Mamlakatimizda maʼnaviyat va maʼrifatni yanada yuksaltirish borasida tizimli ishlar amalga oshirilmoqda

Mamlakatimizda bugungi kunda har bir sohada amalga oshirilayotgan keng qamrovli islohotlar va bunyodkorlik ishlari natijasida xalqimizning ongu tafakkuri, dunyoqarashi oʻzgarmoqda. Yurtimizda huquqiy davlat, fuqarolik jamiyatini barpo etishda «Milliy tiklanishdan — milliy yuksalish sari» degan hayotbaxsh gʻoyaning ahamiyati tobora ortib bormoqda.

Maʼnaviy-maʼrifiy jarayonlarni tashkil etishda yaxlit tizim yaratishga, xalqimiz, ayniqsa yoshlarni maʼnaviy tahdidlardan himoya qilish borasida tashkiliy-amaliy va ilmiy-tadqiqot ishlari olib borishga alohida eʼtibor qaratilib, ushbu yoʻnalishda davlat tashkilotlari, fuqarolik jamiyati institutlari, ommaviy axborot vositalari hamda xususiy sektorning ijtimoiy hamkorligi samarali yoʻlga qoʻyilmoqda.

Maʼnaviy-maʼrifiy ishlarning samarasi va taʼsirchanligini oshirish, koʻlami va miqyosini yanada kengaytirish, mamlakatimiz aholisi, avvalo, yoshlar qalbida amalga oshirilayotgan islohotlarga daxldorlik hissini kuchaytirish, sohadagi ishlarni muvofiqlashtirishning yagona tizimini yaratish maqsadida 2021-yil 26-mart sanasida Oʻzbekiston Respublikasi Prezidentining “Maʼnaviy-maʼrifiy ishlar tizimini tubdan takomillashtirish chora-tadbirlari toʻgʻrisida” qarori qabul qilindi.

Mazkur hujjat bilan zgulik va insonparvarlik tamoyiliga asoslangan «Milliy tiklanishdan — milliy yuksalish sari» gʻoyasini keng targʻib etish orqali jamiyatda sogʻlom dunyoqarash va bunyodkorlikni umummilliy harakatga aylantirish, oila, taʼlim tashkilotlari va mahallalarda maʼnaviy tarbiyaning uzviyligini taʼminlash, targʻibot-tashviqot va tarbiya yoʻnalishidagi ishlarni ilmiy asosda tashkil etish, soha boʻyicha ilmiy va uslubiy tadqiqotlar samaradorligini oshirish, el-yurt taqdiriga loqaydlik, mahalliychilik, urugʻ-aymoqchilik, korruptsiya, oilaviy qadriyatlarga bepisandlik va yoshlar tarbiyasiga masʼuliyatsizlik kabi illatlarga barham berishga qaratilgan kompleks chora-tadbirlarni amalga oshirish kabi ustuvor yoʻnalishlar belgilandi.

Aytish kerakki, soʻnggi yillarda yurtimiz boʻylab har yili oʻtkazilishi anʼanaga aylangan “Maʼnaviyat festivali” aholining keng qatlamlari, avvalo, yoshlar qalbida Vatanga muhabbat va sadoqat, insonparvarlik fazilatlarini tarbiyalash, milliy urf-odat, anʼana va qadriyatlarning hayotimizdagi oʻrni va ahamiyatini har tomonlama ochib berishga xizmat qilmoqda. Oʻtgan yillar davomida festival doirasida qator loyihalar hayotga tatbiq etilmoqda.

Joriy yilda butun mamlakatimiz boʻylab Oʻzbekiston Respublikasi Davlat Mustaqilligining 30 yilligi munosabati bilan “Yangi Oʻzbekistonda erkin va farovon yashaylik!” shiori ostida oʻtkazilgan “Maʼnaviyat festivali” ham yurtdoshlarimizda ertangi kunga umid, ishonch, Vatanga sadoqat, milliy qadriyatlarimizga hurmat tuygʻularini yanada mustahkamladi.

2019-yilni 3-may sanasida mamlakatimizda maʼnaviy-maʼrifiy ishlarning taʼsirchanligini oshirish, maʼnaviyat sohasidagi ichki va tashqi tahdid hamda xavf-xatarlarga qarshi samarali kurashish, jamiyatda mafkuraviy immunitetni mustahkamlash, davlat va jamoat tashkilotlarining bu boradagi faoliyatiga yaqindan koʻmaklashish maqsadida  qabul qilingan Oʻzbekiston Respublikasi Prezidentining “Maʼnaviy-maʼrifiy ishlar samaradorligini oshirish boʻyicha qoʻshimcha chora-tadbirlar toʻgʻrisida”gi qarori bilan Respublika Maʼnaviyat va maʼrifat markazi, uning hududiy boʻlim va boʻlinmalari tashkil etildi.

Respublika Maʼnaviyat va maʼrifat markazi Amudaryo tumani boʻlinmasi tomonidan sohada amalga oshirilayotgan islohotlar ijrosini taʼminlash borasida tizimli ishlar qilinmoqda.

Xususan, Oʻzbekiston Respublikasi Prezidentining “2017-2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasi”ning mazmun-mohiyati hamda amalga oshirilayotgan islohotlar yuzasidan aholining barcha qatlamlari orasida maʼnaviy-maʼrifiy tadbirlar, maʼruzalar, amaliy seminarlar, davra suhbatlari kabi targʻibot tadbirlari tashkil etib kelinmoqda. Umumxalq bayramlari va muhim tarixiy sanalarda taʼlim-tarbiya maskanlari, korxona-tashkilotlarda turli mavzularda uchrashuvlar, maʼnaviy-maʼrifiy tadbirlar oʻtkazilmoqda. Yoshlarning intellektual bilim va imkoniyatlarini oshirishga alohida eʼtibor qaratilib, yoshlar manaviyatini yuksaltirish, ular oʻrtasida kitobxonlikni keng targʻib qilish boʻyicha tizimli ishlar tashkil etilmoqda.

Yurtimizda maʼnaviy-maʼrifiy ishlarni yanada rivojlantirish borasida amalga oshirilayotgan bu kabi chora-tadbirlar aholi, ayniqsa yoshlarning intellektual salohiyati, ong-u tafakkuri va dunyoqarashini yuksaltirish, mafkuraviy immunitetini mustahkamlash, vatanparvarlik, xalqqa muhabbat va sadoqat tuygʻusi bilan yashaydigan barkamol avlodni tarbiyalashga xizmat qilishi, shubhasiz.

Mamlakatimizning har tomonlama taraqqiy etishi yoʻlidagi islohotlar bardavom boʻlishini tilagan holda barcha yurtdoshlarimizni jonajon Oʻzbekistonimizning eng ulugʻ, eng aziz bayrami - mustaqilligimizning 30 yilligi bilan  Respublika Maʼnaviyat va maʼrifat markazi Amudaryo tumani boʻlinmasi nomidan samimiy tabriklayman.  

Otabek Yoʻldoshov, Respublika Maʼnaviyat va maʼrifat markazi Amudaryo tumani boʻlinmasi rahbari.