Oʻzbekiston Respublikasi Moliya vaziri oʻrinbosari Dilshod Sultonov ishtirokida yigʻilish boʻlib oʻtdi

Joriy yilning 8-noyabr kuni Amudaryo tumani hokimligining majlislar zalida Oʻzbekiston Respublikasi Moliya vaziri oʻrinbosari Dilshod Sultonov hamda Qoraqalpogʻiston Respublikasi Moliya vaziri Mahmudjon Sodiqovlar ishtirokida yigʻilish boʻlib oʻtdi.

Yigʻilishda tuman hokimi Sultonboy Yoʻldashev, tumandan saylangan Qoraqalpogʻiston Respublikasi Joʻqorgʻi Kengesi deputatlari, tuman Kengashi deputatlari, sektorlar rahbarlari, hokim oʻrinbosarlari, tegishli korxona va tashkilotlar rahbarlari hamda ommaviy axborot vositalari vakillari qatnashdilar. Yigʻilishni tuman hokimi Sultonboy Yoʻldashev ochdi hamda olib bordi.

Mazkur yigʻilish kun tartibida 2022-yil byudjet parametrlari moʻljallari muhokamasi toʻgʻrisidagi masala muhokama etilib, mavzu yuzasidan masʼullarning maʼruzalari, yigʻilish ishtirokchilarining fikr-mulohazalari tinglandi hamda savollarga javoblar berildi.

Kun tartibidagi masala yuzasidan Oʻzbekiston Respublikasi Moliya vaziri oʻrinbosari Dilshod Sultonov soʻzga chiqib, 2021-yilning 11-noyabr sanasida davlatimiz rahbari ishtirokida 2022-yil uchun soliq tushumlari hamda byudjet parametrlari yuzasidan oʻtkazilgan yigʻilishda bu borada amalga oshirilishi lozim boʻlgan ustuvor vazifalar belgilab berilgani xususida toʻxtaldi.

Taʼkidlanishicha, muhtaram Prezidentimiz tashabbusi bilan mamlakatimizda inson qadrini ulugʻlash, odamlar hayotini yaxshilash eng asosiy tamoyillar sifatida belgilanib, ular byudjetni shakllantirishda ham bosh mezon boʻlishi, shu bois kelgusi yilga moʻljallangan davlat byudjeti loyihasida, avvalo, ijtimoiy yoʻnalishlarga katta eʼtibor qaratilgan.

Xususan, taʼlim va tibbiyot tizimiga katta mablagʻ ajratilishi koʻzda tutilgan boʻlib, ushbu sohalarda 55 ta yangi dasturlar amalga oshirilishi belgilangan. Jumladan, chekka joylarda 1 ming 600 ta bolalar bogʻchasi tashkil etish, Milliy taʼlim dasturi doirasida 40 ta yangi maktab qurish va 235 tasini taʼmirlash, darsliklarni yangilash hamda kompyuter sinflari ochish kabi koʻplab chora-tadbirlar moʻljallangan.

Yigʻilishda Qoraqalpogʻiston Respublikasi Moliya vaziri Mahmudjon Sodiqov soʻzga chiqib, davlat byudjeti loyihasida hududlar infratuzilmasini yaxshilash masalalariga ham keng oʻrin berilganligi, uy-joylar va ijtimoiy obʼektlar qurish, mahallalarni obod etish chora-tadbirlari uchun katta mablagʻlar ajratilishi rejalashtirilganligi xususida toʻxtaldi.  

Qoraqalpogʻiston Respublikasi Moliya vaziri Mahmudjon Sodikov rejalashtirilayotgan mablagʻlarni tartibli, samarali tarzda joy-joyiga yetkazish lozimligi, shu maqsadda har bir dastur boʻyicha ajratiladigan mablagʻlarni maqsadli koʻrsatkichlar bilan bogʻlagan holda, elektron nazorat tizimi joriy etilishi koʻzlanayotgani, byudjet tizimida moliyaviy nazorat kuchaytirilayotgani, temir intizom bilan davlat xaridlari tizimida oshkoralikni taʼminlashga alohida eʼtibor qaratilayotganini taʼkidladi.

Yigʻilishda mavzu yuzasidan deputatlar hamda ishtirokchilar tomonidan qator savollar yoʻllandi. Masʼullar savollarga tegishlicha javoblar keltirdilar.

Tuman hokimligining Axborot xizmati.