KADASTR SOHASIDA KORRUPTsION HOLATLARNING OLDINI OLISh MASALALARI BOʻYIChA YIGʻILISh OʻTKAZILDI
Oʻzbekiston Respublikasi Davlat Soliq qoʻmitasi huzuridagi Kadastr Agentligi direktorining shu yil 14-iyul kuni ZOOM orqali oʻtkazilgan selektor yigʻilishida sohada korruptsiya rivojlanishining oldini olish, unga qarshi kurashish boʻyicha tegishli chora-tadbirlar belgilanib, topshiriqlar berilgan edi. Shunga koʻra Kadastr Agentligi Qoraqalpogʻiston Respublikasi boshqarmasi tomonidan hududlarda uchrashuvlar tashkil etilib, korruptsiyaning salbiy oqibatlari, bu boradagi qonunlar, davlat hujjatlari xususida keng tushunchalar berilmoqda.
31-iyul kuni Kadastr agentligi Amudaryo tuman boʻlimida mazkur masala yuzasidan yigʻilish oʻtkazildi. Yigʻilishda Kadastr Agentligi Qoraqalpogʻiston Respublikasi boshqarmasi masʼullari Ozod Eshchonov, Mahmud Uzoqboyev, Rasul Zivaddinovlar ishtirok etib, Prezidentning 2019-yildagi “Oʻzbekiston Respublikasida korruptsiyaga qarshi kurashish tizimini yanada takomillashtirish chora-tadbirlari toʻgʻrisida”gi Farmoni va unga koʻra tasdiqlangan “2019-2020-yillarda korruptsiyaga qarshi kurashish toʻgʻrisidagi Davlat dasturi” va qonunchilikda kiritilayotgan oʻzgarishlarning mazmun-mohiyati xususida soʻz yuritildi.
Yigʻilishda taʼkidlanganidek, huquq ustuvorligiga putur yetkazadigan, inson huquqlarini buzilishiga olib keladigan va jamiyat ravnaqiga toʻsqinlik qiladigan illat bu – korruptsiya hisoblanadi. Ushbu illatga qarshi kurashish maqsadidagi Prezidentning mazkur Farmoniga muvofiq 2019-2020-yillarda korruptsiyaga qarshi kurashish davlat dasturi tasdiqlangan boʻlib, uning asosiy vazifasi korruptsiyaga doir huquqbuzarliklarga zamin yaratayotgan sabablar va shart-sharoitlarga qarshi keskin choralar koʻrgan holda kurashishdan iborat. Undan tashqari, Prezidentimizning 2020-yil 29-iyundagi “Oʻzbekiston Respublikasida korruptsiyaga qarshi kurashish tizimini takomillashtirish boʻyicha qoʻshimcha chora-tadbirlar toʻgʻrisida”gi Farmoniga muvofiq Oʻzbekiston Respublikasi Korruptsiyaga qarshi kurashish Agentligi tashkil etildi va Agentlikning korruptsiyaga qarshi kurashish boʻyicha vazifa va vakolatlari belgilab berildi.
Xususan, masʼullar korruptsiyaning xavf-xatarlarini tahlil qilish va aholining keng qatlamlarini xabardor qilish, huquqiy ongini oshirish, ommaviy axborot vositalari orqali tashviqot ishlarini amalga oshirish lozimligini taʼkidlashdi. Shular bilan birga, jamiyatimizda fuqarolarning huquq va manfaatini koʻzlab norma ijodkorligida koʻplab oʻzgarishlar boʻlayotganini alohida eʼtirof etishdi. Shuningdek, yer ajratish tizimida korruptsiyaga qarshi kurashish va bu boradagi qonunchilik asoslari boʻyicha tizimda olib borilayotgan ishlar hamda sohadagi oʻzgarishlar va yutuqlar, korruptsiyaga qarshi kurash bugungi kunning dolzarb masalasi va soliq borasida amalga oshirilayotgan ishlar borasida soha mutaxassislari tomonidan maʼlumotlar berildi.
Yigʻilishda korruptsiyaga qarshi kurashish borasida davlat tomonidan qabul qilingan hujjatlar boʻyicha xodimlar oʻrtasida tushuntirishlar va targʻibot tadbirlarini muntazam ravishda tashkil etish, sohada korruptsion holatlarning oldini olish, ochiqlik va shaffoflik printsiplarini taʼminlashda kamchiliklarga yoʻl qoʻymaslik kerakligi taʼkidlandi. Shu bilan birga, korruptsiyaga qarshi kurashish samaradorligini tubdan oshirish boʻyicha belgilangan vazifalar, sohada korruptsiya holatlarining sabab va shart-sharoitlarini aniqlash, ularni bartaraf etishning taʼsirchan tizimini yaratish bugungi kunning dolzarb vazifasi ekanligi alohida eʼtirof etildi.
Shundan soʻng, yigʻilish ochiq muloqot shaklida, yaʼni savol-javob tarzida davom ettirildi. Yigʻilish ishtirokchilarining savollariga masʼullar tomonidan batafsil javoblar berildi.
O. Xudoyberganova.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
