ҚИПЧОҚ ОВУЛИДА ҒЎЗА ДЕФОЛИАЦИЯСИ БЎЙИЧА КЎРГАЗМАЛИ СЕМИНАР ЎТКАЗИЛДИ

Амударё туманида 2021 йил ҳосили учун ғўза майдонларида агротехника тадбирларини амалга ошириш ҳамда пахта йиғим-терим ишларига  тайёргарлик  кўриш бўйича кўргазмали семинар ўтказилди.
23 август куни Қипчоқ овулида бўлиб ўтган мазкур семинарда Агросаноат мажмуи устидан назорат қилиш инспекцияси Қорақалпоғистон Республикаси бошқармаси бошлиғи ўринбосари Баҳром Исмоилов, туман ҳокими Султонбой Йўлдашев ҳамда соҳа масъуллари, қишлоқ хўжалиги корхоналари раҳбарлари қатнашдилар.
Мазкур кўргазмали семинарда дефолиация қилиш ишлари 25 августдан 4 сентябргача деб белгиланди. Шунингдек, кунлик иш режалари, мавсумда қўлланиладиган дефолиантлар тўғрисида мутахассислар томонидан зарур маълумотлар берилди.
Сўзга чиққан соҳа мутахассислари жорий йилда 15030 гектар майдонга  чигит  экилганлигини, шундан  12430 гектар  майдонида дефолиация қилиш ишлари  амалга  оширилишини таъкидлаб ўтишди. Бу бўйича кунлик графиклари ишлаб чиқилганлигини, 11 кун ичида чигит экилган майдонларни «Суюқ ХМД» ва «Авгурон-Экстра» дефолианти билан дефолиация қилиш  режалаштирилганини маълум қилишди.

Маълумки, пахта майдонларида агротехник тадбирларни тизимли ташкил этиш, ғўза дефолиациясини энг мақбул муддатларда ўтказиш учун дефолиантлар заҳирасини яратиш, ОВХ агрегатлари ва қўлда пуркагич  аппаратларини мавсумга ўз  вақтида тайёрлаб қўйиш соҳа мутахассислари зиммасидаги масъулиятли вазифа ҳисобланади. Шу боис барча пахтачилик фермер хўжаликлари ва қишлоқ хўжалик корхоналарида мавсумий ишлар ўз вақтида олиб борилди.
Таъкидлаш жоизки, мазкур деҳқончилик йилида туманимиздаги “Аmudaryo tex” хорижий корхонаси пахтачилик кластери томонидан пахта етиштириш бўйича 350 та фермер  хўжаликлари  билан шартнома тузилган. Чигит  экилган  майдон – 5030 гектарни ташкил қилади. Ҳосилдорликни 27,2 центнерга, ялпи  ҳосилни 40950 тоннага етказиш белгиланган.

Бугунги кунгача амалга оширган агротехник тадбирлар натижасида ғўза қатор  ораларига ишлов бериш 65504 гектар майдонда 436 фоизга бажарилди. Ғўзани суғориш кунлик 292 гектар, мавсум бошидан 32876 гектар, майдонда яъни 218,7 фоиз амалга оширилди.

Чилпиш  ишлари  бўйича ҳам тизимли ишлар ташкил қилинди.  Барча экин майдонларида ғўзани СО-ЖЕ-АН препарати билан кимёвий усулда чеканка қилишга катта эътибор қаратилди. Бунинг учун жами 45 та ОВХ лар ҳамда 110 тадан ортиқ штангали пуркагичлар жал этилиб, 18 та отрядларга бириктирилди. Чеканканинг сифатли олинишини ҳудудий «Сифат» лабораторияси томонидан сифатли ва фартукка олиш ишлари алоҳида назоратга олинди.
Ғўзани чилпиш ишлари мавсум бошидан 30060 гектар майдонда, 200 фоизга амалга  оширилди. Мавсум давомида барча агротехник тадбирлар юксак савияда ўтказилиб, далаларда мўл ҳосил етиштирилди.
Семинар давомида туманда 2021 йил пахта йиғим-терими мавсумига пухта тайёргарлик кўриш ва уни оптимал муддатларда амалга ошириш мақсадида чора-тадбирлар дастури ишлаб чиқилгани, терим отрядлари ташкил қилиш ҳамда уларга тажрибали хўжалик фаолларидан иборат раҳбарлар тайинлаш ишлари амалга оширилаётгани тўғрисида сўз юритилди. Режага кўра, пахта терим ишларини амалга оширишда 220 та пахта ташиш техникалари, 535 та телешкалар, 580 та тарозилари, 580 та қазон, ўчоқлар, 580 та самоварлар, 870 та сув сақлаш баклари, 46532 та этаклар зарур бўлиши маълум қилинди.
Семинар иштирокчилари дефолиация даврида ишлатиладиган воситалар, ОВХ агрегатини бошқарувчи ҳайдовчилар учун ҳимоя кийимлари юзасидан ўзларини қизиқтирган саволлар билан мурожаат этдилар. Иштирокчилар томонидан  тушган саволларга соҳа мутахассислари батафсил жавоблар беришди.

Озода Худойберганова.