Тадбиркорлар ва ишбилармонлар ҳаракати ЎзЛиДеП ташкил топганига 18 йил тўлиши муносабати билан тадбирлар ўтказилди

Бундан 18 йил муқаддам мамлакатимиздаги энг нуфузли сиёсий партия – Тадбирколар ва ишбилармонлар ҳаракати Ўзбекистон Либерал демократик партияси ташкил этилиб, партия аъзолари мамлакат сиёсий-иқтисодий, ижтимоий-маданий ҳаётига дадиллик билан кириб келдилар. Ўтган қисқа фурсат – 18 йил давомида партия томонидан аҳолининг ҳаёт сифатини ошириш мақсадида нафақат сиёсий-иқтисодий, балки ижтимоий соҳаларни ривожлантиришга қаратилган жиддий эътибор туфайли илм-фан, таълим-тарбия, соғликни сақлаш, маданият ва санъат, оммавий ахборот воситалари, жисмоний тарбия ва спорт каби соҳаларнинг моддий-техник базаси мустаҳкамланиб, замон талаблари даражасига етказилди, мазкур соҳаларда кадрлар салоҳияти юксалди. Амалга оширилаётган ислоҳотлар марказдан тортиб то энг олис ҳудудларгача етиб бориб, халқимиз ҳаётида акс этмоқда. Янгиланишлар нафаси ҳар бир соҳа, тармоқ, шаҳар ва туман, қишлоқ ҳамда маҳаллаларга кириб борди.

Албатта, Тадбиркорлар ва ишбилармонлар ҳаракати – Ўзбекистон Либерал демократик партиясининг вужудга келиши ва мамлакатда етакчи сиёсий  кучга айланишида том маънода партиянинг кўп сонли аъзолари бўлган тадбиркорлар ва ишбилармонларнинг тутган ўрни алоҳида аҳамиятга эга.

15 ноябрь – партия ташкил топган кун муносабати билан Ўзбекистон Либерал демократик партияси Амударё туман Кенгаши томонидан ўтказилган тадбирларда бу ҳақда атрофлича фикрлар билдирилиб, партия аъзолари томонидан партиянинг асосий етти йўналишидан иборат тараққиёт стратегиясида адолат ва қонун устуворлиги – халқчил давлат қуриш, инсон қадр-қимматини таъминлашнинг энг асосий ва зарур шарти эканлиги, миллий иқтисодиётни, унинг ўсиш суръатларини замон талаблари даражасида ривожлантириш энг муҳим стратегик аҳамиятга эга вазифа эканлиги халқимиз томонидан алоҳида мамнуният билан эътироф этилаётгани қайд этилди.

Партия ташкил топган кун муносабати билан партиянинг туман Кенгаши томонидан амалга оширилган ижтимоий-маънавий аҳамиятга эга тадбирларда партия аъзолари, шу билан бирга аҳоли вакиллари ҳам иштирок этишди.

Хусусан, 17 ноябрь куни ташкил этилган хайрия тадбирида Ўзбекистон Либерал демократик партияси Амударё туман Кенгаши аппарат раҳбари Мадамин Казаков, партиянинг Амударё туман Кенгаши ижрочи котиби  Фозилбек Қурбонбоев ҳамда Халқ депутатлари туман Кенгаши депутати Тамара Юсуповалар Юқори қишлоқ, Тошқалъа ҳамда Бешовул маҳаллаларида бўлишиб, мазкур ҳудуддаги сайловчилар билан учрашдилар.

Депутат, “Тамара текстиль” масъулияти чекланган жамияти раҳбари Тамара Юсупова сайловчилар ҳаётига оид муаммоли масалалар билан танишиб, улар томонидан тушган саволларга атрофлича жавоб берди. Айрим муаммоли масалаларни ўрганиш ва туман Кенгашидаги масъул комиссияларга сўровнома киритиш мақсадида ён дафтарига қайд этиб қўйди.

Шундан сўнг, депутат ҳудуддаги “Темир дафтар” рўйхатига киритилган оилаларнинг фарзандларига ўзи раҳбарлик қилаётган корхона томонидан тайёрланган  иссиқ кийим-кечаклар совға қилди.

Ўзбекистон Либерал демократик партияси ташкил топганига 18 йил тўлиши муносабати билан туманимиздаги ўқув масканларида, жамоат ташкилотларида ҳам ижтимоий-маънавий аҳамиятга молик тадбирлар ўтказилди.

Робия ЙЎЛДОШЕВА.