TOMORQA XIZMATINI KOʻRSATISh SIFATINI YaNADA YaXShILASh BOʻYIChA SEMINAR BOʻLIB OʻTDI

Maʼlumki, fermer, dehqon xoʻjaliklari va tomorqa yer egalari faoliyatini tubdan takomillashtirish boʻyicha Prezidentimiz tomonidan bir nechta qarorlar qabul qilingan. Ushbu qaror hujjatlari asosida aholi tomorqalaridan unumli foydalanish, yerga sifatli ishlov berish borasida koʻplab saʼy-harakatlar, tadbirlar amalga oshirilmoqda. Amudaryo tumanida ham tomorqa yer egalari faoliyatiga bagʻishlangan seminarlar tashkil etilimoqda. Bu orqali aholining tomorqadan unumli foydalanish boʻyicha tajribasi yanada oshishiga zamin yaratilmoqda.

2022-yil 11-yanvar kuni “Amudaryo tomorqa xizmat” masʼuliyati cheklangan jamiyati klasteri korxonasida Oʻzbekiston Respublikasi Prezidentining “Tomorqadan foydalanish samaradorligini oshirish, shuningdek, aholining tadbirkorlik tashabbuslarini moliyaviy qoʻllab-quvvatlash boʻyicha qoʻshimcha chora-tadbirlar toʻgʻrisida”gi qarorini targʻib qilish, tomorqa xizmati koʻrsatishda klaster korxonalari faoliyatini yanada rivojlantirish boʻyicha seminar boʻlib oʻtdi.

Seminarda, Oʻzbekiston Fermer, dehqon xoʻjaliklari va tomorqa yer egalarini qullab-quvatlash jamgʻarmasi direktori Toʻlqin Sattarov, Qoraqalpogʻiston Fermer, dehqon xoʻjaliklari va tomorqa yer egalari kengashi raisi Quvonchboy Nurimbetov, Tuman fermerlar kengashi mutaxassislari, tumandagi 49 ta ovul va mahallalarda ish boshlayotgan hokim yordamchilari ishtirok etishdi.

Seminarda aholi tomorqasidan samarali foydalanib, yiliga 2-3-martadan hosil olish, mahsulotlar ishlab chiqarish hajmini kamida 1,5 baravarga koʻpaytirish yuzasidan amalga oshirilgan ishlar va koʻrilgan choralar toʻgʻrisida axborot berildi.

Bu borada, tumandagi “Amudaryo tomorqa xizmat” masʼuliyati cheklangan jamiyati klaster korxonasining faoliyati alohida eʼtirofga loyiqligi taʼkidlandi. Korxona tomonidan Fermerlar kengashi jamgʻarmasi mablagʻlaridan 5 mlrd. soʻm kredit olingan va 12 yoʻnalish boʻyicha tomorqalarga xizmat koʻrsatish faoliyati yoʻlga qoʻyilgan.

Maʼlumot uchun aytib oʻtish joizki, Amudaryo tumanida 39 ming 406 nafar tomorqa yer egalari ixtiyorida 6 ming 652,2 gektar ekin yeri mavjud. Kengash huzuridagi jamgʻarma tomonidan koʻchat sotib olish uchun tadbirkorlik subʼektlari, fermer xoʻjaliklari va “Tomorqa xizmati” masʼuliyati cheklangan jamiyatiga jami 500 mlrd. soʻm mablagʻlar ajratilgan.

Amudaryo tumanidagi Oq oltin ovuli hududida yashovchi fuqaro Yangiboy Qurbaniyazov, Qilichboy ovulida yashovchi Baxtiyor Mangliyev, Bobur ovulida yashovchi Abdurahmon Matsapayev, Choykoʻl ovulida yashovchi Mahmudjon Norboyev, Qoramon mahallasi hududida yashovchi Ataxan Utamuratovlar xonadonlarida sarimsoqpiyoz, piyoz, va boshqa koʻkatlar yetishtirish orqali bir yilda har bir tomorqadan 25-30 mln. soʻm daromad olingan. Tomorqa orqali yuqori daromad olayotgan xonadonlar tajribasi boshqa mahallalarda ham targʻib qilib borilmoqda.

Tumanning Oq oltin, Toʻlqin, Qilichboy, Bobur kabi qator hududlaridagi tomorqa yer egalarining asosiy faoliyat turi issiqxona hisoblanadi. Ushbu yoʻnalishida faoliyat yuritayotgan tomorqa yer egalarining ulushi tumandagi tomorqa yer egalari sonining 5 foizini tashkil etadi. Issiqxonalarda turli sabzavot ekinlari ekilib, tuman aholisining dasturxoni moʻl-koʻl boʻlishiga xissa boʻlib qoʻshilmoqda.

Shu oʻrinda aytib oʻtish joizki, Amudaryo tumanidagi “Amudaryo tomorqa xizmat” masʼuliyati cheklangan jamiyatiga qarashli klaster korxonasi tomonidan “Bir mahalla – bir mahsulot” tamoyili asosida tumandagi Toʻlqin, Oq oltin, Xizr eli, Qipchoq, Qangli ovul va mahallalariga turli xildagi sabzavot ekinlari koʻchatlari yetkazib berilmoqda. Ayni kunlarda havo harorati past boʻlishiga qaramay tomorqa yer egalari oʻz issiqxonalariga sabzavotlar ekib, aholi ehtiyojlarini qondirmoqda.

Xalqimiz tomonidan bejizga, yer boyligi – el boyligi deb aytilmagan. Har bir fuqaro oʻz tomorqasidan unumli foydalansa, oʻz oilasi, yaqinlari va mahalladoshlari dasturxoniga toʻkinlik baxsh etibgina qolmasdan, oilaviy byudjeti uchun ham katta foyda keltirgan boʻladi. Buning uchun esa Amudaryo tumanida barcha shart-sharoitlar yaratilgan.

F.Eshimbetova.