AMUDARYo TUMANIDA HAM BIR MARTALIK MODDIY YoRDAM PULLARI TARQATILMOQDA

Joriy yilning 21-dekabr kuni Prezidentimiz tomonidan “Aholining kam taʼminlangan qatlamlarini qoʻllab-quvvatlash va ijtimoiy himoyasini yanada kuchaytirishga oid qoʻshimcha chora-tadbirlar toʻgʻrisida” Qaror qabul qilindi. Ushbu Qarorda yil yakuniga qadar 2021-yil davomida “Temir daftar” roʻyxatida boʻlgan fuqarolar, 18 yoshga toʻlmagan boquvchisini yoʻqotgan yoki 18 yoshgacha nogironlik nafaqasini oluvchi bolalar uchun 800 ming soʻm miqdorida bir martalik moddiy yordam koʻrsatish belgilangan. Ayni kunlarda Respublikamiz boʻylab mutasaddi tashkilot masʼullari tomonidan kam taʼminlangan oilalar uchun ajratilgan mablagʻlarni yil yakuniga qadar oʻz egalariga topshirish choralari qoʻrilmoqda. Amudaryo tumanida yuqoridagi meʼyorlarga toʻgʻri keluvchi 1639 nafar fuqaroga jami, 1 milliard 311 million soʻm miqdorida bir martalik moddiy yordam koʻrsatilishi rejalashtirilgan. 27-dekabr kuni tuman hokimi Sultonboy Yoʻldashev hududlarda boʻlib, Prezidentimiz nomidan bir martalik yordam pullarini topshirdi. Mangʻit shahrining Gulzor mahallasida yashovchi Gulzira Rayimovaning xonadoniga tashrif chogʻida tuman hokimi ushbu oilaga moddiy yordam pullarini topshirdi va oila aʼzolari bilan samimiy suhbat qurib, yashash sharoiti bilan yaqindan tanishdi. Tuman boʻyicha Prezident qarorida belgilangan meyorlarga toʻgʻri keluvchi barcha fuqarolarga yaqin kunlar ichida moddiy yordam pullarini toʻliq topshirish choralari qoʻrilmoqda. Amudaryo tumani hokimligining axborot xizmati