AYoL BILAN FAROVON VATAN!

Hayotimizning fayzi va koʻrki, oila hamda jamiyat ustuni boʻlgan aziz opa-singillarimizni eʼzozlash, ularning qadr-qimmatini ulugʻlab, hurmat va ehtirom  koʻrsatish xalqimiz uchun eng buyuk qadriyat hisoblanadi. Chunki sevimli ayol-qizlarimiz tufayli hayotimiz hamisha goʻzal va mazmunli, xonadonlarimiz nurafshondir.

Mustaqil Vatanimiz taraqqiyotida hamda jamiyat hayotida xotin-qizlar muhim oʻrin va mavqega ega. Buni biz mamlakatimizning ijtimoiy-siyosiy, iqtisodiy-madaniy hayotidagi barcha sohalarda, xususan, davlat  boshqaruvi va vakillik organlarida, ishlab chiqarish, tadbirkorlik, sogʻliqni saqlash, taʼlim, maʼrifat va maʼnaviyat, agrar va boshqa sohalarda fidoyi ayol-qizlarimiz amalga oshirayotgan olamshumul ishlar, erishayotgan muvaffaqiyatlar misolida yaqqol koʻrib turibmiz.

Bu borada gap ketganda, Prezidentimizning 2021-yildagi “Xotin-qizlarni qoʻllab-quvvatlash, ularning jamiyat hayotidagi faol ishtirokini taʼminlash tizimini yanada takomillashtirish chora-tadbirlari toʻgʻrisida”gi Farmoni xotin-qizlarning siyosiy, iqtisodiy va ijtimoiy huquqlarini himoyalashga, shu barobarida ularning ijtimoiy-siyosiy faolligini kuchaytirish, qobiliyat va salohiyatlarini roʻyobga chiqarish, oila institutini mustahkamlash, onalik va bolalikni muhofaza qilishga qaratilgan chora-tadbirlarni amalga oshirish imkonini bermoqda. 

Xususan, Amudaryo tumanida ham oʻtgan 2021-yil davomida kam taʼminlangan, uy-joyga muhtoj 6 nafar xotin-qizlarga “Ayollar maqsadli jamgʻarmasi” mablagʻlari hisobidan uy-joylarning boshlangʻich badallari toʻlab berildi.

Ogʻir turmush sharoitida yashayotgan 19 nafar xotin-qizlarning 5 nafariga tibbiy yordam koʻrsatildi, 7 nafarining bandligi taʼminlanib, 6 nafari moddiy jihatdan qoʻllab-quvvatlandi. Tadbirkorlik faoliyatini boshlash istagida boʻlgan  1 nafar ayolga kredit olishda koʻmaklashildi.

Hukumat Qaroriga koʻra, “Vaqtinchalik tartib” asosida tumandagi sektorlar kesimida mahallabay tarzda “Ayollar daftari”ga 30 yoshdan oshgan 3697 nafar ayol-qizlar kiritilib, hamkor tashkilotlar bilan birgalikda 842 nafar ayollarning bandligi taʼminlandi, 499 nafar xotin-qiz kasb-hunarga oʻqitildi. Shuningdek, 130 nafar uyda oʻtirgan ayollarga tomorqa xoʻjaligini yuritish boʻyicha amaliy yordam koʻrsatilib, 812 nafar ayollarga oʻz tadbirkorlik faoliyatini yuritishlari uchun 7 mlrd. soʻm miqdorida kredit mablagʻlari ajratildi.

Bundan tashqari, boquvchisini yoʻqotgan oilalar, nogironligi boʻlgan yoki qaramogʻida nogiron farzandlari bor ayollar, ijarada yashovchi hamda psixologik va tibbiy yordamga muhtoj ayol-qizlarning ham roʻyxati shakllantirilib, zarur yordamlar koʻrsatildi.

Xotin-qizlarni qoʻllab-quvvatlash, ular oʻrtasida hunarmandchilikni rivojlantirish maqsadida 1725 nafar ayol-qizlarga “Har bir oila – tadbirkor” dasturi doirasida kredit mablagʻlari ajratilib, ayni paytda ular oʻzlarining issiqxona, tomorqa va dehqon xoʻjaliklari, hunarmandchilik hamda ishlab chiqarish kichik korxonalari, tikuvchilik tsexlari faoliyatini mohirlik bilan boshqarmoqdalar. Alohida qobiliyatli, oilaviy sharoiti kam daromadli boʻlgan xotin-qizlardan 9 nafariga Prezident Qaroriga muvofiq OTMlarga qoʻshimcha grant asosida oʻqishga  qabul qilinishlari uchun tavsiyanomalar berildi.

Tumanimiz va mamlakatimiz ijtimoiy-siyosiy, iqtisodiy-madaniy hamda maʼnaviy hayotida faol ishtirok etayotgan ayol-qizlar orasida nufuzli davlat mukofotlari sohibalari, el-yurt ardogʻiga munosib aziz opa-singillarimiz borligi qalbimizga iftixor bagʻishlaydi. Amudaryolik 3 nafar el-yurt ardogʻidagi munis va muhtarama onaxonlar “Moʻʼtabar ayol” koʻkrak nishoni sohibalari boʻldilar.

Maʼlumki, millatning oʻziga xos maʼnaviyatini shakllantirish va yuksaltirishda, shubhasiz, oilaning, oilada esa ayolning oʻrni va taʼsiri beqiyosdir. Shu bois, mamlakatimizda xotin-qizlarning mavqei har jihatdan yuqori baholanmoqda. Bu muhtaram Prezidentimiz tomonidan 2022-yil 1-mart sanasida imzolangan “Oila va xotin-qizlar davlat qoʻmitasini tashkil etish toʻgʻrisida”gi tarixiy Qarorda oʻz isbotini topgan.

Prezidentimiz raisligida joriy yil 1-mart kuni xotin-qizlarni qoʻllab-quvvatlash tizimini hamda ularning jamiyatdagi mavqeini yanada mustahkamlash masalalari boʻyicha videoselektor yigʻilishida mamlakatimiz xotin-qizlari hayotiga oid barcha muammolar atroflicha muhokama etilib, bu boradagi navbatdagi vazifalar belgilab olindi va Prezident Farmoni bilan endilikda mamlakatimizda Oila va xotin-qizlar davlat qoʻmitasi hamda qoʻmitaning  viloyat tuman (shahar) boshqarmalari faoliyati yoʻlga qoʻyilmoqda.

– Endi har bir mahallada ayollarning dardi bilan yashaydigan tizim boʻladi. Qaysi ayolga nima kerakligi, oʻqishi, davolanishi, bolalari tarbiyasi boʻyicha mening stolimda adolatli raqam boʻladi, – dedi davlatimiz rahbari.

Prezident Farmoni bilan har bir OFY va MFYda joriy etilayotgan xotin-qizlar faoli lavozimining yangidan tashkil etilayotgan tuman oila va xotin-qizlar qoʻmitasi tizimiga oʻtkazilishi esa oila va xotin-qizlar bilan ishlashish, ular hayotiga oid barcha masalalarni aniq va puxta reja asosida amalga oshirish imkonini beradi. Zero, Prezidentimiz taʼkidlanganlariday: “Ona rozi boʻlsa, oila rozi boʻladi, oila rozi boʻlsa, jamiyat rozi boʻladi”.

Barcha zamonlarda, barcha jamiyatlarda Ayolga ehtirom koʻrsatish, uning el-u xalq, millatlar va demakki, avlodlar bardavomligi yoʻlidagi beqiyos katta xizmatlarini eʼtirof etishga oʻta jiddiy munosabatda boʻlishganki, bu hatto ham dunyoviy, ham islomiy qadriyat sifatida bashariyat zimmasidagi yuksak burchdir. Zotan, Ayol borki, olam munavvar, Vatan istiqboli mangu, avlodlar baxtga musharraf, xonadonlar charogʻon, oilalar toʻkis, har bir insonning bagʻri butun. Ana shu butunlik – bahorday yam-yashil, gurkiragan hayot, nafosatga, goʻzallikka oshno koʻngillar mangu boʻlsin!

Aziz va muhtarama, moʻʼtabar onajonlar, qadrli, goʻzal opa-singillar, barchangizga nafosat va goʻzallik ayyomi – 8-mart – Xalqaro xotin-qizlar bayrami qutlugʻ boʻlsin!

Goʻzal SOBIROVA,

tuman Mahalla va oilani qoʻllab-quvvatlash

boʻlimi boshligʻining birinchi oʻrinbosari.