EKSTERRITORIAL TAMOYIL – DAVLAT XIZMATLARI KOʻRSATIShDAGI MUHIM QULAYLIKDIR

Eksterritorial tamoyil fuqarolar, ayniqsa, tadbirkorlar uchun juda katta qulaylik hisoblanadi. Ushbu tamoyilga oʻtish jarayonlari 2019-yilda boshlangan boʻlib, shu yilning oʻzidayoq ushbu tamoyil asosida davlat xizmatlarini koʻrsatish boshlandi.

Eksterritorial tamoyili – bu fuqarolar doimiy yoki vaqtincha roʻyxatdan oʻtgan joyidan va yuridik shaxslar pochta manzilidan, yaʼni joylashgan yeridan qatʼiy nazar, istalgan hududdagi Davlat xizmatlari markazlariga murojaat qilish imkoniyati hisoblanadi.

Prezidentimizning 2021-yil 23-martdagi “Aholi va tadbirkorlik subʼektlariga davlat xizmatlaridan foydalanishda yana qulay sharoitlar yaratish, bu borada byurokratik toʻsiqlarni qisqartirish boʻyicha qoʻshimcha chora-tadbirlar toʻgʻrisida”gi Farmoni qabul qilinishi kelgusida fuqarolarga davlat xizmatlarini koʻrsatishni sifat jihatdan yaxshilashga va osonlashtirishga xizmat qiladi.

Taʼkidlash joizki, undan koʻzlangan asosiy maqsad davlat organlari, mahalliy ijro etuvchi hokimiyat organlari va boshqa davlat tashkilotlarida eskirgan byurokratik tartibotlar ortiqcha qogʻozbozlik, ish faoliyatini tashkil etish uchun muhim boʻlmagan hujjatlarni talab qilish, ovoragarchilik va sansalorliklarga chek qoʻyish boʻldi.

Farmonga koʻra, 2021-yil 1-iyunidan eʼtiboran fuqarolarning doimiy yoki vaqtincha roʻyxatdan oʻtgan joyidan qatʼiy nazar fuqarolik holati dalolatnomalarini qayd etish, nikohlanuvchi shaxslarni tibbiy koʻrikdan oʻtkazish va xorijga chiqish biometrik pasportini rasmiylashtirish eksterritorial tamoyil asosida amalga oshiriladi.

Notarial xizmatlarni amalga oshirish jarayonida ham fuqarolik holati dalolatnoma yozuvlari bilan bogʻliq barcha maʼlumotlar notarial idoralari tomonidan davlat xizmatlari agentligi yoxud fuqarolik holati dalolatnomalarini yozish organlariga murojaat qilmasdan mustaqil ravishda, fuqarolardan ortiqcha maʼlumot talab etmasdan, maxsus elektron axborot tizimi orqali olinadi.

Farmonning 9-bandida 2021-yil 1-iyunidan eʼtiboran fuqarolik holati dalolatnomalarini yozish organlari tomonidan davlat statistika organlariga dalolatnoma yozuvlarining nusxalarini yuborish va hisobotlarni topshirish amaliyoti bekor qilindi. Bunda davlat statistika organlari “FHDYoning yagona elektron arxivi” axborot tizimiga oʻzlarining elektron tizimlarini integratsiya qilgan holda ushbu maʼlumotlarni real vaqt rejimida oladi va statistik maʼlumotlarni shakllantiradi.

Shuni alohida qayd etish kerakki, fuqarolik holati dalolatnomalarini yozish organlari faoliyatining yangi tashkiliy-huquqiy taomillari fuqarolar va yuridik shaxslarning konstitutsiyaviy huquqlarini roʻyobga chiqarish, ularning elektron xizmatlardan samarali foydalanishlarini ragʻbatlantirish imkonini bermoqda. Shu bilan birga idoralararo integratsiyani kuchaytirishda muhim rol oʻynamoqda.

Amudaryo tumanida ham yuqoridagi kabi hujjatlarni eksterritorial tamoyil asosida va qayd qildirish xizmatlari koʻrsatilmoqda. Fuqarolik holati dalolatnomalarini yozish organlari faoliyatiga zamonaviy axborot-kommunikatsiya texnologiyalarining joriy qilinishi aholi manfaatlariga xizmat qilmoqda.

Umida AShIRBOYeVA, Amudaryo tumani FHDYo boʻlimi inspektori.