“UMID NIHOLLAR-2022” SPORT MUSOBAQASINING TUMAN BOSQIChI OʻTKAZILMOQDA

Mamlakatimizda oʻquvchi-yoshlar oʻrtasida sportni rivojlantirish, ularni ommaviy ravishda jismoniy tarbiya va sportga jalb qilishga qaratilgan tizimli ishlar amalga oshirilmoqda. Buning natijasida yoshlarimizning sportga boʻlgan qiziqishlari kundan kunga orta borib, ular sogʻlom, irodasi mustahkam, vatanimizning sodiq farzandlari boʻlib voyaga yetmoqda.

Yoshlarda sportga boʻlgan havas va intilishni, jamiyatda sogʻlom turmush tarzi tamoyillarini yanada kuchaytirish, yosh iqtidorli sportchilarni tanlab olish, ularda professional mahorat va koʻnikmalarni rivojlantirish, sport turlari boʻyicha mamlakat terma jamoalariga sport zaxirasini tayyorlash, oʻquvchi va talabalarni sport mashgʻulotlariga uzluksiz jalb etishga qaratilgan sport musobaqalari tizimini yanada takomillashtirish maqsadida 2018-yil 25-oktyabr kuni Vazirlar Mahkamasining qarori qabul qilingan edi.

Mazkur qaror bilan umumiy oʻrta taʼlim maktablari hamda akademik litseylar oʻquvchilari oʻrtasida “Umid nihollari” sport musobaqalarining final bosqichini har uch yilda bir marta Qoraqalpogʻiston Respublikasining Nukus shahrida, viloyat markazlarida hamda Toshkent shahrida oʻtkazish tartibi belgilandi.

Respublikamiz miqyosida umumiy oʻrta taʼlim maktablari hamda akademik litseylar oʻquvchi-yoshlari oʻrtasida “Umid nihollari” sport musobaqalarining hududiy bosqichlari bu yil ham yuqori saviyada oʻtkazilmoqda.  Ishtirokchilar uchun bayram tusini oladigan ushbu musobaqa joriy yilda Amudaryo tumanida ham koʻtarinki ruhda oʻtkazilmoqda.

Shu kungacha ushbu musobaqaning maktablararo, hududiy bosqichlarida sportning 14 ta turi yaʼni futbol, veleybol, basketbol, gandbol, mini futbol, stol tennisi, shaxmat va shashka, badminton, yengil atletika, stritbol, kurash, sport va badiiy gimnastika turlari boʻyicha musobaqalar oʻtkazilib, gʻoliblar aniqlandi. Musobaqalar 1-4, 5-6, 7-8 va 9-11-sinflar oʻquvchilari orasida oʻtkazildi.

Shu yilning 5-6-yanvar kunlarida “Umid nihollari-2022” sport musobaqalarining 8 ta hududlar oʻrtasida hududiy bosqichlari oʻtkazildi va ushbu bosqich gʻoliblari tuman bosqichiga yoʻllanmani qoʻlga kiritishdi. 7-yanvar kuni “Umid nihollari - 2022” sport musobaqasining tuman bosqichiga start berildi. Shu kuni sportning stritbol, stol tennisi va kurash turlari boʻyicha musobaqalar oʻtkazilib, gʻoliblar aniqlandi.

Ushbu musobaqalarda quyi bosqichlarda gʻoliblikka erishgan 600 nafar mahoratli va epchil oʻquvchilar ishtirok etishdi. Shuning 230 nafarini qizlar tashkil qiladi. Musobaqaning gʻolib va sovrindorlari Oʻzbekiston “Yoshlik jismoniy tarbiya va sport jamiyati” Amudaryo tumani hududiy boʻlinmasining diplom va esdalik sovgʻalari bilan taqdirlandi.

“Umid nihollari - 2022” musobaqasining tuman bosqichida oʻzaro bahs olib borib, raqiblaridan ustun kelgan jamoa va oʻquvchilar ushbu sport musobaqasining final, yaʼni Qoraqalpogʻiston Respublika bosqichida qatnashish uchun yoʻllanmani qoʻlga kiritdilar.

Keyingi kunlarda ushbu musobaqaning sportning boshqa turlari boʻyicha tuman bosqichi bahslari davom ettiriladi. Yuqori kayfiyatda, gʻoliblik uchun astoydil intilib maktabi, yashash hududi sport sharafini yuqori koʻtarishga intilayotgan oʻquvchi-yoshlar uchun hayajonli kunlar hali davom etadi.

Sevara Ismoilova.