QIPChOQ OVULIDA GʻOʻZA DEFOLIATsIYaSI BOʻYIChA KOʻRGAZMALI SEMINAR OʻTKAZILDI

Amudaryo tumanida 2021-yil hosili uchun gʻoʻza maydonlarida agrotexnika tadbirlarini amalga oshirish hamda paxta yigʻim-terim ishlariga  tayyorgarlik  koʻrish boʻyicha koʻrgazmali seminar oʻtkazildi.
23-avgust kuni Qipchoq ovulida boʻlib oʻtgan mazkur seminarda Agrosanoat majmui ustidan nazorat qilish inspektsiyasi Qoraqalpogʻiston Respublikasi boshqarmasi boshligʻi oʻrinbosari Bahrom Ismoilov, tuman hokimi Sultonboy Yoʻldashev hamda soha masʼullari, qishloq xoʻjaligi korxonalari rahbarlari qatnashdilar.
Mazkur koʻrgazmali seminarda defoliatsiya qilish ishlari 25-avgustdan 4-sentyabrgacha deb belgilandi. Shuningdek, kunlik ish rejalari, mavsumda qoʻllaniladigan defoliantlar toʻgʻrisida mutaxassislar tomonidan zarur maʼlumotlar berildi.
Soʻzga chiqqan soha mutaxassislari joriy yilda 15030 gektar maydonga  chigit  ekilganligini, shundan  12430 gektar  maydonida defoliatsiya qilish ishlari  amalga  oshirilishini taʼkidlab oʻtishdi. Bu boʻyicha kunlik grafiklari ishlab chiqilganligini, 11 kun ichida chigit ekilgan maydonlarni «Suyuq XMD» va «Avguron-Ekstra» defolianti bilan defoliatsiya qilish  rejalashtirilganini maʼlum qilishdi.

Maʼlumki, paxta maydonlarida agrotexnik tadbirlarni tizimli tashkil etish, gʻoʻza defoliatsiyasini eng maqbul muddatlarda oʻtkazish uchun defoliantlar zahirasini yaratish, OVX agregatlari va qoʻlda purkagich  apparatlarini mavsumga oʻz  vaqtida tayyorlab qoʻyish soha mutaxassislari zimmasidagi masʼuliyatli vazifa hisoblanadi. Shu bois barcha paxtachilik fermer xoʻjaliklari va qishloq xoʻjalik korxonalarida mavsumiy ishlar oʻz vaqtida olib borildi.
Taʼkidlash joizki, mazkur dehqonchilik yilida tumanimizdagi “Amudaryo tex” xorijiy korxonasi paxtachilik klasteri tomonidan paxta yetishtirish boʻyicha 350 ta fermer  xoʻjaliklari  bilan shartnoma tuzilgan. Chigit  ekilgan  maydon – 5030 gektarni tashkil qiladi. Hosildorlikni 27,2 tsentnerga, yalpi  hosilni 40950 tonnaga yetkazish belgilangan.

Bugungi kungacha amalga oshirgan agrotexnik tadbirlar natijasida gʻoʻza qator  oralariga ishlov berish 65504 gektar maydonda 436 foizga bajarildi. Gʻoʻzani sugʻorish kunlik 292 gektar, mavsum boshidan 32876 gektar, maydonda yaʼni 218,7 foiz amalga oshirildi.

Chilpish  ishlari  boʻyicha ham tizimli ishlar tashkil qilindi.  Barcha ekin maydonlarida gʻoʻzani SO-JE-AN preparati bilan kimyoviy usulda chekanka qilishga katta eʼtibor qaratildi. Buning uchun jami 45 ta OVX lar hamda 110 tadan ortiq shtangali purkagichlar jal etilib, 18 ta otryadlarga biriktirildi. Chekankaning sifatli olinishini hududiy «Sifat» laboratoriyasi tomonidan sifatli va fartukka olish ishlari alohida nazoratga olindi.
Gʻoʻzani chilpish ishlari mavsum boshidan 30060 gektar maydonda, 200 foizga amalga  oshirildi. Mavsum davomida barcha agrotexnik tadbirlar yuksak saviyada oʻtkazilib, dalalarda moʻl hosil yetishtirildi.
Seminar davomida tumanda 2021-yil paxta yigʻim-terimi mavsumiga puxta tayyorgarlik koʻrish va uni optimal muddatlarda amalga oshirish maqsadida chora-tadbirlar dasturi ishlab chiqilgani, terim otryadlari tashkil qilish hamda ularga tajribali xoʻjalik faollaridan iborat rahbarlar tayinlash ishlari amalga oshirilayotgani toʻgʻrisida soʻz yuritildi. Rejaga koʻra, paxta terim ishlarini amalga oshirishda 220 ta paxta tashish texnikalari, 535 ta teleshkalar, 580 ta tarozilari, 580 ta qazon, oʻchoqlar, 580 ta samovarlar, 870 ta suv saqlash baklari, 46532 ta etaklar zarur boʻlishi maʼlum qilindi.
Seminar ishtirokchilari defoliatsiya davrida ishlatiladigan vositalar, OVX agregatini boshqaruvchi haydovchilar uchun himoya kiyimlari yuzasidan oʻzlarini qiziqtirgan savollar bilan murojaat etdilar. Ishtirokchilar tomonidan  tushgan savollarga soha mutaxassislari batafsil javoblar berishdi.

Ozoda Xudoyberganova.