“XAVFSIZ TUN” REYD TADBIRI OʻTKAZILDI

Tinch osoyishta hayot tarzi biz bilan bir davrda  yashayotgan necha-necha millionlab insonlarning orzusi, desak adashmaymiz. Toʻyib ovqat yeyishga imkoni yoʻq, yupun, boshpanasiz odamlar, yomgʻirday yogʻilayotgan oʻqlardan, portlashlardan dahshat ichida yashayotganlar, biror kuni osoyishta kechmayotganlar juda koʻpchilik.

Shular haqida oʻylaganimizda barcha brtdoshlarimiz oʻz oilasi bagʻrida emin-erkin, baxtiyor, farovon yashayotganidan, oilalar obodligi, uning zamirida yurtimiz obodligi, tinch-osoyishtaligidan koʻnglimiz togʻday koʻtariladi, ertagi kunga ishonchimiz yanada mustahkamlanadi. Beixtiyor tilimizga shukrona keladi. Shu barobarida chor-atrofga ochiq koʻz bilan teran nazar tashlash, hushyor va ogoh boʻlish lozimligini anglaymiz. Dunyoni qaysiki burchagida urush-nizolar, buzgʻunchiliklar, yovuz niyatli kuchlar mavjud ekan, ulardan shu aziz Vatanimizni koʻz qorachigʻiday asrash, himoya  qilish masʼuliyati zimmamizda boʻladi. Yana shunisi ham borki, bugungiday dorilomon kunlarning qadriga yetmay, toʻqlikka shoʻxlik qilayotganlar, amaldagi meʼyoriy qonun-qoidalarni mensimaydigan, boʻysungisi kelmaydigan, noqonuniy faoliyat bilan shugʻullanayotganlar ham jamiyatimizda uchrab turadi.

Shularni inobatga olgan holda tumanimizda shu yilning 2-noyabrida Oʻzbekiston Respublika Ichki ishlar vazirligining, Qoraqalpogʻiston respublikasi Ichki ishlar vazirligining koʻrsatmalariga asosan, aholining tinchlik-osoyishtaligini himoya qilish, jinoyatchilik va huquqbuzarliklarga qarshi kurashish maqsadida “Xavfsiz tun” reyd tadbiri oʻtkazildi.

Ushbu tadbirga tuman Ichki ishlar boʻlimi, Milliy gvardiya tuman Qoʻriqlash boʻlimi, tuman Davlat  soliq inspektsiyasi, “Fidokor yoshlar” uyushmasi, Qoraqalpogʻiston Respublikasi Ichki ishlar vazirligi yoʻl harakati xavfsizligi boshqarmasi 2-safarbarlik guruhi Yoʻl patrul xizmati inspektorlari, Ichki ishlar vazirligi AVBSO xodimlari va jamoat tashkilotlaridan jami 99 nafar xodimlar tumanimizda 6 ta maʼmuriy hududga boʻlingan holda 5 ta yoʻnalishda ish olib bordilar. Ular jamoat joylari, savdo obʼektlari, koʻngilochar joylarda va umumiy ovqatlanish shahobchalarida jamoat tartibining saqlanishi, aholiga xizmat koʻrsatishda belgilangan qoidalarga rioya qilinishi, shuningdek, osoyishtalikka rahna solishi mumkin boʻlgan holatlarni aniqlash yuzasidan tekshiruvlar olib bordilar, noqonuniy holatlarga yoʻl qoʻymaslik, karantin qoidalariga rioya qilish lozimligi yuzasidan tushuntirish va tavsiyalar berdilar.

Mangʻit shahrida oʻtkazilgan reyd tadbirlari davomida Tadbirkorlar koʻchasi 106-uyda bir guruh shaxslar tavakkalchilikka asoslangan qimor oʻyini oʻynab oʻtirgan holat aniqlanib, ulardan 968000 soʻm pullar daliliy ashyo sifatida olindi. Qimor oʻyini ishtirokchisi Ch.Q.ning choʻntagida oʻtkir tigʻli oshxona pichogʻi borligi aniqlandi.

Bundan tashqari, tungi soat 23:00lardan soʻng Mangʻit shahri hududidagi koʻngilochar maskanlar nazorat qilinganida 3 nafar voyaga yetmagan bolalar bilyard oʻynayotganligi  aniqlandi va shu vaqtning oʻzida maskan egasiga voyaga yetmaganlarning tungi vaqtda oʻynashlariga yoʻl qoʻygani uchun Maʼmuriy javobgarlik toʻgʻrisidagi Kodeksning tegishli moddalariga asosan bayonnoma rasmiylashtirildi. Shuningdek, shahar koʻchalarida spirtli ichimlik ichib, mast holda shovqin koʻtarib, aholi  tinchligini buzib yurgan ikki nafar fuqaro aniqlandi. Ular xodimlarning qonuniy talablarini bajarmaganlari uchun tuman Ichki ishlar boʻlimi binosiga olib kelinib, hujjatlar rasmiylashtirildi.

Reyd tadbirida 11 nafar Yoʻl patrul xizmati xodimlari yoʻllarda avtotransportda harakatlanishda 98 ta qoidabuzarliklarni aniqlashdi. Shuning 3 tasi mast holda transport vositasini boshqarish, 27 tasi tegishli hujjatlarga ega boʻlmay transport boshqarish, 68 tasi turli yoʻl harakati qoidalariga amal qilmay transport boshqarish holatlaridir.

Jamoat tartibini saqlash, fuqarolar xavfsizligini taʼminlash, huquqbuzarlik va jinoyatchilikning oldini olishga qaratilgan tadbir tumanimizda koʻpgina koʻngilsizliklarning oldini olishga xizmat qilgani bilan ahamiyatli boʻldi.

Orifjon Qosimov, Amudaryo tumani IIB HPB boshligʻi