Tumanimizda Oʻzbekiston Respublikasi davlat mustaqilligining 30 yilligi munosib nishonlandi

Mamlaktimizda eng ulugʻ, eng aziz bayram Oʻzbekiston Respublikasi mustaqilligining 30 yilligi tantanali ravishda nishonlanmoqda. Hududlarda bayram tadbirlariga munosib tayyorgarlik koʻrilib,  shodiyonalar koʻtarinki ruhda tashkil etilmoqda.

28-avgust kuni Amudaryo tumani Xotira maydonida hamda Istirohat bogʻida mustaqilligimizning 30 yillik bayrami tadbiri tashkil etilib, istiqlol ayyomi keng nishonlandi. “Yangi Oʻzbekistonda erkin va farovon yashaylik!” shiori ostida tashkil etilgan bayram tadbirini tuman hokimi Sultonboy Yoʻldashev ochib berdi hamda istiqlol yillarida mamlakat taraqqiyoti yoʻlida amalga oshirilayotgan islohotlar natijasida qoʻlga kiritilgan yutuqlarimizni sanab oʻtdi.

Tuman hokimi Sultonboy Yoʻldashev oʻz soʻzida xalqimizning metin irodasi, misliz kuch-qidrati orqali barcha sohalarda qoʻlga kiritayotgan yutuqlarimiz Yangi Oʻzbekistonda yangi bir uygʻonish davri – Uchinchi Renessans davriga poydevor yaratilayotganligidan dalolat berishini qayd etib, “Vatanimizning istiqlol yillarida bosib oʻtgan shonli yoʻliga nazar tashlar ekanmiz, ertangi kunimizga, oʻz kuch va imkoniyatlarimizga boʻlgan ishonchimiz tobora ortadi”, deya taʼkidladi.

Darhaqiqat, soʻnggi yillarda mamlakatimiz taraqqiyoti yoʻlida amalga oshirilayotgan islohotlar natijasida, barcha sohalarda sezilarli oʻzgarishlar kuzatilib, yangi yutuqlar qoʻlga kiritildi. Islohotlar samaradorligini oshirish borasidagi tizimli ishlar orqali mamlakatimizning eng chekka hududlari ham tobora rivojlanib, aholi turmush tarzi yaxshilanmoqda.

Tumanimizda ham islohotlar natijasida salmoqli ishlar amalga oshirilib, yangi rivojlanish bosqichiga qadam qoʻyilmoqda. Xususan, tumanda faol investitsiya siyosati yuritilib, yangi, zamonaviy korxonalar barpo etilmoqda, tadbirkorlik va xususiy mulkni rivojlantirish, barcha soha va tarmoqlarda yangicha yondashuvlarni joriy etishga alohida eʼtibor qaratilmoqda. Shuningdek, qishloq xoʻjaligi sohasini jadal rivojlantirishda  zamonaviy texnologiyalardan foydalanish, sohada samarali usullarni qoʻllash boʻyicha amaliy ishlar olib borilmoqda.

Tumanimizda “Yangi Oʻzbekistonda erkin va farovon yashaylik!” shiori ostida koʻtarinki ruhda oʻtkazilgan bayram tadbirida tuman hokimi Sultonboy Yoʻldashev butun tumanimiz ahlini eng ulugʻ, eng aziz ayyom – mustaqilligimizning 30 yillik bayrami bilan samimiy tabrikladi.

Bayram tadbiri respublikamizning taniqli xonandalari hamda tuman Madaniyat boʻlimi xonanadalarining kuy-qoʻshiqlari hamda ajoyib chiqishlari bilan davom ettirildi. Xotira maydoniga bayram tadbirini tomosha qilishga kelgan yurtdoshlarimiz kuy-qoʻshiqlarga raqsga tushdilar. Jajji bolajonlarimiz sevimli xonandalarining ashulalarini birgalikda kuyladilar.

Yangi Oʻzbekiston, tinchlik, ona Vatanga muhabbat, istiqlol, sevgi va sadoqat ruknidagi kuy-qoʻshiqlar yurtdoshlarimiz qalbida shukronalik va ertangi kunga ishonch tuygʻularini yana bir bor mustahkamladi. Tantanali tadbir yakunida namoyish etilgan mushakbozlik bayramga yanada koʻtarinki ruh bagʻishladi.

Taʼkidlash kerakki, tumanimizda xalqimiz hayotidagi unutilmas tarixiy voqea – Vatanimiz mustaqilligining oʻttiz yillik bayramini katta shod-u xurramlik bilan nishonlandi.

Shu fursatdan foydalanib, ajdodlarimiz necha asrlar davomida orzu qilgan, butun xalqimizga istiqlolning buyuk neʼmatlarini hadya etgan - Mustaqillik bayrami bilan barcha yurtdoshlarimizni chin dildan samimiy muborakbod etamiz.

Tuman hokimligining Axborot xizmati.