ShIFOKORLAR AHOLI OʻRTASIDA SOGʻLOM TURMUSh TARZINI QOʻLLAB-QUVVATLASh BOʻYIChA TADBIRLAR OʻTKAZIShMOQDA

Mamlakatimizda aholi salomatligini muhofaza qilishda profilaktika ustuvor vazifa sifatida belgilangan. Aholi orasida sogʻlom turmush tarzini keng targʻib qilish, jismoniy faollikni ommalashtirish borasida amalga oshirilayotgan ishlar koʻlamini yanada kengaytirishga alohida eʼtibor qaratilmoqda. Bu boradagi vazifalarni taʼminlashga qaratilgan Prezident Farmon va Qarorlari sohani rivojlantirishda muhim dasturilamal boʻlmoqda.

Amudaryo tumanida ham Tibbiyot birlashmasi shifokorlari, shuningdek, oʻrta tibbiyot xodimlari tomonidan aholi orasida yuqumli va yuqumsiz kasalliklarning oldini olish boʻyicha turli sogʻlomlashtirish tadbirlari oʻtkazilmoqda.

Tibbiyot birlashmasida Aholining sogʻlom turmush tarzini qoʻllab-quvvatlash va jismoniy faolligini oshirish boʻlimi tashkil etilgan boʻlib, ushbu boʻlimda shifokor xodimlar faoliyat yuritib kelmoqda. Aholi salomatligini mustahkamlashga oid aniq chora-tadbirlar ishlab chiqish, sogʻlom turmush tarzini targʻib qilish, zararli odatlarga qarshi kurashish, tibbiy madaniyatni rivojlantirish, jismoniy tarbiya-sogʻlomlashtirish va ommaviy sport harakatini tibbiyot profilaktikasi bilan integratsiyalash, bu borada ommaviy tadbirlarni oʻtkazish ular faoliyatining asosiy yoʻnalishlari etib belgilangan.

Boʻlim xodimlari ishi mahallabay usulda tashkil qilinib, tumanning barcha hududlaridagi oilaviy poliklinka va oilaviy shifokorlik punktlarida salomatlik burchaklari hamda salomatlik maktablari tashkil qilindi. Undan tashqari, aholi oʻrtasida turli tadbirlar tashkil etilib, “Sport salomatlik garovi”, “Jismoniy faollik va ommaviy sport”, “Xonadonlarga eslatma”, “Covid-19ning yuqish yoʻli va profilaktikasi” kabi mavzularda eslatmalar va mikroplakatlar tarqatilib kelinmoqda.

Oʻtgan davr mobaynida “Toza qoʻllar va toʻgʻri nafas olish” aktsiyasi, nafis gimnastika boʻyicha koʻrgazmali chiqishlar, faol yurish tadbirlari tashkil etildi va ularda tibbiyot birlashmasi va mahalla fuqarolari qatnashishdi. “Toʻgʻri ovqatlanish – sogʻlom hayot demakdir” haftaligida tuman boʻyicha salomatlik darslari, uchrashuvlar va davra suhbatlari oʻtkazildi. Maktablarda, mahallalarda, aholi koʻp toʻplanadigan joylarda boʻlib oʻtgan ushbu tadbirlarga imkon boricha turli yoshdagi fuqarolar jalb etildi.

Joriy yil boshida Vatan himoyachilari kuni munosabati bilan tumandagi harbiy qismda ularning oila aʼzolari bilan Covid-19ning yuqishi va uning oldini olish, emlanish, sogʻlom ovqatlanish, jismoniy faollik, shaxsiy gigiyena, zararli odatlar, reproduktiv salomatlik mavzularida davra suhbatlari uyushtirildi. Barcha hududlardagi tibbiyot maskanlarida salomatlik burchaklari hamda salomatlik maktablari faoliyati yoʻlga qoʻyildi. Birlamchi tibbiy-sanitariya yordami muassasalarida 40 va undan katta yoshdagi aholi orasida yuqumli boʻlmagan kasalliklar xavf omillarini aniqlash maqsadida Sogʻliqni saqlash vazirligining tegishli buyrugʻi ijrosi boʻyicha yanvar oyida 4774 nafar 40 yoshdan oshgan fuqarolar skriningdan oʻtkazildi va ularga ommaviy jismoniy faollik, sogʻlom ovqatlanish, shaxsiy gigiyena emlashning ahamiyati boʻyicha tushunchalar berildi.

Haftaning dushananba kunlari “Stressga qarshi kurash kuni”, seshanba kunlari “Tuz va shakarni cheklash kuni” aholi koʻp toʻplanadigan maydon, bozor, xiyobonlarda, korxona va muassasalarda 18 yosh va undan katta yoshdagi aholi orasida antropometrik oʻlchovlar va qisqa savolnoma asosida tadbirlar tashkil kilinib, tegishli tavsiyalar berilmoqda.

“Tamakisiz kun” deb belgilangan chorshanba kunlarida ham aktsiyalar oʻtkazilib, taʼlim muassasalari, korxona va muassasalarda tamakining inson organizmiga zararli taʼsiri boʻyicha tadbirlar oʻtkazilmoqda. Payshanba kunlari “Sogʻlom ovqatlanish kuni” deb nomlanib, mahallalar, korxona-tashkilotlarda koʻrgazmali ravishda sogʻlom ovqatlanish tamoyillari boʻyicha “Salomatlik darslari” tashkil kilinib, ishtirokchilarga tegishli maslahatlar berilmoqda.

“Piyoda yurish” va “Salomatlik” kuni deb belgilangan juma va shanba kunlarida Tibbiyot birlashmasi, oilaviy poliklinika va oilaviy shifokorlik punktlari maydonchalari, markaziy oʻyingohlarda gimnastrada, faol va sportcha yurish tadbirlari tashkil etilib, turli yoshdagi fuqarolar ishtiroki taʼminlanmoqda.

Sogʻlom turmush tarzida odamlar salomatligiga taʼsir koʻrsatuvchi zararli omillar boʻlmasligi, inson ulardan ongli ravishda oʻzini chetga olishi kerak. Bu borada keng tushunchalar berish, tumanimiz aholisining tibbiy madaniyatini yanada oshirish hamda bu boradagi hukumat qarorlari ijrosini, aholi salomatligini taʼminlash tibbiyot xodimlarining asosiy vazifalaridan hisoblanadi.

Jumaboy Yavkashev, TTB Aholining sogʻlom turmush tarzini qoʻllab-quvvatlash va jismoniy faolligini oshirish boʻlimi mudiri.