BOTULIZM KASALLIGINING OLDINI OLISh BOʻYIChA MAXSUS TAKTIK OʻQUV MAShQI OʻTKAZILDI

Botulizm – ogʻir asoratlarni keltirib chiqaruvchi xavfli kasalliklardan biri hisoblanadi. Ushbu kasallik oqibatida ommaviy zaharlanishlar sodir boʻlib, koʻp hollarda fuqarolarning oʻlimiga sabab boʻladi. Shu bois botulizm kelib chiqishining oldini olish maqsadida tushuntirish-targʻibot tadbirlari muntazam ravishda tashkil etilib boriladi.

Amudaryo tumanida ham shu maqsadda Favqulodda vaziyatlar boʻlimi tomonidan “Ovqatdan ommaviy zaharlanishlar – botulizm kasalligini oldini olishda FVDT tegishli xizmatlarining hamkorlikdagi harakatlari” mavzusida maxsus taktik oʻquv mashgʻuloti oʻtkazildi.

Joriy yilning 4-oktyabr kuni boʻlib oʻtgan mazkur oʻquv mashgʻuloti Qoraqalpogʻiston Respublikasi Vazirlar Kengashining Raisi – Fuqaro muhofazasi boshligʻining “Qoraqalpogʻiston Respublikasi aholisi va hududlarini radiatsion, kimyoviy va tibbiy-biologik muhofaza qilish bilan bogʻliq favqulodda vaziyatlar profilaktikasi boʻyicha koʻrgazmali maxsus-taktik oʻquv mashqlarini oʻtkazish toʻgʻrisida”gi buyrugʻiga asosan tashkil etildi.

Dastlab tuman Tibbiyot birlashmasida seminar oʻtkazildi. Tadbirga hamkor tashkilotlardan 44 nafar kishi jalb qilindi. Seminarni Tibbiyot birlashmasining yuqumli kasalliklar boʻlimi shifokori Farhod Qoʻshmanov ochib berdi. Shundan soʻng, botulizm  kasalligi haqida maʼruza qildi. Kasallikning qanday belgilar bilan paydo boʻlishi va uni davolash usullari toʻgʻrisida tushunchalar berib oʻtdi. Seminar davomida Sanitariya epidemiologiya osoyishtalik va jamoat salomatligi tuman boʻlimi shifokori Durbek Bobojonov ham soʻzga chiqib, botulizm kasalligining kelib chiqish sabablari, uning asoratlari va oldini olish usullari toʻgʻrisida hayotiy misollar asosida tushunchalar berdi.

Seminarda tuman Favqulodda vaziyatlar boʻlimi Favqulodda vaziyatlarning oldini olish va ularni bartaraf etish hududiy davlat quyi tizimi va fuqaro muhofazasi faoliyatini tashkil etish xavfsizlik targʻiboti boʻlinmasi boshligʻi Bekzod Tajiboyev ham maʼruza qildi. U oʻz maʼruzasida yil davomida aholi orasida ovqatdan zaharlanish bilan murojaat etgan bemorlar, ayniqsa, ular orasida voyaga yetmagan yoshlarning koʻpchilikni tashkil qilishi, bozorlardagi konserva mahsulotlarini xarid qilishda eʼtibor qaratish kerak boʻlgan jihatlar xususida maʼlumot berdi. Shuningdek, uyda qoʻlbola usulda tayyorlanadigan tuzlangan pomidor va bodringlarni saqlash, isteʼmol qilishdan oldin suvi, taʼmi va hidi oʻzgarmaganligi, oʻzgargan mahsulotlarni isteʼmol qilmaslik kerakligini aholiga keng tushuntirib borish lozimligini alohida taʼkidladi. Shundan soʻng, oʻquv mashqi ishtirokchilariga mavzuga oid eslatmalar tarqatildi.

Oʻquv mashqining amaliy qismida bozordagi qoʻlbola usulda tayyorlangan tuzlangan mahsulotlar xarid qilib, uyiga olib borgan, isteʼmol qilgan fuqaroga yordam koʻrsatish tartibi koʻrsatib berildi. Mashq davomida fuqaro oʻzini yomon his qilib, tez tibbiy yordam chaqirdi. U botulizm kasalligiga gumon qilinib, tuman Tibbiyot birlashmasiga olib ketildi va tibbiy muolaja qilindi. Mashgʻulot davomida Sanitariya epidemiologiya osoyishtalik va jamoat salomatligi tuman boʻlimi xodimlari voqea joyini oʻrganishdi. Qoʻlbola usulda tayyorlangan tuzlangan mahsulotlardan namunalar olib, laboratoriyada tekshirishdi. Bozordagi tadbirkorlar, sotuvchilar bilan profilaktik suhbatlar olib borib, eslatmalar tarqatishdi.

Oʻquv mashqi 57 nafar shaxsiy tarkib va 2 ta maxsus texnikalar ishtirokida oʻtkazildi va tuman favqulodda vaziyatlar davlat qutqaruv tizimi xizmatlariga cheklangan tayyor deb baholandi.

H.MATYoQUBOV, tuman FVB boshligʻi podpolkovnik.