AJDODLARIMIZDAN MEROS HUNARMANDChILIKNI ARDOQLAYoTGANLAR

Hunarmandchilik insonning ishlab chiqarish faoliyati mobaynida vujudga kelib, jamiyat rivojlanishiga monand tarzda takomillashib borgan.

Fan-texnika yuksak taraqqiy etgan hozirgi davrda ham kulolchilik, duradgorlik, temirchilik, miskarlik, binokorlik, oʻymakorlik, kashtachilik, zardoʻzlik, zargarlik kabi koʻplab hunarmandchilik turlari oʻz ahamiyatini yoʻqotgani yoʻq. Ayniqsa xalq hunarmandchiligi keyingi yillarda bozor qoidalari zamirida qayta tiklandi, yangi hunarmandchilik korxonalari ochildi, turli hunarmandchilik mahsulotlari ishlab chiqaruvchilar oʻz faoliyatlarini yakka tadbirkor, oilaviy korxona, kichik korxona tarzida tashkil etishib, turmush farovonligiga oshishiga munosib hissa qoʻshmoqdalar. Shuningdek “Hunarmand” uyushmasiga aʼzo boʻlib, turli mahsulotlar ishlab chiqarayotgan hunarmandlar safi ham kengayib bormoqda.

Mangʻit shahridagi 9-sonli Bolalar musiqa va sanʼat maktabida rassomchilik, haykaltaroshlik sinflariga taʼlim berayotgan qoʻli gul usta Akbar Odilov ana shundaylardan biri. U maktabdagi oʻqituvchilik faoliyati bilan cheklanib qolmay, oʻz qiziqishlariga koʻra, haykaltaroshlik bilan ham shugʻullunadi.

U yasagan turli oʻyinchoqlar, gultuvaklar, har xil bezaklar tumanimizdagi maktabgacha taʼlim tashkilotlarini bezab turibdi. Shuningdek, muhim sanalar munosabati bilan tumanimizda oʻtkaziladigan bayram tantanalari, ommaviy sayllarda u yasagan haykallar maydonga oʻzgacha bezak berib, tadbir ruhini tomoshabinlarga yetkazishga hissa qoʻshadi.

Albatta, Navroʻz bayrami tantanalarida Dehqonbobo va Bahoroy timsoli, Yangi yil tantanalarida Qorbobo, Qorqiz timsollari koʻpchilikka manzur boʻladi. 2013-yilda Kamoliddin Behzod nomidagi Milliy rassomchilik va dizayn institutini tamomlagan yigitning taʼlim muassasasida olgan bilimi, 9-sonli Bolalar musiqa va sanʼat maktabida taʼlim berish jarayonida ustozi, haykaltarosh Bozorboy Xolimbetovdan oʻrgangan tajribalari tufayli u shunday darajaga erishdi.

Akbar Odilov oʻz faoliyatini rivojlantirish maqsadida “Hunarmand” uyushmasiga aʼzo boʻlib, buyurtmalarini oʻz vaqtida mijozlariga yetkazib berishga intiladi.

Uyushmaning yana bir aʼzosi Guliston Ahmedova ikki yilcha vaqtdan beri amerika toli novdasidan turli shakl va hajmdagi savatlarni toʻqib, yurtdoshlarimizga hadya etmoqda. Uyushma tomonidan yetkazib berilgan xom ashyo-novdani endilikda oʻzlari ham yetishtirishni rejalashtirmoqda.

Guliston Ahmedova uy bekasi, ishsiz boʻlsa-da, avval ham bekor oʻtirmasdi. Quroq koʻrpacha, yostiq jildlar tikib, paypoq, qoʻlqoplar toʻqib mijozlariga berar, oilasi daromadiga hissa qoʻshar edi. Keyinchalik farzandlari bilan internatda savat toʻqish jarayonini koʻrib, qiziqib qoldi.

Shu tariqa “Hunarmand” uyushmasi koʻmagi bilan savat toʻqishni ham boshladi. U farzandlari bilan mijozlar talabiga koʻra turli shakl va hajmda savatlarni toʻqib, daromadini oshirayapti. Asosan tugʻilgan kunlarda, toʻylarda dasturxonga meva, shirinliklar, non solib qoʻyish uchun ishlatiladigan savatlarning bozori chaqqon, shu bilan birga mehnati ham mashaqqatli.

Oʻz mehnatlari mahsuli bilan turmushimiz fayziga fayz qoʻshayotgan fidoyi hunarmandlarimiz faoliyatiga rivoj tilaymiz.

Oygul RAJABOVA.