“PROKUROR KUBOGI” MUSOBAQASI GʻOLIBLARI TAQDIRLANDI

Tumanimizda “Yoshlarni qoʻllab-quvvatlash va aholi salomatligini mustahkamlash yili” davlat dasturi doirasida 16-30 yosh oraligʻidagi uyushmagan yoshlar va oʻsmirlar oʻrtasida sportning kurash turi boʻyicha “Prokuror kubogi” musobaqasi oʻtkazildi. Musobaqa Amudaryo tumani hokimligi,  tuman prokuraturasi, Kurash federatsiyasi, tumandagi Bolalar-oʻsmirlar sport maktabi va bir qator hamkor tashkilotlar hamkorligida tashkil qilindi.

Musobaqada tumanimiz mahallalarida yashovchi oʻsmirlar va 16-30 yosh oraligʻidagi yoshlar ishtirok etishdi.

Biri-biridan qiziqarli va zavqli taassurotlarga boy oʻtgan musobaqa 29-iyun kuni Amudaryo tumani Bolalar-oʻsmirlar sport maktabining 2-filiali stadionida 60, 66, 73, 81, 90, 100 va 100 kg.dan ortiq vazn toifalaridagi yoshlar oʻrtasida boʻlib oʻtdi. Musobaqaning halollik va shaffoflik asosida oʻtkazilishini taʼminlash maqsadida ishtirokchilar musobaqa Nizomi, shartlari va kurash sporti qonun-qoidalari bilan oldindan tanishtirildi. Shu bois musobaqaning birinchi kunidanoq ishtirokchilar koʻtarinki kayfiyatda gilamga chiqdilar.

Musobaqaning final uchirashuvlari 30-iyun kuni davom ettirildi. Doʻstlik va oʻzaro jipslik asosida oʻtgan musobaqa yakunida gʻoliblar aniqlanib, tashkilotchilar tomonidan diplom va qimmatbaho sovgʻalar bilan taqdirlanishdi.

Musobaqa gʻoliblarini taqdirlash marosimida tuman hokimi Sultonboy Yoʻldashev, tuman prokurori Javlon Muftullayev, DSI boshligʻi Aydos Seitov, tuman IIB boshligʻi Ulugʻbek Xudayberganov, tuman Davlat havfsizlik xizmati masʼullari,  Turizm va sport boʻlimi boshligʻi Gʻulomjon Qurbonboyev, Bolalar-oʻsmirlar sport maktabi direktori Chorsham Tajimuradovlar qatnashdilar va gʻoliblarni taqdirladilar va erishgan yutuqlari bilan tabrikladilar.

Tumanimizda kurash sport turini rivojlantirish, kuchli sportchilarni aniqlash, tuman terma jamoasini shakllantirish, mahallalardagi uyushmagan yoshlarni sportga jalb qilish, yoshlarning boʻsh vaqtlarini mazmunli oʻtkazish, ularni vatanparvarlik ruhida tarbiyalash, aholi oʻrtasida sogʻlom turmish tarzini targʻib qilish va ularning madaniy dam olishini tashkil qilish maqsadida oʻtkazilgan mazkur musobaqa jarayonida koʻplab iqtidorli yosh sportchilar aniqlandi. Shu bilan birga sportga qiziquvchi, alohida qobiliyatga ega boʻlgan yoshlar roʻyxati shakllantirilib, sportning kurash turi bilan shugʻullanayotgan yoshlarga hamda ushbu sport turi boʻyicha shugʻullanish istagidagi yoshlar uchun zarur shart-sharoitlar yaratish, tumanimiz sportchilarining nufuzli musobaqalarda xalqaro turnirlar, chempionatlarda faol qatnashishlarini taʼminlash boʻyicha masʼullar tomonidan zarur tavsiyalar ham berildi.

Robiya YOʻLDOShEVA.