Dunyodagi eng baxtli xalqmiz

Har bir mamlakatning kuch-qudrati aholisining jismoniy va maʼnaviy sogʻlomligi bilan belgilanadi. Zero, sogʻlom odamgina ezgu ishlar qilishga, bunyodkorlik va yaratuvchanlikka qodir.

Istiqlol yillarida mamlakatimizda aholi salomatligini mustahkamlash, maʼnan va jismonan sogʻlom avlodni voyaga yetkazish borasida amalga oshirilayotgan oqilona chora-tadbirlar bugun jahon miqyosida namuna sifatida eʼtirof etilmoqda.

Nafaqat markazlarda, balki chekka qishloqlarda ham qad rostlagan zamonaviy shifo maskanlarida bugungi kunda aholiga zamon talablari darajasida sifatli tibbiy xizmat koʻrsatilmoqda. Endilikda bemorning shifokorga murojaat qilishi va davolanishi uchun avvalgi paytlardagidek tuman markazidagi shifoxonaga qatnab ovora boʻlishiga hojat qolmadi. Ovul yoki mahallaning oʻzida joylashgan shifo muassasasidagi umumiy amaliyot shifokori kasallikka tezkor ravishda aniq tashhis qoʻyib, bemorga zarur tibbiy tavsiyalar bermoqda.

Oʻzbekistonning mustaqillik yillarida qoʻlga kiritgan salmoqli yutuqlarining eng muhimi ham onalar va bolalar sogʻligi muhofazasiga katta eʼtibor qaratilganligidir.

Prezidentimizning bevosita tashabbusi bilan onalik va bolalikni muhofaza qilish borasida olib borilgan izchil islohotlar samarasida "Sogʻlom ona — sogʻlom bola” dasturi umummilliy harakatga aylandi. Aholiga koʻrsatilayotgan tibbiy xizmat sifatining yaxshilanishi xalqimiz hayot darajasining yanada koʻtarilishiga olib keldi. Istiqlol yillarida mamlakatimizda ayollarning umr koʻrish davomiyligi 67 yoshdan 75 yoshga uzaygani, onalar oʻlimi 3,1 barobar, bolalar oʻlimi 3,2 barobar kamaygani, nufuzli xalqaro tashkilot — "Save the Children” ("Bolalarni asraylik”) tomonidan tuzilgan jahon reytingida Oʻzbekiston oʻsib kelayotgan yosh avlod salomatligi haqida eng koʻp gʻamxoʻrlik koʻrsatayotgan davlatlar oʻntaligiga kirgani buning yorqin dalilidir.

Sogʻlikni saqlash tizimida amalga oshirilayotgan bu kabi ishlarning asosida mustaqillikning ilk yillarida ilgari surilgan "Islohot islohot uchun emas, inson uchun, uning manfaatlari uchun” degan hayotiy gʻoya turgani bugun turmushimizda oʻz isbotini topmoqda.

Nuroniylarimiz har tong duoga qoʻl ochar ekan, eng avvalo "tani-jonimiz sogʻ, yurtimiz tinch boʻlsin”, deya tilak bildirishadi. Darhaqiqat, tani sogʻ, yurti tinch, koʻngli xotirjam xalq – dunyodagi eng baxtli xalqdir. Nazarimda, bunday baxt faqatgina bizga ato etilgan!

Olimboy HALIMOV,