Amudaryo tumani Yoʻllardan foydalanish UK tomonidan 1-yarim yillikda 41,2 km ichki yoʻllar taʼmirlandi

Bugungi kunda zamonaviy avtomobil yoʻllari tarmogʻini rivojlantirish mamlakatimiz iqtisodiyotining raqobatbardoshligini oshirishda, respublika transport salohiyatini rivojlantirishda va eksport imkoniyatlarini kengaytirishda muhim ahamiyatga ega boʻlgan ustuvor vazifa hisoblanadi.

Mamlakatimizda xalqaro standartlarga mos zamonaviy avtomobil yoʻllarini qurish, yoʻl harakati qulayligi va xavfsizligini oshirishga qaratilgan qator chora-tadbirlar amalga oshirilmoqda. Oʻzbekiston Respublikasi Prezidentining “Oʻzbekiston Respublikasi yoʻl xoʻjaligi tizimini chuqur isloh qilish chora-tadbirlari toʻgʻrisida”gi farmoni hamda “Yoʻl sohasini boshqarish tizimini yanada takomillashtirishga oid chora-tadbirlar toʻgʻrisida”gi qarori, shuningdek, Oʻzbekiston Respublikasi Vazirlar Mahkamasining “Oʻzbekiston Respublikasi Transport vazirligi huzuridagi Avtomobil yoʻllari qoʻmitasi toʻgʻrisidagi nizomni tasdiqlash haqida”gi qarori bu borada salmoqli ishlarni tashkil etishda muhim hujjat boʻlmoqda.

Amudaryo tumani Yoʻllardan foydalanish unitar korxonasi sohada joriy qilinayotgan islohotlar ijrosini taʼminlash borasida samarali faoliyat olib bormoqda. Korxona tomonidan tuman hududidagi ichki yoʻllarni taʼmirlash boʻyicha tizimli ishlar amalga oshirilmoqda.

Joriy yilning birinchi yarmida shartnomaviy qiymati 9 mlrd. 432 mln soʻm boʻlgan 41,2 km ichki yoʻllarni taʼmirlash ishlari amalga oshirildi. Shundan 29,9 km yoʻllarda tuproq ishlari, 22,2 km yoʻllarda tosh yotqizish ishlari amalga oshirigan. Joriy yil yakuniga qadar 8,3 km ichki yoʻllarga asfalt yotqizish ishlari rejalashtirilgan. Tumandagi Xitoy va Qipchoq ovullari, Chordara mahallasida eng koʻp ichki yoʻllarni taʼmirlash ishlari olib borilgan.

Shuningdek, tuman Yoʻllardan foydalanish unitar korxonasi tomonidan joriy yil umumfoydalanuvdagi avtomobil yoʻllarida qator taʼmirlash ishlari rejalashtirilgan hamda reja amalga oshirilmoqda. Xususan, joriy yil davomida davlat ahamiyatidagi yoʻllarni taʼmirlash uchun 150 mln soʻm, Qipchoq ponton koʻprigini joriy taʼmirlash uchun 350 mln soʻm, mahalliy ahamiyatdagi avtomobil yoʻllarini taʼmirlash uchun esa 922 mln soʻm mablagʻlar ajratilgan.

Korxona xodimlarining mashaqqatli mehnati evaziga qator ijobiy natijalar qoʻlga kiritilmoqda. Bugungi kunda korxonada jami 138 nafar ishchi-xodimlar faoliyat yuritib kelishmoqda. Korxonaga qarashli 3 ta yoʻl boʻlimi mavjud boʻlib, 1-yoʻl boʻlimda 23 nafar, 2-yoʻl boʻlimda 21 nafar, 3-yoʻl boʻlimda 25 nafar yoʻllarni taʼmirlovchi xodimlar ish yuritishmoqda. Shuningdek, Qipchoq panton koʻprigi boʻlimida 23 nafar, joriy taʼmirlash boʻlimida 8 nafar, avtokalonnada 11 nafar, ustaxonada 8 nafar, tosh maydalash va saralash zavodida 2 nafar, boshqaruv apparatida 17 nafar xodimlar faoliyat yuritishadi.

Tuman Yoʻllardan foydalanish unitar korxonasi xodimlarining ish jarayonlarini samarali tashkil qilish maqsadida qator zarur texnikalar jalb qilingan. Xususan, yoʻllarni taʼmirlash ishlarini tashkil etishda 2 ta avtogreyder, 2 ta yuk ortuvchi mashina, 4 ta avtosamosval, 3 ta traktor hamda 2 ta ishchilarni tashiydigan avtomobil biriktirilgan.

Muxtasar aytganda, korxonada ish jarayonlarining toʻgʻri tashkil etilishi, ishchilarning mashaqqatli mehnatlari natijasida tumanimiz yoʻllari tobora ravonlashib, yoʻlovchi hamda haydovchilar uchun yangi qulayliklar yaratilmoqda.

B.Xodjayev, Tuman Yoʻllardan foydalanish unitar korxonasi direktori.