oʻrinbosari Rustam Safarboyev mamlakatimizda amalga oshirilayotgan islohotlar, hududlarni rivojlantirish va aholi turmush farovonligini yaxshilash maqsadida qilinayotgan ishlarga toʻxtalib oʻtdi.

Birgina Amudaryo tumanining oʻzida joriy 2022-yilda jami 343,2 mlrd. soʻmlik 81 ta loyihalarni amalga oshirish rejalashtirilgan. Aholining bandlik darajasini oshirish maqsadida 6972 ta yangi ish oʻrinlari yaratiladi. Buning uchun umumiy qiymati 68,7 mlrd. soʻm miqdorida imtiyozli kreditlar ajratiladi. Kichik biznes subʼektlari sonini hozirgidan 3 barobarga oshirish rejalashtirilgan boʻlib, 2022-yilda yangidan 645 ta tadbirkorlik subʼektlari tashkil etiladi.

“Obod qishloq” va “Obod mahalla” dasturlari doirasida joriy yilda “Toʻlqin” ovuli va “Ayoqchi” ahallasida 27,3 mlrd. soʻmlik qurilish va obodonlashtirish ishlari bajariladi.

Prezidentimizning qarori asosida joriy yilda fermer xoʻjaliklarining paxta va gʻalladan qisqartirilgan 897 gektar maydonlarini 3 ming 588 ta dehqon xoʻjaliklari tashkil qilish uchun aholiga berish boʻyicha amaliy ishlar davom etmoqda.

Sayyor qabul davomida 20 nafardan ziyod fuqarolar oʻzlarini qiynayotgan muammolar bilan murojaatlar qildilar. Murojaatlarning asosiy qismi banklardan kreditlar olish, ichki yoʻllarni taʼmirlash, oqar suv taʼminotini hamda kommunal xizmatlar sifatini yaxshilash masalalarida boʻldi.

Sayyor qabulda aholining koʻpgina muammolari shu yerning oʻzida hal etildi, ayrimlarini hal qilish yuzasidan masʼullarga topshiriqlar berilib, ijrosi nazoratga olindi. Hudud faollari tomonidan bildirilgan yoʻl boʻylaridagi simyogʻochlarga tungi yoritgichlar oʻrnatish taklifi yaqin kunlarda amalga oshirilishi maʼlum qilindi.

Davlat idoralarining xalq bilan muloqot qilib, ularning muammolarini hal qilish, dard-u tashvishlarini tinglash boʻyicha amalga oshirilayotgan bu kabi sayyor qabullar xalqimiz turmush farovonligini yanada yuksaltirishga xizmat qilayotgani bilan ham ahamiyatlidir.

Oygul RAJABOVA.