Kuyuk koʻpir hamda Nazarxon ovullarida mavjud ijtimoiy-iqtisodiy va maishiy muammolar bartaraf qilinmoqda

Soʻnggi yillarda mamlakatimizda hududlarni kompleks ijtimoiy-iqtisodiy rivojlantirish, aholining yashash sharoitlarini tubdan yaxshilash, turmush darajasida sezilarli ijobiy oʻzgarishlarga erishish boʻyicha izchil chora-tadbirlar amalga oshirilmoqda. Ushbu maqsadda hududlarni sektorlarga boʻlib ishni tashkil etish tizimining joriy etilganligi xalq bilan manzilli muloqotning yoʻlga qoʻyilishiga imkon yaratdi.

Qisqa davr mobaynida mamlakatni jadal ijtimoiy-iqtisodiy va ijtimoiy-siyosiy rivojlantirish, birinchi navbatda, qishloq joylarida aholi uchun munosib hayot sharoitlarini yaratish, shuningdek, islohotlarni amalga oshirishda fuqarolarning bunyodkorlik salohiyatini roʻyobga chiqarishga qaratilgan qator muhim davlat va hududiy dasturlar, qonun hujjatlari qabul qilindi.

Amalga oshirilgan bu kabi keng koʻlamli islohotlarning davomi sifatida davlatimiz rahbari tashabbusi bilan butun mamlakatimiz boʻylab hududlarda ijtimoiy-iqtisodiy va maishiy muammolari mavjud boʻlgan fuqarolar yigʻinlari aniqlanib, ularni bartaraf qilish boʻyicha aniq vazifalar belgilab berildi.

Xususan, Amudaryo tumanidagi Kuyuk koʻpir hamda Nazarxon ovullari ijtimoiy-iqtisodiy va maishiy muammolar mavjud boʻlgan hududlar sifatida topilib, ulardagi kamchiliklarni tuzatish maqsadida qurilish-taʼmirlash va obodonlashtirish ishlari amalga oshirilmoqda.

Jumladan, har ikkala ovul hududida quvvati 400 kilovatt boʻlgan 5 ta transformator punktlarini oʻrnatish, elektr tayanch ustunlarini yangidan oʻrnatish, yangi elektr liniyalarini tortish, ichki yoʻllarga tosh-shagʻal aralashmasini yotqizish, piyodalar yoʻlakchasini qurish, tungi yoritgich chiroqlarini oʻrnatish ishlari belgilanib, ularni amalga oshirish boʻyicha tizimli ishlar qilinmoqda.

Xususan, Kuyuk koʻpir hamda Nazarxon ovullarida joriy yilning sentyabr oyi holatiga transformator punktlari olib kelinib, ularni oʻrnatish ishlari boshlab yuborildi, elektr tayanch ustunlari oʻrnatilishi ovullardagi belgilangan hududlarga olib borilmoqda hamda elektr tarmoqlarini tortish ishlari bajarilmoqda.

Nazarxon ovulida 2 ta aholi punktiga tozalangan ichimlik suvi inshootini qurish, ichki yoʻllarga tosh-shagʻal aralashmasini yotqizish, piyodalar yoʻlakchasini qurish, tungi yortigich chiroqlarini oʻrnatish, hududdagi 58-sonli maktab binosini mukammal taʼmirlash, mazkur maktab va 66-sonli maktab binolarini mebel jihozlar bilan taʼminlash, 3-sonli maktabga sunʼiy qoplamali mini futbol maydonchasini qurish ishlari ayni kunlarda jadal surʼatlarda olib borilmoqda.

Shu kungacha 3 ta koʻchaning tuproq ishlari yakunlanib, 1,5 km qismiga tosh-shagʻal aralashmasi yotqizildi. Pudratchi tashkilot tomonidan piyodalar yoʻlakchasining 680 metr qismiga beton quyildi. Rejadagi tungi koʻcha yoritish chiroqlari 100 foiz oʻrnatildi.

58-sonli maktabda isitish tizimi toʻliq qurib bitkazildi. Polga kafel yotqizish, ichki va tashqi pardozlash ishlari sifatli tarzda bajarilmoqda. 3-sonli maktabda futbol maydonchasi qurilishi belgilangan hududga qurilish materiallari olib borilib, beton quyish ishlari bajarilmoqda.

Kuyuk koʻpir ovuli hududidagi 5 ta koʻchaga 1,7 km uzunlikda tosh-shagʻal yotqizilib, hozirda koʻchalarga yotqizilgan tosh-shagʻal materiallari maxsus texnika yordamida tekislanmoqda. Koʻchalarga tungi yoritish chiroqlarini oʻrnatish ishlari tuman Obodonlashtirish boshqarmasi tomonidan olib borilmoqda.

Ovulda joylashgan 19-sonli maktabgacha taʼlim tashkiloti binosida tashqi suvoq ishlari va ichki pardozlash ishlari bajarilmoqda, deraza va eshiklar yangidan oʻrnatilmoqda.

Shu kungacha ovul hududdagi 5 ta koʻchaga 1,7 km uzunlikda tosh shagʻal aralashmasi yotqizildi. Xozirda koʻchalarga yotqizilgan tosh-shagʻal materiallari maxsus texnika yordamida tekislanmoqda. Ovul hududidagi yoʻllar yonida 1,4 km uzunlikdagi piyodalar yoʻlakchasi qurib bitkazilib, beton qoplamasi toʻshaldi.

Tuman Obodonlashtirish boshqarmasi tomonidan Ovulning markaziy koʻchalari boʻyida tungi yoritish chiroqlarini oʻrnatish ishlari olib borilmoqda.

Joriy taʼmirlanishi koʻzda tutilgan 19-sonli maktabgacha taʼlim tashkiloti binosida tashqi suvoq ishlari va ichki pardozlash ishlari bajarilmoqda, deraza va eshiklar yangidan oʻrnatilmoqda.

Aytish kerakki, mamlakatimizda islohotlarning yangi bosqichida hududlarni kompleks ijtimoiy-iqtisodiy rivojlantirish milliy iqtisodiyotimizning izchil yuqori oʻsish surʼatlarini taʼminlash hamda aholi turmush darajasini oshirishning muhim omili sifatida qaralmoqda. Yangi qabul qilingan dasturga muvofiq Qoraqalpogʻiston Respublikasi hududida ijtimoiy-iqtisodiy va maishiy muammolar mavjud boʻlgan jami 21 ta ovul va mahallalarda keng koʻlamli qurilish va obodonlashtirish ishlari olib borilmoqda.

Amalga oshirilayotgan bu kabi ishlar mazkur hududlarda yashovchi aholiga qulay sharoitlar yaratish, ovul va mahallalardagi ijtimoiy-iqtisodiy va maishiy muammolarni bartaraf qilish, pirovardida esa aholining davlatdan rozi boʻlib yashashiga xizmat qilishi shubhasiz.

Tuman hokimligining Axborot xizmati.