Jismoniy shaxslarga YaTT sifatida taksichilik qilishga ruxsat berildi

Prezident Shavkat Mirziyoyev avtomobilda yoʻlovchi tashish faoliyatini tartibga solishga oid qaror imzoladi.

Qaror bilan, 2022-yil 31-dekabrgacha muddatga eksperiment tariqasida yakka tartibdagi tadbirkorlarga 4 ta oʻrindiqli yengil avtotransportda yoʻlovchi tashish faoliyati bilan shugʻullanish huquqi berilmoqda.

Bunda quyidagi asosiy talablar qoʻyilgan:

haydovchi 21 yoshga toʻlgan, avtomobil esa ishlab chiqarilganiga 10-yildan oshmagan boʻlishi;
avtomobil texnik xizmat koʻrsatish stantsiyalarida har 6 oyda kamida bir marotaba texnik koʻrikdan oʻtkazilishi;
haydovchi xususiy klinikalarda yoki oilaviy poliklinikalarda oylik tibbiy koʻrikdan oʻtishi lozim.

2021-yil 1-sentyabrdan boshlab, YaTT sifatida taksi faoliyati bilan shugʻullanish faqatgina mijozlarni izlash boʻyicha interaktiv xizmat koʻrsatuvchi kompaniyalar (agregatorlar) xizmati orqali amalga oshiriladi (masalan, Yandex Taxi).

Yakka tartibdagi tadbirkor – tadbirkorlik faoliyatini yuridik shaxs tashkil etmagan holda, mustaqil ravishda, oʻziga mulk huquqi asosida tegishli boʻlgan mol-mulk negizida, shuningdek, mol-mulkka egalik qilish va (yoki) undan foydalanishga yoʻl qoʻyadigan oʻzga ashyoviy huquq asosida amalga oshiruvchi jismoniy shaxsdir.

Xusniddin Ibodullayev,
Tuman dxm katta mutaxassisi