“BARKAMOL AVLOD” BOLALAR MAKTABIDA “KELAJAK YuLDUZLARI” XEShTEGI OSTIDA DAVRA SUHBATI TAShKIL ETILDI

Barkamol avlod yurt kelajagini yaratadi. Yoshlarning taʼlim-tarbiyasi kelajagimiz uchun alohida ahamiyatga ega boʻlganligi bois mamlakatimizda ularning puxta taʼlim-tarbiya olishi uchun qulay sharoit yaratish masalasiga alohida eʼtibor qaratilmoqda. Yosh avlodga taʼlim-tarbiya berish bilan birga kasb-hunar toʻgʻrisida ilk koʻnikmalar hosil qilishlarini taʼminlash maqsadida ham maktab taʼlimidan tashqari imkoniyatlar yaratilmoqda.

Bu borada Amudaryo tumanidagi “Barkamol avlod” bolalar maktabida qilinayotgan ishlarni alohida taʼkidlash joiz. Xalq taʼlimi tizimining muhim tarkibiy boʻlagiga aylanib ulgurgan tumandagi “Barkamol avlod” bolalar maktabida oʻquvchilarning ijodiy qobiliyatlarini aniqlash va rivojlantirish,  ularni milliy anʼanalar, tarixiy qadriyatlar va buyuk ajdodlar merosi  asosida tarbiyalashga jiddiy yondashiladi. Ijodkor, qiziqqan  sohasi boʻyicha  yangiliklarni yaratishga tayyor oʻquvchilar shu maktab toʻgaraklarida ilk kasbiy koʻnikmalarni oʻrganadi.

4-avgust kuni mazkur maktabda “Yuksalish oyligi” doirasida “Kelajak yulduzlari” xeshtegi ostida davra suhbati tashkil etildi. Tadbirda “Barkamol avlod” bolalar maktabi direktori Xonimjon Rajabova, tuman Madaniyat boʻlimi xodimlari Anvar Xudoyberganov, Nasiba Eshchonova, Oybek Begimovlar qatnashishdi.

Tumanimiz madaniyat tizimda koʻp yillardan beri faoliyat koʻrsatib kelayotgan tajribali xodimlar yoshlarga madaniyat va sanʼat, sohada amalga oshirilayotgan islohotlar, qaratilayotgan yuksak eʼtibor, yaratilayotgan imkoniyatlar haqida gapirib berdilar.

Madaniyat va sanʼatning jamiyat rivojidagi oʻrni  xususida soʻz yuritib, sohani rivojlantirish, hamda kelajak avlodni har tomonlama yetuk qilib tarbiyalash maqsadida ixtisoslashtirilgan madaniyat va sanʼat maktablari hamda maktab-internatlarining faoliyati yoʻlga qoʻyilgani, ularning moddiy-texnika bazasi mustahkamlangani, bu oʻz navbatida yurtimiz yoshlarining nufuzli xalqaro tanlovlardagi muvaffaqiyatlariga zamin boʻlayotganini alohida taʼkidladilar.

Yurtimizda madaniyat va sanʼat sohasida xalqaro darajadagi festivallarning oʻtkazilishi oʻzbek madaniyatining asl tarixiy ildizlarini mustahkamlash va jahonda targʻib qilinishiga xizmat qilayotganini faxru-iftixor bilan eʼtirof etdilar.

Davra suhbati davomida «Uchqun» ashula  va  raqs  xalq  ansambli badiiy rahbari sifatida faoliyat koʻrsatib kelayotgan xonanda Anvar Xudoyberganov oʻquvchi-yoshlarga tuman madaniyat markazidagi  3 ta  xalq  ansambli,  yaʼni «Uchqun» ashula  va  raqs  xalq  ansambli, «Ofarin» folklor-etnografik  xalq jamoasi, «Jayhun  moʻʼjizasi» anʼanaviy sahna  tsirk  xalq  jamoalari nafaqat tuman, balki Oʻzbekiston miqyosida taniqliligini bayon etdi.

Shu jumladan,  22-yildan buyon faoliyat yuritayotgan “Drama havaskorlik”, Amudaryo tumaniga xos boʻlgan “Masxarabozlik sanʼati”, “Simli dor oʻyinlari ” jamoalari xalqimizning maʼnaviy   qadriyatlarini  tiklash, ularni  asrab-avaylash  va  rivojlantirish, muqaddas  dinimiz, urf-odatlarimizni, tarixiy, ilmiy, madaniy  merosimizni  yuksaltirish  borasida  tinmay  xizmat  qilayotganini aytib oʻtdi.

Tadbirga tashrif buyurgan soha xodimlari ashulalar, sheʼrlardan iborat ijod namunalarini ijro etib, yoshlar bilan baham koʻrdilar. Shuningdek, maktabning badiiy havaskorlik toʻgaragi aʼzolari ham musiqiy dastur, ajoyib qoʻshiq va dilrabo raqslar namoyish etib, tadbirga yanada fayz kiritdilar.

Ozoda Xudoyberganova.