FERMER XOʻJALIKLARI VA TOMORQA YeR EGALARI KENGAShI MASʼULLARI “GULMIRZA SIYTAK” FERMER XOʻJALIGI PAXTAKORLARI BILAN UChRAShDI

Tumanimizda kun sayin marraga yaqinlashayotgan fermerlar koʻp. Bugungi kunda qaysi fermer xoʻjaligi dalasida boʻlsangiz, qizgʻin mehnat pallasiga guvoh boʻlasiz. Kuz oyining har bir lahzasini gʻanimat bilib, yigʻim-terim surʼatiga surʼat qoʻshayotgan ijarachi-dehqonlar, koʻngilli hasharchilar esa paxta dalalari boshida  yaratilgan shart-sharoitlardan mamnun.
Joriy yilning 22-sentyabr sanasida Oʻzbekiston Respublikasi fermer, dehqon xoʻjaliklari va tomorqa yer egalari Kengashi raisining oʻrinbosari Haydar Tojimurodov hamda Qoraqalpogʻiston Respublikasi fermer xoʻjaliklari va tomorqa yer egalari Kengashi raisi Duysenbay Oʻtarbayevlar “Gulmirza Siytak” fermer xoʻjaligi dalalarida boʻlishib, yigʻim-terim ishlarining borishi, terimchi va koʻngilli hasharchilar uchun yaratilgan shart-sharoitlar bilan tanishdilar.
Choykoʻl ovulidagi “Gulmirza Siytak” fermer xoʻjaligida ham yigʻim-terim mavsumi ishlari yaxshi tashkil etilgani bois,  ijarachi-terimchilar va koʻngilli hasharchilar hamjihatlik bilan mehnat qilishib, fermer xoʻjaligi xirmonining tobora yuksalishiga munosib hissalarini qoʻshmoqdalar.
Ovul hududidagi Davronbek Siytakov rahbarlik qilayotgan mazkur fermer xoʻjaligi dehqonlari joriy qishloq xoʻjaligi yilida 60 gektar maydonga baraka urugʻi qadab, “Amudaryotex” masʼuliyati cheklangan jamiyat shaklidagi klaster korxonasi bilan 192 tonna paxta topshirish boʻyicha shartnoma tuzishgan. Ushbu shartnomaviy rejani sharaf bilan bajarishga ahd qilgan fermer xoʻjaligi paxtakorlari gʻoʻza parvarishi bilan bogʻliq barcha mavsumiy agrotexnik tadbirlarni oʻz vaqtida sifatli ado etdilar va dalalarda moʻl paxta hosili yetishtirdilar. Ayni kunda xoʻjalikda hosil yigʻim-terimida kuniga 100 nafarga yaqin terimchilar va koʻngilli hasharchi-yoshlar ishtirok etishmoqda. Ularning gʻayrat-shijoatlari bilan fermer xoʻjaligi dalalaridan kuniga 11,5-12 tonna yuqori sifatli paxta xom ashyosi yigʻib-terib olinmoqda.

Fermer xoʻjaligi dalalarida mehnat qilayotgan koʻngilli hasharchilar orasida koʻp ming kilogrammchi terimchilar talaygina. Terimchilarga ish haqlari har besh kunda hisob-kitob qilib berilayotgani tufayli terim surʼati ham, sifati ham yuqori.
Qizgʻin mehnat maydoniga tashrif buyurgan masʼullar fermer xoʻjaligi ijarachilari – kuniga birgalashib, salkam yarim tonna paxta terayotgan opa-singil Oʻrozgul Siytakova hamda Muyassar Gulmirzayevalarga Oʻzbekiston Respublikasi fermer xoʻjaliklari va tomorqa yer egalari Kengashi tomonidan sovgʻalar topshirishdi.

Xoʻjalik dalalarida hosil moʻl. Yetishtirilgan hosilning bir misqolini ham nobud qilmay yigʻishtirib olishga harakat qilayotgan xoʻjalik paxtakorlari, avvalo paxtaning toza, chanoqlarda qoldirmay terilishiga alohida eʼtibor qaratishmoqda. Terilgan paxtani tarozida tortish, traktor tirkama-aravalariga yuklash, paxta qabul qilish punktlariga tashish ishlarida oʻrnatilgan qatʼiy nazorat tufayli yigʻim-terim mavsumi muvaffaqiyatli davom ettirilmoqda. Bundan tashqari, xoʻjalik dalalarida bir tekis unib chiqqan kuzgi bugʻdoy parvarishiga ham alohida eʼtibor qaratilib, kuzgi agrotexnik tadbirlar sifatli olib borilmoqda.   

Risolat Ibragimova.