BOGʻDORChILIK SOHASIGA OID SEMINAR-TRENING BOʻLIB OʻTDI

2. Mamlakatimizda resurs tejamkor texnologiyalarni, shu jumladan tomchilatib va yomgʻirlatib sugʻorish tizimlari qoʻllangan intensiv bogʻlar maydonlari hajmini oshirish, meva mahsulotlari turlarini koʻpaytirish, shu asosda xalqimizni xavfsiz oziq-ovqat mahsulotlari bilan taʼminlashni yaxshilash boʻyicha tizimli ishlar olib borilmoqda. Shuningdek, tashqi bozorda talab yuqori boʻlgan meva navlarini ekish, yetishtirish, eksport qilish hajmini oshirish ham asosiy vazifalardan qilib belgilangan.

Amudaryo tumanida hozirgi kunda barcha toifadagi bogʻlar 930 gektarni tashkil etadi. Ushbu maydonlardagi eski bogʻlar oʻrnida intensiv bogʻlar yaratilmoqda va hududimizning tuproq-iqlim sharoitimizga mos, hosildor mevalar navlari joylashtirilmoqda.

Joriy yilda ham bu boradagi ishlar davom ettirilib, yangidan 150 gektar maydonda eksportbop mahsulotlar yetishtirishga moʻljallangan bogʻlar barpo etiladi. Shuning 30 gektariga istiqbolli uzum navlari ekiladi.

24-fevral kuni tumanning Choykoʻl ovulida “Qishloq xoʻjalikkimyo” aktsiyadorlik jamiyatiga qarashli 8 gektarlik intensiv bogʻda mevali daraxtlarni agrotexnika qoidalari asosida parvarish qilish, belgilangan meʼyorlar asosida mevalar zararkunandalariga qarshi kurashish va xaridorgir, moʻl mahsulotlar olish yoʻl-yoʻriqlarini targʻib etishga bagʻishlangan seminar-trening boʻlib oʻtdi.

Seminar-trening Prezidentimizning 2021-yil 15-dekabrdagi 52-sonli Qaroriga muvofiq tashkil etilgan Bogʻdorchilik va issiqxona xoʻjaligini rivojlantirish Agentligining tuman loyiha ofisi tomonidan tashkillashtirildi.

Tadbirga tumandagi ushbu loyiha ofisi rahbari Yunusbek Otajanov, bogʻdorchilik sohasi bilan shugʻullanayotganlar, qishloq xoʻjaligi masʼul mutaxassislari hamda bogʻdorchilik sohasiga qiziquvchilar ishtirok etdilar.

Seminar-treningda Germaniyaning GIZ xalqaro tashkiloti, AQShning USAID xalqaro tashkilotining Oʻzbekistondagi vakili Umid Sayfuddinov mevali daraxtlarga ishlov berish, oziqlantirish va zararkunanda hasharotlarga qarshi kurashish yoʻl-yoʻriqlari haqida keng tushunchalar berdi. Shuningdek, koʻchatlarga qanday shakl berish, shoxlarini siyraklatish usullarini amalda koʻrsatib berdi.

Tadbirda ishtirok etgan bogʻbonlar va qishloq xoʻjaligi sohasi xodimlari maʼruzachiga oʻzlarini qiziqtirgan savollarni berib, tegishli javoblar oldilar.

Ushbu tadbir oʻtkazilgan intensiv bogʻ bunyod etilganiga hali koʻp vaqt boʻlmasa-da, olinayotgan hosildorlik avvalgi mavjud bogʻlardan yuqori. Bu – bogʻdorchilikka intensiv texnologiyalarni, ilm-fan yutuqlarini joriy qilish davr talabi ekanligini, mamlakatimizda agrar sohada amalga oshirilayotgan islohotlarning samarasini koʻrsatadi.

Shunisi eʼtiborliki, bugungi kunda ovulda bogʻbonlar, dehqonlar yetishtirgan qishloq xoʻjalik mahsulotlarini saqlashga moʻljallangan 100 tonnalik sigʻimdagi muzlatkichli omborxona ham qurilayapti. “Mangʻit – omad savdo” masʼuliyati cheklangan jamiyati tomonidan bunyod etilayotgan obʼektda hozirgi kunda ishlar qizgʻin davom ettirilayapti.

Seminar-trening sohibkor bogʻbonlarning dehqonchilikka resurs tejamkor texnologiyalarni, shu jumladan tomchilatib va yomgʻirlatib sugʻorish tizimlari jalb qilish, intensiv bogʻlar yaratish, bogʻlarda yetishtiriladigan mevalar turlarini koʻpaytirish orqali oziq-ovqat mahsulotlari yetishtirish hajmini va yerdan olinadigan daromadni oshirish borasidagi bilimlarini yanada oshirishda muhim vosita boʻldi.

Oygul RAJABOVA.