MINI FUTBOL BOʻYIChA HOKIM KUBOGI MUSOBAQASI OʻTKAZILDI

Jismoniy tarbiya va sportni aholi orasida keng targʻib qilish, sogʻlom turmush tarzini shakllantirish, olis va chekka qishloq-ovullarda sportda iqtidori yuqori boʻlgan yoshlarni erta aniqlash va katta sport sari yetaklash maqsadida yurtimiz boʻylab turli sport musobaqalari oʻtkazilib kelinmoqda.

2021-yil 28-dekabr kuni Amudaryo tumanining Chordara mahallasida joylashgan futbol maydonida sportning mini futbol turi boʻyicha “Hokim kubogi” musobaqasining tuman bosqichi oʻtkazildi. Musobaqani oʻtkazishdan asosiy maqsad, yoshlarning boʻsh vaqtini mazmunli oʻtkazish, davlatimiz rahbari tomonidan ilgari surilgan 5 ta muhim tashabbusni keng targʻib qilishdan iborat. Shuningdek, ikkinchi tashabbus – yoshlarni jismoniy chiniqtirish, sportda qobiliyatini namoyon qilishi uchun zarur sharoitlar yaratishdir.

 Ushbu musobaqaning hududiy bosqichi 27-dekabr kuni Kuyuk koʻpir, Qipchoq, Qilichboy ovullarida va Mangʻit shaxarida oʻtkazilib,har bir hududdan bitta gʻolib boʻlgan komanda tuman bosqichiga yetib kelishgan edi. Yuqori saviyada tashkil etilgan ushbu musobaqada tumanimizdagi 24 mahalladan jami, 192 nafar yoshlar ishtirok etishdi. Musobaqa hakamlar tomonidan odilona boshqarib borildi. Murosasiz kechgan uchrashuvda Boʻston mahallasi jamoasi birinchi, Toʻlqin mahallasi jamoasi ikkinchi, Oʻzbekiston mahallasi jamoasi uchinchi oʻrinni egallashdi. Gʻolib va sovrindorlarga tashkilotchilar tomonidan kubok, medal, diplom va qimmatbaho sovgʻalar topshirildi.

Ushbu musobaqa Amudaryo tumanining Turizm va sportni rivojlantirish boʻlimi, tuman hokimligi, Xalq taʼlim boʻlimi, Mahalla va oilani qoʻllab-quvvatlash boʻlimi, Yoshlar ishlari agentligi tuman boʻlimi, tuman Tibbiyot birlashmasi va Amudaryo tumanining Milliy gvardiya qoʻriqlash hizmati bilan hamkorlikda tashkil etildi.

Albatta, bu kabi musobaqalar yoshlar oʻrtasida jismoniy tarbiya va sportning yanada rivojlanishiga xizmat qiladi. Qolaversa, terma jamoalarimiz uchun iqtidorli sportchilarni saralash vazifasini ham oʻtab beradi. Sport va sogʻliq sinonim soʻzlardir shunday ekan, sportga oid islohotlar takomilga yetkazilayotgan bir vaqtda yoshlarimiz oʻz sogʻligi uchun qolaversa vatanimizni dunyo hamjamiyatidagi obrosini yanada oshirish uchun shijoat bilan harakat qilishlari lozimdir.

Fotima Eshimbetova