UZUMChILIKNI RIVOJLANTIRIShGA BAGʻIShLANGAN OʻQUV-TARGʻIBOT SEMINAR OʻTKAZILDI
Maʼlumki, amudaryoliklar uchun bogʻlar barpo etish, mavjud bogʻlarni asrab-avaylash, mevalarning eng sara navlarini yaratish orqali bogʻdorchilik madaniyatini yuksaltirish bobomeros qadriyatlar sirasiga kiradi. Shuning uchun ham tumanimizning qaysi hududiga bormang, serhosil bogʻ-rogʻlarga koʻzingiz tushadi. Ayniqsa, soʻnggi yillarda davlatimiz tomonidan sohaga qaratilayotgan eʼtibor tufayli tumanimizning eng chekka ovul va mahallalari hududlarida ham biri-biridan soʻlim bogʻ-rogʻlar barpo etilib, sohibkor-u bogʻbonlarimiz yetishtirgan noz-neʼmatlar xalqimiz dasturxoniga tortiq qilinmoqda.
Joriy yilning 7-iyul sanasida Prezidentimiz Sh.Mirziyoyev rahbarligida boʻlib oʻtgan videoselektor yigʻilishida davlatimiz rahbari mamlakatimizda uzumchilikni rivojlantirish, sohaga yangi, zamonaviy texnologiyalarni keng joriy etish orqali uzum yetishtirishda sanoat usulida qayta ishlashni tashkil etish hamda hududlarda ekoturizmni yoʻlga qoʻyish boʻyicha soha mutaxassislariga zarur tavsiyalar berib, yurtimizda azaldan uzumchilik anʼanasini davom ettiribgina qolmay, uni oʻz shaxsiy tajribalari orqali yanada boyitib, daromad manbaiga aylantirgan sohibkor-bogʻbonlar tajribasini ommlashtirishni taʼkidlagan edilar. Joriy yil 5-avgust sanasida Ayoqchi mahallasi hududidagi “Otalar choyxonasi”da Prezidentimiz tomonidan ilgari surilgan taklif va tavsiyalarni sohaga izchil tatbiq etish maqsadida, shuningdek Buloqboshi tumani sohibkor-bogʻbonlari tajribasini qoʻllagan holda uzumzorlarda soʻritoklar qurish, uzum nihollarining soʻritoklardagi bagʻazlar boʻylab oʻsishini taʼminlashga bagʻishlangan oʻquv-targʻibot seminari oʻtkazildi.
Oʻquv-targʻibot seminari ishida Qoraqalpogʻiston Respublikasi Fermer, dehqon xoʻjaliklari va tomorqa yer egalari Kengashi raisining oʻrinbosari Duysenboy Oterbayev, Amudaryo tuman Fermer, dehqon xoʻjaliklari va tomorqa yer egalari Kengashi raisi Ilhom Polvonov, shuningdek tumandagi bogʻdorchilik va uzumchilik tarmogʻiga ega fermer xoʻjaliklari bogʻbonlari, qishloq xoʻjalik korxonalari rahbarlari ishtirok etdilar.
Boʻlib oʻtgan oʻquv-targʻibot seminarida uzumchilik boʻyicha masʼul mutaxassislar Buloqboshi tumani sohibkor-bogʻbonlari tajribasini tumanimiz sharoitida qoʻllash orqali erishiladigan yutuqlar va koʻzlanayotgan natijalar haqida seminar ishtirokchilariga keng tushunchalar va maʼlumotlar berdilar.
Shundan soʻng, oʻquv-targʻibot seminari ishtirokchilariga Doʻrman ovul fuqarolar yigʻini hududidagi Bahrom Sobirovning tomorqa xoʻjaligida Buloqboshi tajribasini qoʻllagan holda soʻritok tashkil etish amalda koʻrsatib berildi. Shu bilan birga, soʻritoklarda yetishtirilgan uzum mevasi oddiy usulda yetishtirilganidan ancha serhosil boʻlishi, mavsum davomida sohibkor-bogʻbonlar tomonidan uzumzorlarga agrotexnik ishlov berish muddatlari haqida batafsil tushunchalar berildi.
Seminarda aholi vakillari ham ishtirok etishib, uzumchilikni rivojlantirish, uzum mevalarini qish oylarida sifatli saqlash, uzum zararkunandalari va kasaliklariga qarshi kurashish yuzasidan savollar bilan murojaat qildilar.
Ishtirokchilar tomonidan berilgan barcha savollar yuzasidan masʼul mutaxassislar zarur tushunchalar va tavsiyalar berishdi.
Robiya YOʻLDOShEVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
