DAVLAT XIZMATLARI KOʻRSATISh INFRATUZILMASINI TAKOMILLAShTIRIShGA ALOHIDA EʼTIBOR QARATILMOQDA

Soʻnggi yillarda mamlakatimizda fuqarolar va tadbirkorlarga davlat xizmatlari koʻrsatish tizimi bosqichma-bosqich isloh qilinib, qulay investitsiyaviy va ishbilarmonlik muhitini yaratish, davlat xizmatlari koʻrsatish sifatini tubdan yaxshilash borasida tizimli chora-tadbirlar amalga oshirilmoqda.

Oʻzbekiston Respublikasi Prezidentining 2021-yil 24-iyul sanasida imzolagan “Davlat xizmatlari koʻrsatish infratuzulmasini takomillashtirish va aholining davlat xizmatlaridan foydalanish imkoniyatlarini kengaytirish chora-tadbirlari toʻgʻrisida”gi farmoni bu boradagi ishlarni yangi bosqichga koʻtarishga xizmat qiladi. Ushbu hujjat aholining ijtimoiy himoyaga muhtoj qatlamlarini qoʻllab-quvvatlash boʻyicha ishlarni jadallashtirish, davlat xizmatlari sifatli koʻrsatilishini taʼminlash, turli toifadagi davlat xizmatlari koʻrsatish tizimini raqamlashtirish jarayonlarini uygʻunlashtirish kabi maqsadlarga yoʻnaltirilgan.

Mazkur hujjat bilan 2021-yil 1-noyabrdan «Ijtimoiy himoya yagona reyestri» axborot tizimida roʻyxatga olingan shaxslarga, shuningdek, I va II guruh nogironligi boʻlgan shaxslarga davlat xizmatlari markazlari va (yoki) Yagona interaktiv davlat xizmatlari portali orqali davlat xizmatlarini koʻrsatishda qonunchilik hujjatlarida belgilangan davlat bojlari, yigʻimlar va boshqa har qanday toʻlovlar boʻyicha 50 foiz miqdorida chegirma qoʻllanilishi belgilangan.

Shu bilan birga davlat xizmatlari markazlari, «Litsenziya» axborot tizimi hamda YaIDXP orqali koʻrsatilayotgan davlat xizmatlari qonunchilik hujjatlarida belgilangan muddatidan uch ish kunidan ortiq vaqtga kechiktirilganda, ariza beruvchilarning murojaatlariga asosan, xizmatdan foydalanish uchun toʻlangan davlat bojlari, yigʻimlar va boshqa har qanday toʻlovlarning 50 foizi ularga bir ish kunida qaytarilishi koʻrsatilgan.

Bunda ariza beruvchiga toʻlovlar Davlat xizmatlari agentligining byudjetdan tashqari jamgʻarmasi mablagʻlari hisobidan qaytarilishi va Davlat xizmatlari agentligi tomonidan davlat xizmatini koʻrsatish muddatini kechiktirgan davlat organi va tashkilotining byudjetdan tashqari va boshqa mablagʻlari hisobidan soʻzsiz tartibda undirib olinishi belgilangan.

Shuningdek, 2022 yil 1 yanvardan qator davlat xizmatlarini koʻrsatishda undiriladigan davlat bojlari, yigʻimlar va boshqa toʻlovlar miqdorlari kamaytirilishi koʻrsatilgan.

Mansur Sadikov, Amudaryo tumani Davlat xizmatlari markazi direktori