“MILLIY TIKLANISh” DEMOKRATIK PARTIYaSI MUHOFAZA OSTIDAGI MADANIY MEROS OBʼEKTLARINI OʻRGANDI

Oʻzbekiston “Milliy tiklanish” demokratik partiyasining 2025-yilga moʻljallangan ish rejasida muhim vazifalar belgilangan. Bu vazifalar orasida roʻyxatga olinmagan madaniy meros obʼektlarini aniqlash, ularning yoʻqolib ketishining oldini olish, davlat muhofazasini kuchaytirish, ularni davlat yoki YuNESKO roʻyxatiga kiritish boʻyicha takliflar ishlab chiqish hamda bu natijalar asosida doimiy komissiyalar va Kengash sessiyalariga masalalar kiritish, deputat soʻrovlari chiqarish va mansabdor shaxslarning hisobotlarini eshitish boʻyicha ishlar mavjud.

Ushbu vazifalar ijrosini taʼminlash maqsadida Qoraqalpogʻiston Respublikasi Joʻqorgʻi Kengesidagi “Milliy tiklanish” demokratik partiyasi fraktsiyasi aʼzolari, partiya Markaziy Kengashi vakillari, mahalliy Kengashlarga partiyadan saylangan deputatlar, partiya Qoraqalpogʻiston Respublikasi Kengashi xodimlari hamda soha ekspertlaridan iborat ishchi guruhi Amudaryo tumanida joylashgan Chilpiq qalʼa yodgorligi arxeologiya obʼektining bugungi holati, turistik infratuzilmasi va kadastr hujjatlari bilan tanishdi.

QORAQALPOGʻISTONDAGI MADANIY MEROS OBʼEKTLARI

Qoraqalpogʻiston Respublikasida jami 299 ta moddiy madaniy meros obʼekti davlat muhofazasiga olingan. Shulardan:

    131 tasi – arxeologiya obʼektlari;

    24 tasi – arxitektura yodgorliklari;

    99 tasi – monumental sanʼat yodgorliklari;

    45 tasi – diqqatga sazovor joy obʼektlari.

ChILPIQ QALʼANING OʻZIGA XOSLIKLARI

Chilpiq qalʼasi Amudaryo tumanining Qipchoq ovuli hududida joylashgan. Qalʼa devorlarining balandligi 15 metrga yetadi va balandligi 0,8-1,05 metr boʻlgan paxsa (loydan) bloklardan qurilgan. Devorlarning eni yuqorida 2-3 metr, pastki qismida esa 4,8-5,5 metrni tashkil etadi. Devorlarning tashqi yuzalari asosga nisbatan 80 gradusga teng qiyalikka ega. Ichki maydonchaning oʻrta qismida qoya chiqib turadi. Bu qoya va devor orasidagi boʻshliq butun balandligi boʻylab qum va loy bilan toʻldirilgan boʻlib, uning qalinligi gorizontal qatlamlarga boʻlingan. Vertikal boʻylab esa antik oʻlchamdagi (40x40x10-11 sm) gʻishtdan oʻtkirlashtirilgan radial devorlar bilan ajratilgan.

Oʻrganishlar davomida deputatlar arxeologiya merosi obʼektlarini muhofaza qilish va ulardan foydalanish holatini yanada takomillashtirish masalalari boʻyicha asoslantirilgan takliflar berishdi.