Tadbirkorlar va ishbilarmonlar harakati OʻzLiDeP tashkil topganiga 18-yil toʻlishi munosabati bilan tadbirlar oʻtkazildi

Bundan 18-yil muqaddam mamlakatimizdagi eng nufuzli siyosiy partiya – Tadbirkolar va ishbilarmonlar harakati Oʻzbekiston Liberal demokratik partiyasi tashkil etilib, partiya aʼzolari mamlakat siyosiy-iqtisodiy, ijtimoiy-madaniy hayotiga dadillik bilan kirib keldilar. Oʻtgan qisqa fursat – 18-yil davomida partiya tomonidan aholining hayot sifatini oshirish maqsadida nafaqat siyosiy-iqtisodiy, balki ijtimoiy sohalarni rivojlantirishga qaratilgan jiddiy eʼtibor tufayli ilm-fan, taʼlim-tarbiya, sogʻlikni saqlash, madaniyat va sanʼat, ommaviy axborot vositalari, jismoniy tarbiya va sport kabi sohalarning moddiy-texnik bazasi mustahkamlanib, zamon talablari darajasiga yetkazildi, mazkur sohalarda kadrlar salohiyati yuksaldi. Amalga oshirilayotgan islohotlar markazdan tortib to eng olis hududlargacha yetib borib, xalqimiz hayotida aks etmoqda. Yangilanishlar nafasi har bir soha, tarmoq, shahar va tuman, qishloq hamda mahallalarga kirib bordi.

Albatta, Tadbirkorlar va ishbilarmonlar harakati – Oʻzbekiston Liberal demokratik partiyasining vujudga kelishi va mamlakatda yetakchi siyosiy  kuchga aylanishida tom maʼnoda partiyaning koʻp sonli aʼzolari boʻlgan tadbirkorlar va ishbilarmonlarning tutgan oʻrni alohida ahamiyatga ega.

15-noyabr – partiya tashkil topgan kun munosabati bilan Oʻzbekiston Liberal demokratik partiyasi Amudaryo tuman Kengashi tomonidan oʻtkazilgan tadbirlarda bu haqda atroflicha fikrlar bildirilib, partiya aʼzolari tomonidan partiyaning asosiy yetti yoʻnalishidan iborat taraqqiyot strategiyasida adolat va qonun ustuvorligi – xalqchil davlat qurish, inson qadr-qimmatini taʼminlashning eng asosiy va zarur sharti ekanligi, milliy iqtisodiyotni, uning oʻsish surʼatlarini zamon talablari darajasida rivojlantirish eng muhim strategik ahamiyatga ega vazifa ekanligi xalqimiz tomonidan alohida mamnuniyat bilan eʼtirof etilayotgani qayd etildi.

Partiya tashkil topgan kun munosabati bilan partiyaning tuman Kengashi tomonidan amalga oshirilgan ijtimoiy-maʼnaviy ahamiyatga ega tadbirlarda partiya aʼzolari, shu bilan birga aholi vakillari ham ishtirok etishdi.

Xususan, 17-noyabr kuni tashkil etilgan xayriya tadbirida Oʻzbekiston Liberal demokratik partiyasi Amudaryo tuman Kengashi apparat rahbari Madamin Kazakov, partiyaning Amudaryo tuman Kengashi ijrochi kotibi  Fozilbek Qurbonboyev hamda Xalq deputatlari tuman Kengashi deputati Tamara Yusupovalar Yuqori qishloq, Toshqalʼa hamda Beshovul mahallalarida boʻlishib, mazkur hududdagi saylovchilar bilan uchrashdilar.

Deputat, “Tamara tekstil” masʼuliyati cheklangan jamiyati rahbari Tamara Yusupova saylovchilar hayotiga oid muammoli masalalar bilan tanishib, ular tomonidan tushgan savollarga atroflicha javob berdi. Ayrim muammoli masalalarni oʻrganish va tuman Kengashidagi masʼul komissiyalarga soʻrovnoma kiritish maqsadida yon daftariga qayd etib qoʻydi.

Shundan soʻng, deputat hududdagi “Temir daftar” roʻyxatiga kiritilgan oilalarning farzandlariga oʻzi rahbarlik qilayotgan korxona tomonidan tayyorlangan  issiq kiyim-kechaklar sovgʻa qildi.

Oʻzbekiston Liberal demokratik partiyasi tashkil topganiga 18-yil toʻlishi munosabati bilan tumanimizdagi oʻquv maskanlarida, jamoat tashkilotlarida ham ijtimoiy-maʼnaviy ahamiyatga molik tadbirlar oʻtkazildi.

Robiya YOʻLDOShEVA.