POChTA ALOQA TIZIMI TAKOMILLAShTIRILMOQDA

Insoniyat hayotida pochta xizmati qadimgi davrlardanoq muhim oʻrin tutib kelgan. Butun dunyodagi kabi hozirga qadar yurtimizda ham pochta xizmatlaridan foydalanish aholi kundalik hayotining eng muhim tarkibiy qismlaridan biri hisoblanadi. Shu bois, mamlakatda amalga oshirilayotgan islohotlar natijasida pochta sohasi ham zamonaviylashtirildi.

Bugungi kunda Amudaryo tumani Pochta aloqa tarmogʻida jami 26 nafar xodim aholiga xizmat koʻrsatadi. Shundan 4 nafari Mangʻit shahri hududidagi aholiga  xat-xabarlar, joʻnatmalar yetkazadi.

Shu yil 1-fevraldan boshlab, tuman Pochta aloqa tarmoqlariga qarashli shahar markazida 4 ta joyda, yaʼni “Mangʻit Pochta aloqa tarmogʻi” va “Oʻztelekom” tuman filiali binosida, tuman IIB YHX boʻlinmasi binosi yonida hamda “Mikrokreditbank” binosi roʻparasida pochta aloqa xizmatlari operatorlari tomonidan xizmat koʻrsatila boshladi. Undan tashqari, qishloq joylardagi hududlarda ham 9 ta aloqa boʻlimlari tashkil etildi. Hozirgi kunda Oʻrta qalʼa, Kuyuk koʻpir, Xitoy, Bobur nomli, Choykoʻl, Toʻlqin, Doʻrman, Qilichboy, Nazarxon ovullari aholisi oʻz hududlaridagi pochta-aloqa tarmogʻi boʻlimlari xizmatidan foydalanadi.

Mangʻit pochta aloqa boʻlimlari 6 dona onlayn nazorat kassa mashinalari bilan taʼminlandi. Pochta xizmatchilari ishini yengillashtirish maqsadida esa 6 ta velosiped va 2 ta skuter berildi. 

Undan tashqari, Respublikada 267 ta pochta aloqasi boʻlimi binosini taʼmirlash rejaga kiritilgan boʻlsa, ular qatori mazkur yilda Amudaryo tumanida ham boʻlimning asosiy binosini zamonaviy koʻrinishda qayta rekonstruktsiya qilish va 7 ta aloqa boʻlimlar binolarini davlat-xususiy sheriklik asosida qayta qurish ishlari davlat dasturiga kiritilgan. Shu paytga qadar tadbirkorlar bilan hamkorlikda taʼmirtalab va maʼnan eskirgan Choykoʻl, Nazarxon, Oʻrta qalʼa, Qilichboy pochta aloqa boʻlimi binolari oʻrniga davlat-xususiy sherikchilik asosida zamonaviy koʻrinishdagi yangi bino qurish rejalashtirilgan.

B.Saidov, tuman Pochta aloqa tarmogʻi boshligʻi.