Oʻsimliklarni biologik himoya qilish sifati oshadi

Butun dunyo boshidan kechirayotgan murakkab va qaltis vaziyat – koronavirus pandemiyasi agrar sohaning oʻrni va ahamiyati qanchalik muhim ekanligini yaqqol namoyish etmoqda.

Mamlakatimizda mavjud resurs va imkoniyatlarni ishga safarbar etib, ekin ekiladigan maydonlardan oqilona foydalanish evaziga yuqori hosil yetishtirishga erishilmoqda. Bu ham qishloq xoʻjaligida band boʻlganlar moddiy manfaatdorligi oshishiga, ham xalqimiz dasturxoni arzon va xavfsiz oziq-ovqat mahsulotlari bilan toʻkin boʻlishiga zamin yaratmoqda.

Mamlakatimiz Prezidentining “Respublikada oʻsimliklar karantini va himoyasi tizimini tubdan takomillashtirish chora-tadbirlari toʻgʻrisida”gi Farmoni qabul qilinishi qishloq xoʻjaligi mahsulotlari yetishtirishning muhim asoslaridan biri - oʻsimliklarni turli kasalliklardan va zararli hasharotlardan himoya qilish sifatini oshirishga xizmat qilishi bilan ahamiyatlidir.

Farmonga muvofiq Vazirlar Mahkamasi huzuridagi Oʻsimliklar karantini davlat inspektsiyasi negizida Oʻzbekiston Respublikasi oʻsimliklar karantini va himoyasi agentligi tashkil etildi hamda zararli organizmlarga qarshi kurash tadbirlarini amalga oshirishda agronom, fitopatolog, entomolog, xim-biolog boʻlgan mutaxassislarni oʻqitilib, malakasini oshirish orqali oʻsimliklar klinikalari, biolaboratoriyalarga ishga jalb qilinmoqda.

Tumanimizda ushbu agentlikning 10 nafar mutaxassislardan iborat tuman boʻlimi tashkil etilib, oʻz faoliyatini olib bormoqda.

Yaqinda ushbu boʻlim tashabbusi bilan Toʻlqin ovulida faoliyat yuritayotgan “Amu-Toʻlqin bioservis” masʼuliyati cheklangan jamiyatida Prezidentimizning “Respublikada Oʻsimliklar karantini va himoyasi tizimini tubdan takomillashtirish chora-tadbirlari toʻgʻrisida”gi Farmonida belgilab berilgan vazifalarning mazmun-mohiyati va 2022 qishloq xoʻjaligi yilida ekinlardan moʻl hosil olinishiga erishishda amalga oshiriladigan ishlarga bagʻishlangan seminar boʻlib oʻtdi.

Seminarda Oʻzbekiston Respublikasi Oʻsimliklar karantini va himoyasi agentligi tuman boʻlimi mutaxassislari, ovuldagi fermer xoʻjaliklari raislari, tomorqa va issiqxonalar egalari, shuningdek, “Amu-Toʻlqin bioservis” masʼuliyati cheklangan jamiyati xodimlari ishtirok etdilar.

Tadbirda Agentlikning tuman boʻlimi boshligʻi Komiljon Bobojonov 2022-yilda ekinlardan moʻl hosil olinishiga erishishda oʻsimliklarni biologik himoya qilish borasidagi rejalar, ushbu usulning samaralari haqida tushunchalar berdi.

Maʼruzada taʼkidlanganidek, joriy yilda tumanda 13 ming 900 gektar paxta, 2 ta gʻallachilik klasteriga qarashli 6 ming gektar bugʻdoy maydonlarini kasalliklardan va zararli hasharotlardan biologik himoya qilish yuzasidan fermer xoʻjaliklari rahbarlari tumandagi 16 ta biolaboratoriyalar va 2 ta oʻsimliklar klinikalari bilan shartnomalar tuzilgan.

Shuningdek, bundan tashqari tomorqa yerlar va issiqxonalardagi ekinlarga ham biohimoya bilan ishlov berish imkoniyatlari yaratilgan. Bu bilan aholi tomorqalarida ekologik xavfsiz va toza mahsulot yetishtirilishiga zamin yaratiladi.

Seminar ishtirokchilari oʻzlarini qiziqtirgan savollarga mutaxassislardan javoblar oldilar va oʻsimliklarni biologik himoya qilish borasidagi yangiliklardan batafsil xabardor boʻldilar.

Oygul RAJABOVA.