ISSIQXONADAN YILIGA 150-160 TONNA HOSIL OLINMOQDA

Bugungi kunda yurtimizda energiya tejamkor texnologiyalarga asoslangan issiqxona xoʻjaliklarini rivojlantirish hamda qishloq xoʻjaligi mahsulotlarini yetishtirish, eksport hajmlarini oshirishga alohida eʼtibor qaratilmoqda. Oʻlkamizning boshqa hududlarida boʻlgani kabi amudaryoliklar ham bogʻdorchilik, issiqxona xoʻjaliklari tashkil etish, tomchilatib sugʻorish asosida ekinlar parvarishlashni yoʻlga qoʻyib, yerdan unumli foydalanishmoqda. Tumandagi aholining aksar qismi imkoniyatiga qarab issiqxonalar tashkil etib, doimiy daromad manbaiga ega boʻlmoqda.

Amudaryo tumanidagi “Mangʻit Invest plyus” Oʻzbekiston-Xitoy qoʻshma korxonasida tomonidan ham Tosh yop ovulida bir gektarlik hududda issiqxona tashkil qilingan edi. Asosan pomidor, bodring kabi aholining kundalik ehtiyoji uchun zarur boʻladigan sabzavotlarni yetishtirish moʻljallangan mazkur issiqxona 477 ming AQSh dollari miqdoridagi kredit mablagʻi hisobiga zamonaviy uslubda, ilgʻor innovatsion texnologiyalar asosida barpo etilgan.

Elektr energiyasi yordamida isitishga moʻljallangan ushbu issiqxonada qish oylarida ham moʻʼtadil harorat boʻlishi natijasida tekis unib chiqqan sabzavot ekinlari durkun rivojlanib, barvaqt meva tugadi. Issiqxonada yetishtirilayotgan bodring va pomidordan qish, bahor oylari davomida 2-marta hosil olishga erishilmoqda. Bir yil davomida oʻrtacha 150-160 tonna hosil olinib, shundan 50-60 foizi xorijga eksport qilinadi. Qolgani ichki bozorda sotilib, tumanimiz aholisi dasturxoniga tortiq qilinadi.

Issiqxonada 15 nafar ishchi doimiy ish bilan taʼminlangan. Yigʻim-terim mavsumida ishchilar soni yanada koʻpaytiriladi. Korxona tomonidan ishchilar uchun yetarli sharoit yaratilgan. Har kuni tushlik mahalida issiq ovqat yetkazib beriladi.

Bundan bir necha yil muqaddam tadbirkor Jalgʻas Boymuradov rahbarligidagi masʼuliyati cheklangan jamiyati shaklidagi “Mangʻit invest plyus” qoʻshma korxonasi tarkibida bir gektar joyda issiqxona qurish niyati tuman rahbarlari tomonidan qoʻllab-quvvatlanib, unga yer maydoni ajratishda hamda boshqa masalalarda yaqindan yordam koʻrsatilgan edi.

Ushbu issiqxonani tashkil etish mobaynida tadbirkor Xitoylik mutaxassislardan issiqxona tashkil etish boʻyicha chuqur tajriba oʻrgandi. Tadbirkor taʼkidlaganidek, ushbu davlat sabzavot mahsulotlarini eksport qilish hajmi boʻyicha dunyoda birinchi oʻrinda turadi. Xitoy sabzavotchiligi haqida gapirilganda, Shandun yarim orolining Shouguan shahri – Xitoy sabzavotchiligining vatani deb yuritiladi.

Xitoylik mutaxassislar tomonidan tavsiya qilingan issiqxona ashyolari ham Shandun oʻlkasidan olib kelinib, qurilish ishlari amalga oshirildi. Xitoylik mutaxassislarning va qoʻshma korxona ishchilarining astoydil qilgan mehnatlari evaziga ushbu issiqxona 2018-yilning oktyabr oyigacha toʻla qurib bitkazildi va foydalanishga topshirildi.

Hozirgi kunda issiqxonada pomidor, bodring va boshqa ekinlarni parvarishlashda tomchilatib sugʻorish va bargdan oziqlantirish usulidan foydalaniladi. Bu usul isssiqxonada yetishtirilayotgan ekinlar hosildorligini oshirishda muhim oʻrin tutmoqda. Mahsulot yetishtirish quvatiga koʻra tumanda yagona hisoblangan ushbu issiqxonaning tashqi va ichki koʻrinishi, undagi nihollarni koʻrgan kishining koʻzini quvontiradi.

Tadbirkorlar tomonidan amalga oshirilayotgan bu kabi yirik loyihalar avvalo xalqimiz farovonligi, aholi turmush sharoitini yaxshilash, qoʻshimcha ishchi oʻrinlari yaratish va ularning dasturxonlarini toʻkin qilishga xizmat qiladi.

O. Xudoyberganova.