Qoraqalpogʻiston Respublikasi sektorlari rahbarlari, vazirliklar, muassasa va tashkilot rahbarlarining yoshlar bilan uchrashuvi boʻlib oʻtdi

4-fevral kuni Amudaryo tumanining Qipchoq shaharchasi hududida joylashgan 21-sonli Bolalar musiqa va sanʼat maktabi binosida Qoraqalpogʻiston Respublikasi sektorlari rahbarlari, vazirliklar, muassasa va tashkilot masʼullari hamda tumanimizdagi bir qator idora-tashkilot vakillari va yoshlar ishtirokida onlayn tarzda sayyor qabul oʻtkazildi.

Qabul avvalida Xalq qabulxonalarining doimiy eʼtibor markazida boʻlib kelayotgan dolzarb ijtimoiy masala – nogironligi boʻlgan shaxslarga ijtimoiy yordam koʻrsatish maqsadida imkoniyati cheklangan fuqarolarga nogironlik aravachalar topshirildi.

I guruh nogironligi boʻlgan fuqarolar Sapargul Neʼmatova, Zokirjon Bobojanov, Otabek Shukurullayev va Anvar Ametovlarga nogironlik aravachalari berildi.

Yordamga muhtoj fuqarolarga ijtimoiy koʻmak koʻrsatilishida hokim yordamchilari tomonidan mahallabay va xonadonbay oʻrganish ishlari yoʻlga qoʻyilganligi alohida eʼtiborga molikdir. Hokim yordamchilari oʻzlari biriktirilgan mahallalarda ijtimoiy himoyaga muhtoj fuqarolarning yashash sharoitini oʻrganib amaliy yordam koʻrsatishmoqda.

Sayyor qabulda tumanimizning turli hududlaridan yoshlar ishtirok etishib oʻz muammolari bilan masʼullarga murojaat qilishdi. Uchrashuvda 60 nafardan ortiq yoshlar qatnashib, turli mazmundagi jami 23 ta murojaat kelib tushdi.

Tuman hokimi oʻrinbosari Mahmud Shermetov yoshlarga murojaat qilib, mavjud muammo va takliflar bilan bemalol murojaat qilishlari mumkinligini va albatta har bir murojaat eʼtibordan chetda qolmasligini taʼkidladi.

Shundan soʻng yoshlarning murojaatlari tinglandi.

Tumanimizdagi Bolalar va oʻsmirlar sport maktabida sportning karate turi boʻyicha trener Akmal Rahimov 18-20-fevral kunlari Bishkekda boʻlib oʻtadigan turnirda 4 nafar shogirdining yoʻl xarajatlari qoplab berilishida amaliy yordam soʻrab murojaat qildi. Akmal Rahimovga murojaat albatta koʻrib chiqilib, tez orada ijobiy hal qilinishi maʼlum qilindi.

Bundan tashqari, Beshtom mahallasida istiqomat qiluvchi yosh tadbirkor Asadbek Yusupov, tumanning olis hududida oʻquv markazi ochishda huquqiy va amaliy yordam soʻrab murojaat qildi.

Shuningdek, Beshtom mahallasida istiqomat qiluvchi yoshlardan Azamat Muxtarov oʻz mahallasi hududidagi fermer xoʻjaliklaridan birida 15 gektar maydonda oʻzaro kelishuv asosida dehqonchilik bilan shugʻullanib kelayotganligini, bundan buyogʻiga ushbu yerlarda oʻz chorvachilik faoliyatini boshlash istagi borligini hamda bunda huquqiy yordam berilishini soʻrab murojaat qildi.

Shuningdek, hudud yoshlari va tadbirkorlar asosan bandlik, imtiyozli kredit olish, tikuv mashinasi olishda subsidiya ajratilishi, toʻlov-kontraktning bir qismini toʻlashda koʻmak soʻrab va boshqa masalalarda Qoraqalpogʻiston Respublikasi sektorlari masʼullariga murojaat qildi.

Kelib tushgan murojaatlarning aksariyati joyida hal etilib, ayrimlariga qonuniy tushuntirish berildi. Muddat talab qiluvchi murojaatlar esa, tegishli masʼullar tomonidan oʻrganib chiqilishi maʼlum qilindi.

Shuningdek, cayyor qabulda murojaatlaring hech biri eʼtibordan chetda qolmasligi va har bir murojaat imkon qadar ijobiy yechim topishi taʼkidlandi.

Shundan soʻng yoshlarga, ona Vatanimiz uchun munosib farzand boʻlishga chorlovchi “Temur” badiiy filmi namoyish etildi.

Oʻtkazilayotgan sayyor qabullar xalqimizning uzogʻini yaqin qilib, ularga har tomonlama qulaylik yaratibgina qolmasdan, vatanimiz kelajagi boʻlgan yoshlarning davlat idoralariga boʻlgan ishonchini yanada mustahkamlashga xizmat qiladi.

Tuman hokimligining axborot xizmati