“ҒЎЗАДА ҲОСИЛ ТЎПЛАШ ОЙИ”ДА АМАЛГА ОШИРИЛАДИГАН ИШЛАР ҲАҚИДА КЎРГАЗМАЛИ СЕМИНАР ЎТКАЗИЛДИ

Мамлакатимизда қишлоқ хўжалиги соҳасини янада ривожлантиришга алоҳида эътибор қаратилиб, соҳада тизимли ислоҳотлар амалга оширилмоқда. Ўзбекистон Республикаси қишлоқ хўжалигини ривожлантиришнинг 2020 — 2030 йилларга мўлжалланган стратегиясини амалга ошириш борасида деҳқон ва фермерларга илмий асосланган ахборотларни етказиш, ишлаб чиқаришга илм-фан ютуқлари ва инновацияларни кенг жорий этишга алоҳида эътибор қаратилмоқда. Ердан мўл ҳосил олиш мақсадида соҳа мутахассислари, олимлар ва етакчи амалиётчилар иштирокида жойларда кўргазмали семинарлар ташкил қилиниб, ўзаро тажрибалар алмашилмоқда.

Шу мақсадда жорий йилнинг 12 июль санасида Амударё тумани Чойкўл овулидаги “Чойкўл-Дўстлик” фермер хўжалигида қишлоқ хўжалиги масалаларига бағишланган кўргазмали семинар бўлиб ўтди. Семинарда Қорақалпоғистон Республикаси Қишлоқ хўжалиги вазири Алишер Якубов, Агросаноат мажмуи устидан назорат қилиш инспекцияси Қорақалпоғистон Республикаси бошқармаси бошлиғи Анвар Йўлдашев, қишлоқ ва сув хўжалиги масалалари бўйича туман ҳокими ўринбосари Файзулла Саъдуллаев, тумандаги фермер хўжаликлари раислари, қишлоқ хўжалиги соҳаси масъуллари иштирок этдилар.

Семинарда айни кунларда долзарб бўлган ғўза парвариши, бу борада агротехник тадбирларни ўз вақтида ўтказиш масалалари хусусида сўз юритилди. Туманимиздаги аграр соҳа масъуллари ва фермерлар ғўза экилган майдонларда агротехник ишларнинг бажарилиши тўғрисида кенг турдаги маълумотларга эга бўлдилар.

Амударё туманида 2021 йил ҳосили учун 350 та фермер хўжаликларидаги 15 минг 30 гектар майдонга чигит экилган бўлиб, масъулияти чекланган жамияти шаклидаги “Амударётекс” хорижий корхонаси пахтачилик кластери билан фермер хўжаликлари ҳамда қишлоқ хўжалиги корхоналари ўртасида пахта хомашёсини етиштириб бериш бўйича контрактация шартномалари тузилган. Ғўза майдонларида агротехник  тадбирлар  ўз вақтида амалга  ошрилмоқда.

Хусусан, ғўза парваришида июль ойи, яъни “Ғўзада ҳосил тўплаш” ойида амалга ошириладиган муҳим агротехник тадбирлардан бири – пахтани сувдан кейинги культивация қилиш ишлари бўлиб, бунинг учун туманда  жами 365 та культиваторлардан фойдаланилмоқда. Шу мақсадда 90 та отряд тузилган ва ҳар бир отрядга тажрибали мутахассислар бириктирилган. 

Шунингдек, ғўзани  биринчи  суғориш ишлари кунлик 342 га майдонда, мавсум бошидан 9107 га майдонда,  иккинчи суғориш ишлари кунлик 279 га майдонида, мавсум бошидан 655 га майдонда амалга  оширилган.

Қолаверса, ғўза майдонларида амалга оширилиши лозим бўлган энг муҳим агротехник тадбирлардан  бири пахтани чилпиш, яъни чеканка бўлиб, чеканка ишларини белгиланган муддатларда бажарилишини таъминлаш борасида режавий жадвал ишлаб чиқилган.

Айтиш керакки, пахта далаларида чеканка қилиш ишларини ғўзанинг ривожланишига қараб табақалаб ўтказиш режа қилинган. Ғўзани СО-ЖЕ-АН  препарати билан кимёвий усулда чеканка қилишга катта эътибор қаратилмоқда. Бунинг учун жами 155 тадан ортиқ турли русумдаги пуркагич мосламалари 18 та отрядларга бириктирилган бўлиб, ишлар узлуксиз ташкил қилинган.

Шу кунгача туман бўйича ғўзани чилпиш ишлари жами 286 га майдонда амалга  оширилган бўлиб, чеканка ишларига 80 нафар ишчилар  жалб қилинган.

Семинар иштирокчилари масъулларга саволлар билан мурожаат қилдилар ҳамда тегишли жавоблар олдилар. Мазкур семинар тумандаги қишлоқ хўжалиги соҳаси ходимларининг янги тажрибалар ва билимларга эга бўлишида муҳим аҳамият касб этди.

Туман ҳокимлигининг Ахборот хизмати.