“Ashirov Qahramon” fermer xoʻjaligi paxta yetishtirish rejasini ortigʻi bilan bajardi

Mamlakatimizda ayni kunlarda oq oltin hosilini qishning sovuq kunlariga qoldirmasdan, oʻz vaqtida yigʻib-terib olish ishlari qizgʻin tarzda olib borilmoqda. Joriy yilda yetishtirilgan paxta xomashyosini nest-nobud qilmasdan, uyushqoqlik bilan terib olish boʻyicha tegishli choralar amalga oshirilmoqda. Paxta-toʻqimachilik klasterlari, paxta xomashyosi yetishtiruvchi fermer xoʻjaliklari hosilni qisqa fursatda yigʻishtirib olish maqsadida zarur ishlarni tashkil etishmoqda. Amudaryo tumanida ham joriy yilgi paxta xomashyosini yigʻib-terib olish rejasini ilgʻorlar safida bajarish maqsadida paxtakorlarimiz uyushqoqlik bilan tinimsiz mehnat qilishmoqda.

Shu oʻrinda maʼlumot tariqasida aytish kerakki, joriy yilda tumanimizdagi jami 350 ta fermer xoʻjaliklari tomonidan 15 ming 30 gektar maydonda 46 ming 550 tonna paxta xomashyosini yetishtirish rejalashtirilgan. Fermer xoʻjaliklarida paxta xomashyosini yigʻib-terib olish maqsadida jami 290 ta terim otryadlari tashkil etilgan boʻlib, ushbu ortyadlarda “oq oltin”ni oʻz vaqtida nes-nobud qilmasdan terib olish boʻyicha samarali ishlar olib borilmoqda.

Maʼlumki, mamlakatimizda bu yilgi paxta yigʻim-terimi mavsumida qoʻlda terilgan 1 kilogramm paxta uchun birinchi terimda 1200 soʻmdan, ikkinchi terimda 1500 soʻmdan kam boʻlmagan miqdorda mehnat haqi toʻlash belgilandi. Tumanimizdagi paxta teruvchi 290 ta terim otryadlarida paxta terish ishlariga jalb etilgan jami 23 ming 266 nafar terimchilar oʻz mehnatlariga yarasha haqlarini oʻz vaqtlarida olishmoqdalar. Ushbu terimchilarning 9 ming 283 nafari paxta toʻqimachilik klesteri va fermer xoʻjaliklarining ishchilari boʻlib, 13 ming 983 nafari uyushmagan aholi vakillaridan iborat.

Ayni kunlarda tumanimizdagi paxta yetishtrivchi fermer xoʻjaliklari orasida belgilangan paxta rejasini ortigʻi bilan bajarib, eng ilgʻorlar safidan joy olayotgan fermerlarimiz ham anchagina. Xususan, tuman prokurori Javlon Muftullayev rahbarlik qilayotgan 2-sektor hududiga kiruvchi Qilichboy ovulidagi “Ashirov Qahramon” fermer xoʻjaligi rahbari Qahramon Ashirov ana shunday namunali fermerlarimizdan biridir.

“Ashirov Qahramon” fermer xoʻjaligida paxta yigʻim-terim jarayonlarining samarali tashkil etilishi natijasida paxta rejasi ortigʻi bilan muddatidan oldin bajarildi. 112 nafari uyushmagan aholi vakillaridan iborat boʻlgan jami 200 nafardan ortiq terimchilarning mashaqqatli mehnati evaziga har kuni 10 tonnadan ortiq paxta xomashyosi terib olindi. Natijada fermer xoʻjaligi rejadagi 45 tonna oʻrniga 45,2 tonna paxta topshirib, rejani ortigʻi bilan bajardi.

Terim jarayonida terimchilar uchun barcha sharoitlar yaratilgan. Dala boshida issiq ovqat berilmoqda. Terimchilar oʻz haqlarini belgilangan miqdorda oʻz vaqtida olganliklari ularda terimga boʻlgan ishtiyoqni yanada oshirmoqda.

Aytish kerakki, paxta xomashyosini yigʻib-terib olish ishlariga, asosan, ishsiz hamda vaqtinchalik band boʻlmagan aholi vakillarining jalb qilinishi natijasida ularning bandligi taʼminlanib, daromad topishlariga sharoit yaratilmoqda.

Tuman hokimligining Axborot xizmati.