“GʻOʻZADA HOSIL TOʻPLASh OYI”DA AMALGA OShIRILADIGAN IShLAR HAQIDA KOʻRGAZMALI SEMINAR OʻTKAZILDI

Mamlakatimizda qishloq xoʻjaligi sohasini yanada rivojlantirishga alohida eʼtibor qaratilib, sohada tizimli islohotlar amalga oshirilmoqda. Oʻzbekiston Respublikasi qishloq xoʻjaligini rivojlantirishning 2020 — 2030-yillarga moʻljallangan strategiyasini amalga oshirish borasida dehqon va fermerlarga ilmiy asoslangan axborotlarni yetkazish, ishlab chiqarishga ilm-fan yutuqlari va innovatsiyalarni keng joriy etishga alohida eʼtibor qaratilmoqda. Yerdan moʻl hosil olish maqsadida soha mutaxassislari, olimlar va yetakchi amaliyotchilar ishtirokida joylarda koʻrgazmali seminarlar tashkil qilinib, oʻzaro tajribalar almashilmoqda.

Shu maqsadda joriy yilning 12-iyul sanasida Amudaryo tumani Choykoʻl ovulidagi “Choykoʻl-Doʻstlik” fermer xoʻjaligida qishloq xoʻjaligi masalalariga bagʻishlangan koʻrgazmali seminar boʻlib oʻtdi. Seminarda Qoraqalpogʻiston Respublikasi Qishloq xoʻjaligi vaziri Alisher Yakubov, Agrosanoat majmui ustidan nazorat qilish inspektsiyasi Qoraqalpogʻiston Respublikasi boshqarmasi boshligʻi Anvar Yoʻldashev, qishloq va suv xoʻjaligi masalalari boʻyicha tuman hokimi oʻrinbosari Fayzulla Saʼdullayev, tumandagi fermer xoʻjaliklari raislari, qishloq xoʻjaligi sohasi masʼullari ishtirok etdilar.

Seminarda ayni kunlarda dolzarb boʻlgan gʻoʻza parvarishi, bu borada agrotexnik tadbirlarni oʻz vaqtida oʻtkazish masalalari xususida soʻz yuritildi. Tumanimizdagi agrar soha masʼullari va fermerlar gʻoʻza ekilgan maydonlarda agrotexnik ishlarning bajarilishi toʻgʻrisida keng turdagi maʼlumotlarga ega boʻldilar.

Amudaryo tumanida 2021-yil hosili uchun 350 ta fermer xoʻjaliklaridagi 15 ming 30 gektar maydonga chigit ekilgan boʻlib, masʼuliyati cheklangan jamiyati shaklidagi “Amudaryoteks” xorijiy korxonasi paxtachilik klasteri bilan fermer xoʻjaliklari hamda qishloq xoʻjaligi korxonalari oʻrtasida paxta xomashyosini yetishtirib berish boʻyicha kontraktatsiya shartnomalari tuzilgan. Gʻoʻza maydonlarida agrotexnik  tadbirlar  oʻz vaqtida amalga  oshrilmoqda.

Xususan, gʻoʻza parvarishida iyul oyi, yaʼni “Gʻoʻzada hosil toʻplash” oyida amalga oshiriladigan muhim agrotexnik tadbirlardan biri – paxtani suvdan keyingi kultivatsiya qilish ishlari boʻlib, buning uchun tumanda  jami 365 ta kultivatorlardan foydalanilmoqda. Shu maqsadda 90 ta otryad tuzilgan va har bir otryadga tajribali mutaxassislar biriktirilgan. 

Shuningdek, gʻoʻzani  birinchi  sugʻorish ishlari kunlik 342 ga maydonda, mavsum boshidan 9107 ga maydonda,  ikkinchi sugʻorish ishlari kunlik 279 ga maydonida, mavsum boshidan 655 ga maydonda amalga  oshirilgan.

Qolaversa, gʻoʻza maydonlarida amalga oshirilishi lozim boʻlgan eng muhim agrotexnik tadbirlardan  biri paxtani chilpish, yaʼni chekanka boʻlib, chekanka ishlarini belgilangan muddatlarda bajarilishini taʼminlash borasida rejaviy jadval ishlab chiqilgan.

Aytish kerakki, paxta dalalarida chekanka qilish ishlarini gʻoʻzaning rivojlanishiga qarab tabaqalab oʻtkazish reja qilingan. Gʻoʻzani SO-JE-AN  preparati bilan kimyoviy usulda chekanka qilishga katta eʼtibor qaratilmoqda. Buning uchun jami 155 tadan ortiq turli rusumdagi purkagich moslamalari 18 ta otryadlarga biriktirilgan boʻlib, ishlar uzluksiz tashkil qilingan.

Shu kungacha tuman boʻyicha gʻoʻzani chilpish ishlari jami 286 ga maydonda amalga  oshirilgan boʻlib, chekanka ishlariga 80 nafar ishchilar  jalb qilingan.

Seminar ishtirokchilari masʼullarga savollar bilan murojaat qildilar hamda tegishli javoblar oldilar. Mazkur seminar tumandagi qishloq xoʻjaligi sohasi xodimlarining yangi tajribalar va bilimlarga ega boʻlishida muhim ahamiyat kasb etdi.

Tuman hokimligining Axborot xizmati.