“QOR MALIKASI” OChIQ TURNIRI OʻTKAZILDI

Badiiy gimnastika – olimpia sport turlaridan biri boʻlganligi tufayli unga mamlakatimizda ulkan eʼtibor qaratilmoqda.

Oʻz oldlariga ezgu maqsadlar qoʻyib, yuksak marralarni koʻzlab ushbu nafis sport turi bilan shugʻullanayotgan yoshlar, oʻsmirlarning  mahoratlarini sinovdan oʻtkazib borish maqsadida turli musobaqalar oʻtkazib kelinmoqda.

21 dekbar kuni Amudaryo tumani Bolalar-oʻsmirlar sport maktabida Yangi yil bayrami oldidan sportning badiiy gimnastika turi boʻyicha “Qor malikasi” deb nomlangan ochiq birinchilik oʻtkazildi.

Musobaqada Amudaryo va Beruniy tumanlaridan 50 nafar mahoratli badiiy gimnastikachi qizlar oʻzaro bellashdilar. 1-sonli maktab sport zalida boʻlib oʻtgan musobaqaning ochilishi xuddi  bayram tusini oldi. Ishtirokchilar maktab ostonasida tantanali suratda qarshi olindi. Ular sport zalga yigʻilib boʻlishgach, saf tortdilar.

Bolalar-oʻsmirlar sport maktabi direktori oʻrinbosari Maxsud Kenjayev musobaqa ishtirokchilarini Yangi yil bayrami bilan qutlab, bellashuvlarda omad yor boʻlishini tiladi. Sport maktab uslubchilari Bahrom Soatov, Zokir Yoʻldoshevlar ham barchani umrimizda yangi sahifa ochayotgan Yangi yil bilan qutladilar.

Shundan soʻng musobaqalarga start berildi. Unda 2007-2017-yillar oraligida tugʻilgan yosh gimnastikachi qizlar navbatma-navbat oʻz mahoratlarini namoyish etishdi. Katta yoshdagi qizlar 4 xil - xalqa, lenta, koptok, bulava kabi buyumlarda, kichik yoshdagi qizlar esa buyumsiz, tana harakatlari bilan oʻyin koʻrsatdilar.

Aytish kerakki, Amudaryo tumani Bolalar-oʻsmirlar sport maktabida, umumiy oʻrta taʼlim, maktabgacha taʼlim muassasalarida gimnastika toʻgaraklari tashkil etilgan boʻlib, ularda tajribali murabbiylar yoshlarga bu nafis sport turi mahoratlarini oʻrgatishmoqda.

Badiiy gimnastika toʻgaraklarida shugʻullanib, texnik mahorat va musiqa sadolari ostida murakkab tana harakatlarini turli buyumlardan foydalangan holda ifodali bajarib, kuchi, egiluvchanligi, sakrovchanligi, tezkorligi, muvozanatni tuta bilishi va chidamliligini namoyish etayotgan iqtidorli qizlar safi tobora kengaymoqda.

Ularning sport tayyorgarligidan koʻzlagan asosiy maqsadi – mamlakat birinchiligi, jahon chempionatlarida, nufuzli xalqaro musobaqalarda ishtirok etish va gʻoliblikka erishib, mamlakatimiz va tumanimiz sport sharafini yuksaltirishga hissa qoʻshishdir.

Ochiq birinchilik davomida tajribali badiiy gimnastika murabbiylaridan tuzilgan hakamlar hayʼati aʼzolari ishtirokchilar bajargan mashqlarni odilona baholab bordilar.

Amudaryo tumani Bolalar-oʻsmirlar sport maktabi tomonidan tashkillashtirgan “Qor malikasi” deb nomlangan ochiq birinchilikda gʻolib boʻlgan sportchi qizlar diplom, medal va qimmatbaho sovgʻalar bilan taqdirlandilar.

Ochiq turnir ishtirokchilarni oʻz ustlarida yana ham qunt bilan ishlab, mahoratini oshirib borishga ragʻbatlantirdi, oʻz mashgʻulotlariga nisbatan masʼuliyatni yanada oshirdi.

Oygul RAJABOVA.